و بش نشوفك اليوم بعد 3 سنين و اربعة شهر و جمعتين ... زعما كيفاش يعملو العباد اللي كانو احبو بعضهم  كي يتلاقاو ؟ يتعانقو و لا يتناساو بعد ما تفارقو .. ؟

زعما كيفنك ؟ شنوا اللي تبدل فيك ؟ شنحوال ضحكتك ؟ مازلت تسحر كيما هي ؟

و عينيك مازالو يلمعو كي الولاد الصغار كي تبدا تحكي على حاجة تحبها ..

و مازالو يحكيو في بلاصة لسانك كي تدخل بعضك و ما تلقى ماتقول ..

قداه كنت تغدرني بغزرتك و انا في طمبك غشي  و نبدا نتحلف و نتوعد فيك و نحضر ميات الكلام اللي بش نقولهلك و بعد ما نفيق بروحي كان نقلك قداه نحبك ..  زعما لحيتك حجمتها و لا خليتها كيما نحبها انا ؟ زعما مازلت تشرب قهوتك مرة بطابع سكر كهو  ؟ و زعما فما شكون و لا ياكل طوابع السكر اللي تخليهم كيما كنت نعمل ؟  و مازلت تسمع الغنا اللي ما نحبوش و الا سمعت كلامي و دورتها ام كلثوم و فيروز .. قداه ستاحشتك...

توحشتك و الوحش بدع بيا . وضلامت عينياّ

و ستنيت و انت  علياَّ بطيت

و عديت ايامات و اشهرة نلوج عليك .. في الشوارع  .. في البلايص .. في الاصوات .. في الروايح ..في صفحات الكتب و   عيت نلوج عليك في  في وجوه المتعدين.. عديت ايامات نتوحشك و نبات نحلم بيك .. و اليوم بش نشوفك بعد اكثر من 3 سنين ..

اليوم وقتلي نتقابلو ذكرني اللي احنا بجنبنا  عباد ..كراهب ماشية جاية بحذانا .. ذكرني اللي فما شوارع و حدايق و مساجد و كنايس... و ذكرني..  .. خاتر خايفة لا ننسى و نترمى عليك بالك ننسى وحش هالسنين ..

لبست زينت و برقشت و خرجت ..

الشمس في بلاصتها ما تحركتش .. السماء لونها ما تبدلش .. العباد هوما هوما ما زالو يمشيو على زوز ساقين ما طاروش .. و الشوارع هي هي ما تفرشتش بالورد و الياسمين ..
كنت نستخايل اللي النهار اللي بش نشوفك فيه غير الايامات العادية و اللي الدنيا بش تقوم و تقعد و بش تتقلب .. اما ما تبدل شي ..

ستنى !! لازم ناقف .. وين بش نمشي ؟ لحكاية سكرتها توا  سنين ؟

و ينك ؟ وين كنت وقتلي لوجت عليك و عييت و انا نقرق بيك .. ستنيتك اتجي .. تحل الباب و تدخل و تقلي يزي بلا هبال نحبك و نموت عليك .. تذكرتني بعد هالسنين
ستنيت و ستنيت و كتبت ميات السيناريوات و رسمت برشا حكايات .. و انت ما جيت و انا ما نسيت .. و توا راجع بعد ما تعدات سنين ؟  

اي ما نسيتكش اما ستانست بلا بيك و تعالجت من ادماني ليك   .. شقام علينا نحلو هالبيبان المسكرة و حكاية قديمة خارجة مالارشيف  ؟

يمكن هكا احسن .. البعد يحفط برشا حكايات كنا انجمو نهدموم كان قعدنا ما بعضنا ..