Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
منامة عتارس
Fatma Cherif - فاطمة الشريف
ما قتلكش دبّر عليا ... و لا علمني كيفاش نعيش ... و طريقتك في المحبة ما تعجبنيش علاش تحبنّي نولّي نحب كيفاك ؟
انت متاعي كان حتى ما تحبش تستعرف ... حتى كان متقلق و حتى كان عندك شكون ... حتى كان فما مرا أخرى تلبسلك و تتتزينلك و تتربّج بيك ... حتى كان فما حاجات انا ما نعرفهمش ...و حتى كان مازلت تحب هاك الطفلة الأولى الي حليت فيها عينيك و علمتك شمعناها مرا
انت متاعي...وين أنا نحب ... وقتلي نحب و كيما نحب ...
كان نحكيلك مالا أنا كيفاش نعيش ... كان نحكيلك الي كل ليلة انت ليا و متاعي و نحكم فيك ... نهزّك وين نحب و نلبّسك آش نحب و نقوّلك في الكلام الي نحبك تقولهولي ... حتى كان ما عينكش ... تي نحرّك فيك كي المريونات و أمرك بين يديّا ... نعرف روحي آش نحب و نجبرك بش تعملهولي ... و الحاجة الي نشتهي بش تعملها تعملها...يا سيدي لواش تقول موّكلتك عصبانة بتلّها ...
تحبّشي الليلة نلبسلك روبتي الكحلا و نحط على رقبتي السلسلة الي هديتهالي البارح و نبرفن بهاك البرفان الي تعجبك و ديما تشكرهالي ... و نخرجو نسهرو في رستورون على حافة البحر و تطلبني لشطحة طويلة نوشوشلك في وسطها كلام عمري ما قلتهولك ... و الي عندي لكل نهديهولك ؟ شفاولك ؟
تحبّشي نلمو فاليجاتنا و نركبو جميع في الطيارة نسافرو سفرة بعيدة ... نمشيو للهند و لتايلاندا و لماليزيا و نمشيو للفيتنام ... ننساو شويا الحلال و الحرام ... و نراو عباد عمرنا ما ريناهم ... نكتبو في ذاكراتنا حاجات مستحيل ننساوهم ...نلبسك ساري و تغير على كرشي العريانة و نقلّك ميسالش هوني ما يعرفنا حد , نحطلك فوق راسك ريشة و تلبسني سلالسل ورد ... شقاولك ؟
شقاولك أنا الي نتلهى بتفاصيل نهارك الصغيرة ماكلتك و حوايجك و اجتماعاتك و رونديفواتك ... شقاولك انا الي نفكرك في وقت دواك ... تمرض تلقاني معاك و كل ما نرى الدنيا سحّبت بالسحابة تلقاني في جرّتك نجري وراك ... شقاولك ؟
شقاولك نشدّو ثنيّة طوييييلة في كياس فارغ ... ما فيه كان أحنا ... تطيحلنا الكرهبة أون بان و مش بعيد نراو ضو متع كوخ ... تشدني من يدي و نمشيو نعدّيو فيه الليل ... ما نرقدوش ... نقعدو حذا الشمينية نحكيو ... تحكيلي على هاك المرا الأولة الي حبيتها و كيفاش انا فكيتلها بلاصتها ... و كيفاش شعري خير من شعرها و قدّي خير من قدها و ضحكتي أزين من ضحكتها ... تحكيلي على الشي الي تحسو كي تبدا معايا و كيفاش أنا الي اكتشفت فيك رجولية جديدة و احساس جديد ... كيفاش انا الي خرّجت منك حاجات جديدة ما كنتش تعرفهم في روحك ... تحكيلي كيفاش انا الي حببتك في الشكلاطة البيضا بعد ما عديت سنبن ما تاكلهاش ... و أنا نحكيلك على أصوات نخاف منهم و كي نسكت شويا تخوفني تقلدهم بش نجري نجري و نترمى عندك ترقدني بين يديك ... شقاولك ؟
شقاولك نختارو دار نعيشو فيها جميع ؟ دار صغيرة مهبولة ... كل حيط فيها من لون أثاثها فيه لمستنا ... مخاددها مراولنا القدم الي ديجا عندنا معاهم كدس حكايات , مريولي الأحمر الي ريتني بيه أول مرة و مريولك الأكحل الي كل ما نراك لابسو نقلّك يا شرشبيل ... كواتروات الدار هوما في الحقيقة تصاورنا تاريخ حكايتنا ... و فريجيدارنا هي هاك الفريجيدار الخردة الي نراوها في الأفلام القدم أكلي نحبهم انا وياك ... عليها نعلقو كلمات عملو الفرق في حياتنا ... بيت نومنا لونها أحمر , بيت النوم الحمرا الوحيدة الي في هالبلاد ... شقاولك .؟
شقاولك كي نفدّو نهجّو ؟ نشوفو جبل ... بعيد ... ما فيه حتى حد كان انا وياك ... نجرّبو حياة تارزان و نهبلو كي تصب الشتا ... نخرجو نتبلّو فيها و انحّيو حوايجنا ... و نمرضو نبراو ... نتفكرو ننساو و نعاودو نتبلّو ... شقاولك ؟
انت راك متاعي أما انا ما نحبّش نقول ... انت راك ليّا في كل وقت نستحقك و حتى كي ما نستحقكش ... علاش تحبني ننساك و انت موّنسني و حالل في بدني معمل متع فرحة ... علاش نطرّد فيك و أنا روحي فيك ... علاش يلزمني ننساك ؟ علاش يلزمني نحزن ؟ علاش يلزمني نندم ؟
علاش هال"يلزمني" أنا ما يلزمني شي ... انا كان يلزمني حاجة راهو يلزمني نزيد نحبك و نزيد نتغرم بيك و نزيد من عمري نعطيك حاجات يمكن ما تستحقهمش ...
ما قتلكشش دبّر عليا واحكيلي كلام محشي بالمواعظ و النصائح و الحلال و الحرام و شنوا الي بجي و شنوا الي ما يجيش ... ما قتلكش ربّيني و وريّني ...ما قتلكش احكي معايا حكاية انت مرا هايلة و تستحق ما خير مني , و انا راجل مانيش واضح و نخاف عليك كان اتبعني ... مهما تحكي ماكش بش تقنعني ... كلامك قديم و ما عندو حتى معنى و زيد ماناش نغنّيو في نفس المغنى ...
حاسيلو ما نطوّلش عليك حب المرا الي تعجبك أما راك في الأخر متاعي
نص مهدى للراجل الي حالل في بدني معمل الفرحة
فاطمة الشريف
Website Design Brisbane
Tags: