هذا كلامي الاخر ليك ...

و ما نعرفش كان بش نجّم نقلّك فيه حاجات جديدة ... المفروض اني قتلك الكلام الي يتقال الكل .. متع اني نحب سوريتك البيضاء و شعرتك البيضاء و قلبك الابيض ...

بالضبط كيما نحب الورد الأبيض اما ما نحبش شكون يهديهولي !

انا وقتلّي بش يجيبلي حد ورد ... ما نحب كان االاصفر  و الأحمر ... الورد الأبيض ما يغرينيش و  نحسو كعك ما يطيّر جوع

كيفو كيف الورد الrose ...

وهاذي مشكلتي انا وياك

و نستعرف الي هذا ديفو كبير فيا مستحيل يخليني نتفاهم مع أي  راجل مهما كان !

ما فماش راجل يفهم مرا تحب الورد الابيض و ما تحبش شكون يهديهولها !

نهارت الي حبيتك و جبدتك من الميات الي قدامي ... حبيت فيك انّك تحب الاكحل و الابيض ... و الأحمر ! وكل لون واضح و دوغري و ما ينجمش يمشي منّا و منّأ ...

حبيت انك واضح ... قاطع .. اجاباتك ظاهرين ... كلماتك ما تتأوّلش و ما فيهاش زوز معاني ... وفيها ديما  حاجة تشبّه للتأكيد  ... ماكانش فما دوبل سونس في حديثك ...  وبرنامجك مخطط من قبل ما تبدا النهار ! والعمر !

و ما نعرفش   علاش حبيتني    ... اما نعرف علاش مش بش تنجّم تزيد تحبني ...

خاطرني مرا  متناقضة  ... نحب الورد الابيض و ما نحبّش شكون يهديهولي ... كيما نحب ضحكتك و ما نحبكش تضحكها لغيري ... و كيما نحبّ تحبني و ما نحبكش تحبّ حتى حد و حتى شي غيري !

وكي نقعد  نخمم في الي يستنى فينا تلقى الي الكياسات قدامنا برشا ... برشا لدرجة الي عينيك تتخبّل ... و الي انت مستحيل تكون قادر بش تفرز ثنيتك في وسط هالكياسات الكل ... انا نحس فيك بلاش بوصلة ... فرحان بالفرحة .... باللهوة . .. بالسهرية  ... بالجديد الي عرفتو معايا الكل ... فرحان كي الغشاشر الفرحانين بمهبة العيد لين ماعادش عارفين اش يعملو بيها ... يشريو الأمبايل و ينفخوهم ويفلقوهم ... المهم فرحانين .. المهم العيد ما يوفاش ...

اما هاكم غشاشر .. وانا مرا لطختني الدنيا لحيوطها لين قالت يزي ... وما عادش نجّم نرجع غشيرة نفرح بنفخان الأمبايل و فلقانهم ... وماعادش انجّم نمشي في ثنية ما نعرفهاش وين توصّل ... و ماعادش انجّم نفرح مع حد المهم عندو انو يفرح ...

وانا مرا مريضة بالخوف مالفرحة .. بالخوف مالركزان الي تركزهولك الدنيا بعد كل ضحكة ... مريضة بالخوف لمجرد الخوف
انا مرا ما نعرش نفرح من غير وعد ... وانت راجل ما تنجمش توعد !

انت راجل المهم عندك تهدي ... و انا مرا نخاف من الهدية و الي بش  يجي بعدها اكثر من خوفي اني ينساوني العباد و نقعد بلاش هدية

وما نجمش في نفس الوقت نقبل الورد الابيض جوست على خاطر نحب على ورد ...

انا مشكلتي اني تولدت و عشت صغري و وليت صبية و مرا ما نحب كان الورد الأحمر !

وانت وردك الكلو أبيض ...  

وعلى هاذاكا هذا جوابي الاخراني :) !

لراجل روحي فيه اما ينجمش يهدي ورد أحمر !