Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
عندنا رئيس شباب ؟ ما عندناش ... إذا نهزّو يدينا لربّي
Fatma Cherif - فاطمة الشريف
قبل ما نبدا نحب نصارحكم بحاجة في الحقيقة أول مرة تصيرلي هاذي أوّل مرا نوحل قدّام موضوع نويت بش نحكي فيه ... و لكن مع ذلك شديت صحيح ... من أجلكم و لأجلكم و خاصة من أجل تونس إلي قد ما جابتلكم توريست ... مازالت الوجوه العفشة تغزو الشوارع
....
إنريكه بينيا نييتو رئيس المكسيك الي شدّ في الصيف و تقلبت الدنيا عليه و من ثم خذا وقتو و اختفى ... سأحيّر اليوم قضيّته فمّاش ما منصف المرزوقي تهمزو مرافقو ولو حتى شويا وبش نحاول اليوم محاولة نعرفها فاشلة من قبل ما نبدا فيها اني نقارن بين سي انريكي و بين "منصف حمص" ... بين رجال المعارضة متع المكسيك الي بامكانكم زادا تعملو عليهم روشارش و تراو هاك الخنّار و الشي و بين نجيب كسكروتات و حمّة شلاغم و ابراهيم القصاص ...و الفارس المغوار قاهر قلوب العذارى صاحب نظريّة انت كان يجيكي راجل لاما تاخذيه توّ و تكتبي عليه... سي البحري شُهر مايكل الصداق :
إنريكه بينيا نييتو (Enrique Peña Nietoمن مواليد 20 يوليو 1966)
هو سياسي مكسيكي عضو في الحزب الثوري المؤسساتي. شغل منصب حاكم ولاية مكسيكو بين 2005-2011. في 19 سبتمبر 2011، أعلن ترشيح نفسه للرئاسة في الانتخابات العامة المكسيكية لسنة 2012 ليخلف فيليبي كالديرون، سجل ترشيحه رسميا في 27 نوفمبر، 2011.
في 2 يوليو 2012 أعلن إنريكه عن فوزه في الانتخابات الرئاسية بـ37 في المئة من الأصوات. أقر له الرئيس المكسيكي فيليبي كالديرون بالنصر تولى مهام منصبه رسمياً في 1 ديسمبر 2012.
معلومات شخصية
ولد في 20 يوليو 1966 (العمر 46 سنة) أتلاكمولكو, المكسيك
الحزب السياسي : الحزب الثوري المؤسساتي
تزوج من : مونيكا بريتيليني ساينث (1993–2007; حتى وفاتها)
و من ثم تزوج : أنجليكا ريفيرا (2010–حاليا)
الأولاد : باولينا و أليخاندرو و نيكول
اثنين آخرين ولدوا خارج إطار الزواج ... ربي يغفر و يسامح
الدراسة الجامعية : الجامعة الباناماريكانا
معهد مونتيري للتكنولوجيا والتعليم العالي ... مصلّي عالنبي
الديانة : الكاثوليكية ... ربي قال نحترمو الديانات السماوية لكل
_____________________________________
و أهم حاجة شباب فتقة يقتل بالزين ... و عندو كعبات شيب زايدين فيه الشطر و شعرو أرطب مش حكاكة آجاكس و عندو حفرات متع زين في خدودويقتلو يقتلو يقتلو ... و كي يضحك تشرق الشمس أصل و نراو صف اللولو المتلألئ
...
في عرسو لبس كسوة مايسترو و جاكات وحركات و حطّ شويا نوّار في مكتوب الفيستا من فوق دون التفوّه بعبارات الرجل التونسي حين تطلبين منه أن يلبس شيئا من هذا القبيل فيجيبك تلك الاجابة الرومانسية الرائعة
"شتحبّ يقولو عليا صحابي متع القهوة "...
أقعد فم وهف ليك و ليهم و لكل راجل يخاف من صحابو متع القهوة ...
رئيس يا بوقلب دخل لمعترك السياسة عمرو 18 سنة وشد الرئاسة عمرو 46 سنة . ... و أحنا في عمر ال18 أقصى حاجة نعلموها لأولادنا البيرمي و لبناتنا جبدان شعرها وحدها ...
وفي ال46 الرجال تتعلم تصوحب على نساها و النسا تبدا مازالت كي تعلمت كيفاش تمشي بالطالون
...
ولادو أساميهم : باولينا و أليخاندرو نيكول ... ريتو الأسامي ؟ مش ريان و عزيز و ريان و عزيز و عزيز و ريان ؟
بش تقولولي كافر ملحد جايب زوز مفرخ خارج إطار الزواج ؟ ياخويا خلّي يجيب حتى خمسطاش غشّير خارج اطار الزواج كان لزم هو يجيب و أنا نربّي وكيما قالت الغناية الفلكلورية الشهيرة : "هو يغضب و أنا نرضّيه آه يا ممّا آه يا حنّا آه يا انريكي خالك جا
" ...
