ازين منظر تراه للشمس هو وقت تطلع الصباح..حشمانة..مسرارة

شارقة..مزيانة

ازين منظر للوردة، اول نهار تتفتح فيه..ريحتها فاوحة..بتْلاتها طريّين..ملونين..مزيانين

ازين وقت في النهار..الصباح بكري

مع قطرة الندوة و النسمة الباردة

و ما ابنّش من القطرات لولانين متع الشا .. جايبين معاهم الخير و الهنا

و كيما هاذم الكل..حكايتنا بدات مزيانة

__________________

الدنيا كي تعكس تعكس..و كي تحب تفرحك..تجيبلك سواقي متع خير تجري بين ساقيك

و وقت الي كنت متشحتفة شاهية تجيك وردة تولي تجيك جنينة متع نوار

وقت الي كنت شاهية شكون يضويلك تاليفونك الظلام..يجيك شكون يخليك تتلهى بتاليفونك تشرجيه تتفقدو قولش ولدك الي جبتو من كرشك..هو مش انت الي جبتو..اما هو الي يجيبلك معاه الفرحات

المساجات المزيانين في وقت ما انت في طمبك الفده..و تاليفون طايش وسط الزحمة..يجيبلك صوت يطيرك بعيد عالخنقة..

بعد ما كنت شاهية شكون يطبطب عليك..تلقى شكون يحلّك يديه كي تتوجع، كي توحل، كي تتغصر، و كي تضياق بيك الدنيا..

يدين كبار محلولين و قلب ما يدق كان على خاطرك و عينين ما يشهلوا كان فيك

و شكاير وسع بال ليك لدلالك لتزعبينك و لطفلة صغيرة.. بليدة ركيكة ساكنة فيك

لقيت شكون يعشق فيك عيوبك الكل..و يحب الهبلة الي ساكنتك..و اكثر من هكة يلوج على وحدة كيفك بالظبط..قصدي يلوج عليك..انت الي كنت تحب تبدل في روحك و تعمل عمليات تجميل لطبيعتك..و تنقص مالصياح..مالدلال..من التفلسيف..تنقص من حبك و من فرحتك بالحاجات بش ما يقولوش عليك مهبولة..مهبولة مالا شنوة الي تتهز و تتنفض و دموعها تهبط سواقي

كي تقرى جرد جملة طايشة في كتاب ما تكون كان مهبولة

و الي تقوم تدادي عقابات الليالي قولش عليها تحيرت عليها زرصتها..اما في الواقع قايمة تدحس تلوج وين حطت الستيلوات بش تنسخ جملتين مالصباح يزنّولها في مخها ما تجي كان

مهبولة..و كي تلقى جد ام الستيلو..تنسى الجملتين..تتغصور..تحفر عروق مخها...تسب جد ام الذاكرة التيليليري الي عندها..و ما تبرد على داها كان ما بيدين متغششة و عينين تحرق بالنوم ببدن تاعب من هالقومة..بهاذم الكل تنقش كليمتين و ترتاح

هو انت تكتب بيديك و الا ببدنك

انت تكتب بكل عرق فيك..قتلك مهبولة

مهبولة و الهبال ما يخرج كان عليها..و هو مهبول اكثر منك الي حبك بهبلاتك الكل

عارف روحو على شنوة قادم؟؟ فسرتلوش عالاقل؟؟

قتلو الي انت تنجم متلاثة متع الصباح تقلو شاهية نعمل دورة؟؟

قتلو الي انت يخطرلك ساعات تعدي نهار كامل في الفرش

قتلو الي انت مش كي النسا الكل ما تحبش الشوبينق و تكفر بالحوانت الي يبيعو المكياج

و ما تحبش الزايد.. ما تحبش الصياغة و ما تحطش اكران و لا تلبس تالون

والي انت تنجم تقعد جيعانة خاطرك ما تحبش تسيب الكتاب الي في يديك

قتلو الي انت و القضية متع الدار مش حبيبات و بالقدر علخر

قتلو الي امك مش عاطية فيك امل و مقيدة فيك فلسة ما كالعام و مأيسة من انك يجي نهار و تحل دار لسبب بسيط ياسر: شكون هاللي بش يرضى بوحدة بخلية كيفك؟؟؟

