Zaineb S. - زينب س

نهارين ،ثلاثة ماكلة و نوم ما نعمل شي حتى لولاد خليتهم لكريمة لاهية بيهم ،خذيت كونجي مالدنيا لكل ،فديت مالفرش قمت حليت الفايسبوك نلقى انفيتاسيون من عند كريم ترددت شوية بش نقبلها ،ماللي عرفت هارون و الفيسبوك عاملتو كان للفامي و كعبات صاحباتي و بعد اقنعت روحي اللي ما فيها شي ،حسيت روحي مستحقة نحكي معاه بالاخص اللي ماللي خرجت مالدار هارون ما كلمنيش جملة يكلم كان كريمة يسألها عالصغار و قالتلي اللي ما جبدش عليا ،قبلتو ديراكت كلمني و بدينا نحكيو ،حكينا ليل نهار فرغتلو قلبي و حكيتلو اللي صار و هو سمعني ساعة يواسيني و ساعة يبعثلي حاجة تضحكني ،بديت نرتاح شوية و نخرج مالديبرسيون اللي عشت فيها اما لخدمة ما نجمتش نرجعلها زدت بعثتلهم سرتفيكا و قولت خسرت راجلي خلي الخدمة ..حاجة غريبة قاعدة تصيرلي و مش فاهمتها نحب نكمل كريم ديمة وين لمشكل احنا صحاب ما فيها شي هكا اقنعت روحي لين لقيت روحي نهار قدام الرستورون متاعو ،شافني ما صدقش جاني يجري فرح بيا برشا

Zaineb S. - زينب س

خرجت غالية مالدار ،هارون يرا فيها هازة ولادو في يديها و ما نجمش يمنعها مكانش عندو عين يقابلها بيها و مش فاهم روحو مازال يحبها ولا لقلب برد عليها مش عارف غايضتو ولا غايضو حالو ولا غايضتو عشرة لعمر اللي بيناتهم وصغارهم اللي يجريو بين ساقيهم ..

دخل لدوش حل لماء لبارد و دخل تحتو ،يمكن لماء يبرد نارو ..خرج لف منشفة في وسطو ،تالفونو يصوني جرى قلبو ضرب زعمة غالية ندمت و تحب ترجع ،هزو يلقاه مكتوب عالاكرون سمر ..سمر صاحبتو ،رمى اللفون فوق الفوتاي و تكى بجنبو عينيه فالسقف ،مش فاهم شي ،شبيك هارون شنوة تحب غالية هاي مشات و سمر جايبة ما عندها تطلب و مستعدة تكون عندك وقت ما تحب مش هذا اللي تحب عليه

Zaineb S. - زينب س

نكركر فالفاليزات ورايا ولادي كل واحد شادني من شيرة هارون يرحي فالدخان حاط راسو بين يديه يغزرلي مش مصدق ..

ما حبيتش نمشي لدارنا مش متحملة حتى كلمة ما نحبش نعاود لحكايةو نفسر و نبرر ،تعديت لكريمة اختي فرحت بيا ،حطتلي فطور فالكوجينة و لولاد تلمو مع بعضهم يلعبو

-شنوة بش تعمل توا يا غالية

Zaineb S. - زينب س

قمت الصباح درت نلقاه بجنبي غزرتلو قعدت نثبت فيه ،عديت يدو على شعرو ،على عينيه على خشمو ،فمو خدودو ،هارون حبيبي عشيري ليوم يوفا اللي بيناتنا لكل ،منجمش نصبر كيفما قالت ميما و كريمة انا اضعف من اني نتحمل نشاركك مع مرا اخرى ،ان شاء الله نجم ننساك و نكمل حياتي منغيرك ،قداش تستنى فيا من وجيعة و دموع كيفاش بش نجم نكمل حياتي منغيرك ...

Zaineb S. - زينب س

مشاعري مضطربة بين خوف غش قهرة وحش حب ما فهمت شي و ما فهمتش فاش قاعدة نعمل ..

شعلت الشمع و ضلمت الدار نسمع فالمفتاح دار فالباب معدتي دارت معاه كايني عروسة في ليلة دخلتها مش مرا تستنى في راجلها اللي عندها منو زوز صغار ،دخل تعدا لكلوار جا في وسط الصالة مش فاهم شي شافني تصدم غزرلي مالفوق للوطة انا تبسمت قربت منو شديتو من يدو لطاولة وقفتو قدامها

-هارون شنوة رايك فالعشا