يا خويا يجيب مالا شقاعد يعمل ؟ زينو متكلّف هذاكا و لا بدّ كل البدّ من انو الشعوب متاعو و شعوب العالم لكل تتحّد من أجل انها تاخو فيه باي و لو بمعدّل مرّة في العمر
...
آه مالا تحبّوه قنبلة موقوتة كيما هكاكا يمشي الحيط الحيط ؟ تي كان جا في تونس هذاكا راهم يخطفو فيه البنيّات من غير فدية هكا على رحمة الوالدين و دعاء الخير
...
كان فما واحد لازمو يمشي كنس كنس و ماعادش ينجب لا افي اطار الزواج لا البرّا من الإطار راهو رئيسنا المفدّى ... منصف الفرطاس ..
ستغفر الله العظيم هالصباح ملا سيرة منحسة ...
أقسم بالله أنا حطيت اسمو في الغوغل و البيسي تبلانتا ... نواصي و عتب
أيا سيدي شدّو عندكم :
_________________________________________________
ولد محمد المنصف المرزوقي في 7 يوليو 1945 معناها 67 سنة , في قرمبالية. تنحدر عائلته من الجنوب التونسي (من قبيلة المرازيق من دوز ولاية قبلي). والده محمد البدوي المرزوقي ووالدته عزيزة بن كريم، له أربعة أشقاء وسبعة أخوة. نشأ في تونس والتحق من عام 1957 حتى 1961 بالمدرسة الصادقية بالعاصمة تونس. غادر تونس للالتحاق بوالده سنة 1961، الذي عمل وعاش في المغرب مدة 33 سنة وتزوج من امرأة مغربية ورزق منها بسبعة أبناء يعتبرون إخوة غير أشقاء لمنصف . كما درس منصف المرزوقي بطنجة حتى عام 1964 حصل خلالها على شهادة الباكالوريا (الثانوية العامة) قبل السفر إلى فرنسا لمتابعة الدراسة، وتزوج هناك، فأنجب مريم ونادية. أقام في فرنسا 15 سنة.
شارك في انتخابات المجلس الوطني التأسيسي في 23 أكتوبر 2011 مع حزبه المؤتمر من أجل الجمهورية الذي حاز على المركز الثاني بـ29 مقعد بعد حركة النهضة الإسلامية وقد تحصل الدكتور منصف المرزوقي على مقعد في دائرة نابل 2. انتخب رئيساً مؤقتاً لتونس في 12 ديسمبر 2011 بواسطة المجلس الوطني التأسيسي بعد حصوله علي أغلبية 153 صوتاً مقابل ثلاثة أصوات معارضة وامتناع اثنين و 44 بطاقة بيضاء يمثلون 202 عضو من إجمالي عدد الأعضاء البالغ 217
نتكلّم تو و لا نسكت ؟ نسكت خير
والواحد علاش بش يلوم عالمنصف كان حكومة كاملة فيها يجي 500 وزير لا فيهم واحد كي تغزرلو , مش تصلّي عالنبي ... و انما مجرّد تتقبلو عينك بركا
...
تجي تحكي معاهم يقلّك الشبوبية مش شرط , الشرط الوحيد هو الكفاءة
ماعادش نحبّو كفاءة يا خويا ... الانتخابات الجايين نحبوهم بالتصاور ... باهيشي هكا ؟ هانا خذيناهم عالكفائة و بالأصوات و الكذا ما عملو شي عاد عالقليلة نربحو الجانب الاستيطيقي للقضيّة
...
كلمة كلمتين مش الفايدة في الشبوبية .. آه مالا الفايدة في شنيا تراه ؟
الي مازال يقلي كفاءة نعطيه كفّ ... ندوّرلو بيه الساديبون وجهو للحيط ...
واحد كيما منصف لا حبّ يدوّش لا حب يبلس كرافات لا بابييون لا حب يستوي قعدتو لا يستوي وقفتو لا يهزّ صحتو لا حبّ يزرع شعر في صلعتو ... و ما بدّل مراياتو كان كي كلا طريحة و تكسّرتلو مراياتو الأولى ... و الاّ ما رياقنا شاحت بش فهم روحو
...
الى متى يا أخي الى متى راهي حالتنا متعبة أصل
راهو الواحد من الي يحلّ عينيه و هو يقاسي في الشياح ... شويا رطوبة يرحمنا و يرحمكم الله
...
بدلولنا الوجه حطّولنا مورو ميسالش عالقليلة يحمل الجانب الرمزي للشبوبية و المعنى الضمني للهوية الوطنية ...
