و حتى كان انا نعمل روحي نسيتك و حتى كان تعمل روحك ما تعرفنيش..

ما نخافش..

و حتى كان نقول ما فقدتكش..و حتى كان تقول ما توحشتنيش..

ما نخافش..

و حتى كان مشيت..و حتى كان خليت حاجاتك مزروعة في جواجيا.. و حتى كان ما فادش معاك كلامي.. و حتى كان زايد ملامي.. و حتى كان فات الوقت..

ما نخافش..

و حتى كان انت فسرت و انا ما فهمتكش..

و حتى كان انا وجعتك و انت ما تتحمّلش..

و حتى كان دورت عليك وجهي و حتى كان انت ما تغفرش..

و حتى كان وفات حكاياتنا.. حتى كان خنقتنا حلماتنا..

حتى كان رضيت انت بالشوية و الشوية ما كفاتنا..

حتى كان بردت غزراتنا.. و حتى كان نسيت سمايلك و نسيت انت ضحكاتنا..

و حتى كان مافهمتنيش.. و حتى كان انا ما فسرتش..

و حتى كان كسّحت قلبك و حتى كان انا ما سامحتش..

بالمحبّة برك.. تدور و ترجعلي..

بالمحبة برك.. تسامحني..

بالمحبة برك نغفرلك..

بالذكريات لي طرزناها غرزة غرزة مبعضنا..

بالشيء لي تقال بيناتنا..

بالأفكار لي تعرّات قدامنا..

بالخوف لي ريناه في عينين بعضنا..

ما نخافش..

و كان تبلعك سابع سماء..و كان يبعدك ابعد بحر.. و كان تهزّك الدنيا للشيرة لخرى..

ما نخافش..

و كان يفكوك مني 7 جنون..ترجعلي مسلسلينك سبعة ملايكة..

و حتى كان بالمخ ما يجيش.. بالقلب يجي..

و حتى كان مستحيل يصير.. بالمحبة برك..يصير..

بالمحبة برك تكركرك الدنيا ليا.. تجي ترمي الحمل عليا.. تلقاني نستنى فيك..

بالمحبة برك.. يوفى عْنادي و يرخّ قلبك..

بالمحبة برك تصفى السما لي لامّتنا..

و تصب مطرة تغسل وجيعتنا..

و ترجعنا عشاق جدد..

كيف ما يرجع الفرططو للنار لي تحرقوا..تدور و ترجعلي..

و بالمحبة برك..تلقاني نستنى فيك..