ما كانش حبْ

سمّيه إلي إتحبْ

سمّيه جريه في الظلمهْ

سمّيه تشعبيطه في حلمهْ

يمكن عجبتني الكلمهْ

يمكن غلطه يمكن نزوهْ

يمكن زاده شهوهْ

يمكن توحشّت الدّمعهْ

أنا كيف إنحب ممكن إنهد الكعبهْ

ممكن إنفوت عرش الرّب بخطوهْ

ممكن نمشى عل الماءْ

ممكن في وسط النار نترمى

ممكن نرجع سنابل من قلب الرحى

ممكن في كرش الحوت نتنفس هوا

ممكن نولي خيال كي نرمي لعصا

و قدّام عشقتي نتهد و نهدّى

في الحب لا قبلي ولا بعدي

و حد الرب حدّي

ما كانش حبْ

سمّيه إلي إتحبْ

ماكانش حب ... كان حبل تربط من افاد الام  كان عرش تربعت في وسط ...كتاب مقدس خارج من غار الحب  و رسول فيه نتعبد  حروفي له صلاه وعبادة وبدني له سجادة

ماكانش حب  ...أما وحق كل حرف منك تنطق ...كان حديث نفس ...ومليان روح ناقصة حس...

ماكانش حب ...كان عكاز أيامي ...وضوء نجمة متسرسب من أحلامي...كان حلمة بنينة بين نومين...

ماكانش حب ...كان مطر اوسو روت وديان القلب ...كان دمعة فرحة ...كان ضحكة فوق راس ميت...

كان حب ...كان روح تنفخت في وسط جواجي ...كان ولد مرا ماتضناشي و صغير في وسطها تخلق...

كان معجزة عاشرة من عند الرب...

كان كلام سكات...وحديث رعشة بدن تتسرسب في عروقي ترجعني ترنكوشة ندعثر فيك و في صدرك  نتعنكش و ندحنس حتى يوفى الحب... و من عينيك نتعلم نحل ألغاز الحب.... ..

ماكانش حب ...كان بصر بعد عمى... و عمر رجع بعد جبهية و تعب ...ماكانش حب كان ندبة عشقة مالدور للحية.. ماكانش حب كان ساس و عرص الجاش.