شبينا هكا أحنا بالله ؟ يستحضرني الآن حديث دار بيني و بين زميلي أحمد متع حكة السكر الفارغة ... عن الشبوبيّة ... فقال لي "يا فاطمة كان تشوف البارح الوفد التركي الي تقابل مع الوفد التونسي , لكلهم مكبوسين هكا و حاطين الحطة و وجوههم نايرة في حين الوفد متاعنا ... قتلو من غير ما تكمّل نعرف : العوجة و العرجة و مكسورة الساقين "
علاه هكا علاه ؟ تحل التلفزة تلقى شسمو هاك الفرطاس يعطي في الأخبار و يوكوك ... تحل البرامج السياسية تلقى ايهاب شاوش و لا وليد الزبراط ... تحل الراديو تجيك أصوات ستغفر الله العظيم و برا ... مقدّمات الأخبار زادا وحدة سمينة ياسر الأخرى ضعيفة ياسر و الأخرى رقبتها كي رقبة الزرافة
...
ياخي بأنا واسطة قاعدين يدخلو للتلافز هاذوما ؟ كيفاش يخدّمو فيهم ؟ فسرولي
الى متى يا أخي الى متي بش نسكتو عالشي هذا ؟ راهي ولات عيشة تقصّر العمر .. وكي الرجال تتكلّم يقلّك نحبّو بنات شُبّان تدور في البلاد ؟ منين بش نجيبوهم يا رسول الله تي اغزرو للرجال تو تنجمو تطلّعو وحدكم الكاليتي متع المفرخ الي بش تنتجها الديمغرافية لتونسية في العصور القادمة ...
الى متى بش نقعدو نحكيو على الشبوبية و كأنها حاجة من الكماليات ... يا ولادي راهو النسل التونسي في خطر فيقوا يهديكم ربي
...
على الحكومة أن تتباحث جديّا في هذا الموضوع الشائك و نحبو حلول ناجعة و راديكالية
...
يا خويا ما نعرش أنا جيبولنا 4 "إنريكيات" نشتّلو منهم و من بعد نرجعوهم لأماليهم كان نجمنا
...
جيبولنا طرف مكسكيين على شويا طلاين و أتراك .. و حتى وحيّد جابوني لعاشقات المسلسلات الكوريّة و وحيّد هنداوي و بعد ايجاو حاسبونا على جودة الانتاجية ... مش بناتنا تعرّس بخميسي ولد جمعة بنت بلقاسم و بعد يقلّك المرا ما عرفتش على شكون تتوحّم ... على شكون تحبوها تتوحّم و خميسي نهار كامل شادلها وجهها
...
و حتى كي يتلف هو يخليلها التفلزة محلولة و معدّلة عالوطنية واحد
...
نقّصو علينا يا شسمكم من صلاح الدين الجورشي والصحبي عتيق و حسين منشفة و حمد براهيم وحمة الهمامي و الثنائي "محمد و المنصف بن سالم" و خنفوس الفول و علي العريّض ... راهو النساء الحبالى ما عندهم حتى فرصة على مية بش يجيبولنا بذرة وليّد شباب طول ماهم يتفرّجو في هالظواهر البشريّة العجيبة
...
يا والله هم .. ولاّشي معزّ بن غربية مثال للرجل الشباب ...
شوفولنا حلّ في أقرب الفرص
ماكانش انا و ثلّة من صديقاتي الفيسبوكيات و من موقعنا هذا نهدد باضراب عام يشل الحركة الاقتصادية للبلاد و يفكرنا بالخميس الأسود و موت بالعيد يرحمو و يخسّرنا في 500 مليار الي حكاولنا عليهم ...
و هاني انبّه عليكم من توا يا اما تبدلولنا الرئيس أو تجبرو المنصف أن ينفخ شفايفو أو يحفر خدودو أو يشوف أي حل لحياتو ... رانا أحنا الي عفنا حياتنا
و بالنسبة للأولاد ما عليهم كان يعملو مظاهرات ينددو بتموقع سهام بادي على رأس وزارة المرأة الي كان وحدة كيما سهام تمثّلها ... يوفى الحديث
…
و انا من شيرتي نوعد صحابي و قرّائي الرجال لكل . نشالا في المقال الجاي نطالب بتحسين نوعيّة النساء و ربي نشالا يقدرني على فعل الخير
شعارنا في المرحلة القادمة
:
الامبرياليي و التوسعيّي الامبريالية من الأمبرة و التوسعيي من التوسع
فاطمة الشريف
Caricature de M. Abdelwaheb Majdoub, artiste-peintre tunisien, parue dans le site TuniCulture
Website Design Brisbane
Tags: