-شنية تحس....

-سكّت صوت مخي نحب سكات....

-شنية تحس....

-حاسة روحي مراية بلاش خيال...كواترو بلاش تصويرة معلق في حيط دار خايخة حيوطها معوجة...هبت ريح قوية تنجم تهدها...وطيح...

-شنية تحس...

-ساعات نحس روحي مطر صيف تهبط على الارض تزيد تشعلها تشعل نار وحشها للبرود وكي تحسها بدات تتنعوش تقص...تخليها لاهبة تستنى في رجوعها....وساعات نحس روحي غسالة نوادر نجي مرة في العام و أنا نجي مرة في العمر نفيض وديان القلب ونرويها بزايد نشبعها حتى ترجعني ومانلقى وين نتخبى....

-شنية تحس...

-نحس في روحي بلاد بلاش عباد ...ارضها ولادة اما ضناها الكلو يموت على النفاس...

-البلاد شنية أسمها...

-البلاد أسمها جنار ...

-شنية تحس...

حاسة روحي آخر خيال القمرة إلي نشوفوه الصباح ..تصويرة بلاش ضوء...اي حاسة روحي تصويرة بيضاء وكحلة...

-شنية فيها التصويرة

-تصويرة طفلة صغيرة روبتها فيها بقايع وسخ ...شعرها مفرفش...وجها موش نظيف اما تضحك .. عينيها فيهم لمعة فرحة وطرف دموع كينها كانت تبكي اما ضحكت للتصويرة..و محملة عروسة في يدها ...العروسة مصنوعة مالشوالق عروسة شوالق شعرها صوف وخشمها منحي أما حتى العروسة تضحك ويدها ممدودة للمصورة....

-شنية تشوف...

-نشوف في روحي ألف مرا في مرا وحدة ماعرفتش اناهي تواتيني بضبط...ساعات نلبس الفرحانة نفرق في المحبة ...وكي نقلق مالفرح نلبس الحزينة... ونفرق الكره ومرة نلبس المتربية وساعة ساعة نكسر الريتم ونلبس

الي بايعتها بلفتة ..و ساعات نشوف روحي ملايكة ضيعت طريق السماء ...وساعات شيطان سكيزوفران  في قلب يسجد لآدم ويسبح لربي .. ويحب الملايكة ...وفي مخو شيطان موسوس غدار يفرق الفتنة. والعرك ..
أنا...

أنا برشة كيف ماقالو صحابي أي أنا برشة في بدن واحد ...وكي نبدى وحدي ساعات نضيع أنا شكون...

-شنية تحب...

-شنية نحب ؟؟كنت نحب برشة حاجات اما كي عرفت إلي الحب حالة وفيه تقسيم وفصول وتعب خطرت نكون انا الحالة وأنا الحب...

ميسالش تسكت صوت مخي...برشة اصوات تتكلم موش عارفة أنا صوت قاعد يجاوب فيك...أما تعرف أنا صوت بلاش حروف وكلام..صوت مبحوح ماسمعو حد ...

-شنية تحس

-حاسة روحي الثلاثة نقاط إلي فيهم برشة معاني ماتكتبوش وجاو في آخر السطر وبين الكلام والسكات... حاسة روحي برشة خيالات في وسط الطريق والناس تجري تعفس وتتعدى و حد ماشافني وبعد..

-شنية تحس...

-حاسة روحي موزيكة بنينية مازلت ماتسمعتش ..موزيكة خارجت من عود ناقص وتر وإلى تعزف عليه طفلة صبعها مقصوص

- شنية تحس...

-حاسة روحي و إلى لا ميسالش ناخذ رشفة قهوة من عندك...قهوتي ووفات وكلامي وفى....