قتلو الي انت تخاف من العرس و المسؤولية و جيبان الصغار و حسبات فلوس الكرا و فاتورات الضو و الماء

قتلو الي انت تخاف لا تحب حاجات..خاطرك تخاف لا تضيعهم

قتلو الي لازمو يعرف يهدّيك يطمنك يريّضك يسكّتك يحاول يفهمك..اما الفايدة يسمعك

قتلو الي انت ما تحكيش عالدخلاني متاعك ياسر..و الي لازمو يفهمك من عينيك

قتلو الي هو كل يوم بش يفيق يلقى مرا جديدة بجنبو

انت الي البارح ما سكتّش نهار كامل و هادّة الدنيا بضحكتك تنجم تعدي جمعة ما تقول كان صبخير و نحطلك العشا و جيب الخبز

اليوم تطيبلو مقرونة دلولة و طاجين و بيتزا و تلاثة سلايط و الديسير تيراميسو و مالغدوة تقلو اقلي عضمة انا تاعبة

قتلو الي انت تخاف؟؟ قتلو الي انت تخاف من حلاوة البدْيات؟؟ قتلو؟؟

قتلو الي انت خايفة لا يسكن قلوبكم البرد و العشقة تولي عشرة و خايفة لا ينْخر محبتكم سوس الروتين

و الي تخاف يجي نهار و توليو ما تعرفوش بعضكم

قتلوشي الي انت خايفة لا تتنحى البنة و توفى اللهفة و تولي اللمسة بلا حنانة و ماعاش يغزرلك بعينين شاهلين فيك

و يولي ماعاش يبوسلك يدك كي تمدلو كاس التاي

و ماعاش يبوسك من راسك كي يراك تاعبة

و ماعاش يعنقك كي تتفرجوا مبعضكم

و ماعاش يحمّلك بين يديه  كي يشوفك فادة

قتلو الي انت خايفة منو

و هو زعمة خايف منك

قتلو ما يخافش منك

قتلو الي انت كي تحب ما تسلمشي

قتلو الي هو عبالك البلايص الي حاجتك بيهم في حياتك بالظبط

و الي هو قداه من مرة قالك الحاجة الي انت حشمت تقولهالو

قتلوشي الي حاسّتو قاعد في وسط قلبك فاهمك و عارف مفاتحك الكل

قتلو ما يخممش في الفلوس و الي هي ما تسوى عندك شيء قدامو هو

والي انت تبدا ميتة بالفرحة و انت ساكنة في زوز بيوت مادامك بين يديه

والي ترضى تشري روبة ارخص مالي عجبتك مادام فيللخر بش ترى روحك مزيانة في عينيه

مادام بش تدخل للسهرية زاهية متعنكشة فيه

والي مش مهم بقداه الخاتم المهم هو الي يلبسهولك

والي مش مهم عندك وين يخرجك لفايدة اليد في اليد انت وياه

و مش مهم وين تسافروا المهم تستكشف بلاد جديدة معاه

و مش مهم الي فوق الطاولة شكشوكة والا كافيار مادام بش يقابلك عالطاولة هو

قتلو الي انت ملي عرفتو ماعاش تتمنى شيء مالدنيا اكثر من انو يقعد معاك العمر الكل

والي انت تعمل اي حاجة بش تفرحو و تسكت على ميات حاجة بش ما تغشوش

و الي تتمنى يجي نهار و تحكيو لولاد ولادكم كيفاه بدات عشقتكم و قداه مزيانة حكايتكم

حكايتنا بدات مزيانة..كي طفلة صغيرة تتكعبر..كي مشموم فل مرشوق في قرن مرا في الخمسين

كي قهوة عربي في العليّ

كالستة متع العشية في الافونو

كي بنة الفراز و ريحة الزهر في الربيع

انا خايفة لا..انا كي نبدا معاك ماعاش نخاف..  

_____________________

الخوف يقعد صغير قدام حب كبير..حبوا بعضكم و ما تخافوش..

عيشوا كل نهار وحدو..تبننوا اللحظات المزيانين و ما تضيعوش عمركم خايفين