كبرت !

كبرت و معادش نخاف مالضلام ، بعد ما كنت نهرب منو وليت نهرب ليه .. معادش نخاف من صوت ام كلثوم و صوتها اللي كان يرعبني  ولا تو بطربني ، معادش نخاف مالجن اللي بش يطلعلي من  وراء باب الفريجيدار ( ساعات كهو مازلت نخاف ) ،  و معادش نخاف لا كي ما نتغطاش مليح ايد تجبدني من تحت الفرش ، معادش نخاف مالدوايات و الزارق ، معادش نخاف من بو شكارة اللي يخطف الصغار  .. و  معادش نخاف من صياح امي كي تفيق بيا كليت الشكلاطة اللي مخبيتها ..

اي كبرت و تخلصت من اكبر حاجات كانت مخوفتني في صغري .. فيبالي وقتها الخوف يتلخص في الحاجات هاذم و ابطالي الخارقين هوما الناس اللي ما عندهمش الخوف هذا..

اي باهي و انا اليوم كبرت ، كبرت و معادش نخاف من هذا الكل .. شبية مالا ماوليتش بطلة ؟

شييا مازلت نجري و نتخبا تحت الغطا و نتلكمت على روحي كاينو على حلة عيني بش نلقا غول قدامي ..

شبيا حاسة اللي الحاجات اللي نعيشهم اليوم خوفهم اكبر ابرشا مالخوف متع الصغر ؟

اي معادش صغيرة .. كبرت .. مفهوم الخوف عندي تبدل اما مازلت نخاف .. من شنو نخاف ؟

نخاف مالعباد .. العباد اللي نحبهم و الا اللي انجم نحبهم ..

كل خوف في حياتي نجمت نتجاوزو الا الخوف هذا .. يقولو كي تخاف حاجة واجها بش معادش تخاف .. انا في كل مرة كنت نواجه خوفي هذا و نخسر ناس نحبهم كنت  نزيد نخاف اكثر من قبل ..

نخاف نقلهم اقعدو ما تمشيوش

ونخاف لا نصدقهم كي يقولو مناش ماشيين و بش نكونو موجودين

نخاف مالتبسيمة الفلو و الكلام الحلو ..

نخاف من الوجيعة..

نخاف من الليالي اللي نعديها نبكي وحدي في ظلمتها تزيد تطوال بيا...

كبرت.. و على خاطرني كبرت معادش انجم نكبش في ايديهم و نقلهم اقعدو راني نخاف..

و على خاطرني كبرت ما نجمش نقلهم راني نضيع بلا بيكم ..

وعلى خاطرني كبرت لازمني نتعلم نوزن الكلمة و الحرف بش ما اقولوش ضعيفة بلا بيهم ..

و على خاطرني كبرت ما نجمش نهرب و نتخبى عند امي و نحكيلها قداش البعد اخوفني .. قداش العباد وجعتني .. قداش خسرت طروف من قلبي .. و قداش فقدانها هي زادة يرعبني ..

و على خاطرني كبرت اكثر حاجة انجم نعملها  نعطي برشا لهوة و محبة و سوفنير لعل يتذكروني بيها ..

و على خاطرني كبرت لازمني نتعلم في عوض ما نقول ''ما تمشيش'' ، نقول '' كون فرحان و انت بعيد ''

كبرت .. اما مازلت في وسطي طفلة صغيرة خايفة معادش كلمة تنجم اطمنها ..

كبرت و يا ليتني ما كبرت ..