و فيبالك؟

اللي خرجة وحدة معايا

تخليك تعرف عليا محسوب كل شي.. ؟

تخليك تراني و تشوفني و تعرفني و تتعرف عليا أقرب ماللي كنت متعود

خرجة وحدة برك، توريك قداشني آني

قداش نكره نكون كيفهم هوما..

قداشني مش عادية، مهبولة، مجنونة، متتوقعنيش

متنجمش تعرف عليا شي كان متجرب تخرج معايا، مرة وحدة برك

مرة كهو، تنجم تعرف فيها عليا برشا حاجات

تنجم تشوفني قداه نحكي و منسكتش عكس أول ما كنت نبانلك كي كنت تراني من بعيد، ساكوتية و حشامة،

أما راني راديو ميسكتش

تنجم تشوف قداه لتو نخاف نشق الكياس وحدي

ممكن نشدلك يدك عادي

متفرحش ياسر يعني و تبعدش لبعيد بمخك

تنجم تشوفني قداه نحب الماكلة، نمشي و نشري و ناكل و نشري و ناكل و نتبنن و ميعجبنيش كل شي، و ميعجبنيش العجب ساعات

انجم نحكيلك قداه نحب نطيب زادة، الحلو بالأخص

و نوعدك نذوقك حاجة من يدياتي و نمنّيك و نجبد بيك و نعمل فيها نسيت

تنجم تشوفني قداه نتحرك، و آني نمشي، مرة نفوتك بخطوة ولا زوز، مرة تبدى تحكي تلقاني مزلت وراك بعيدة سرحت ف وردة ولا حاجة تستحق نغزرلها و شفت فيها فن

تنجم تضحك عليا، أما مش باش نتغشش، باش نضحك معاك، نحب نضحك زادة، و ضحاكة قدي متلقاش، مهما جبدتلي موضوع نحكي فيه معاك و منين تدورني ندورلك و ساعات نسكّتك و نقنعك، و ممكن تخاف مني

أما متخافش، مخي معبي و مليان و قلبي أكثر ببرشا، كاس و فاض

ب حب ناس مستحقتش، كان واتاتك الفرصة تو نحكيلك عليهم، ولا أخطانا منهم

تنجم تشوف قداه نحب البحر، و نسكت باش نسمع موجو، انجم نغطس فيه بدبشي في عز الشتا و منتقلقش، عادي، تبعني

متخافش، شوية ماء باردة و برا، باردة كي روحي و مالحة كي دموعي

ايجا اغرق و ننقذك، ايجا نتمشاو عالشط

ايجا نحطو الكيت و نسمعك غناياتي اللي ما نسمعهم كان كي نبدى نحكي معاك انت بالذات

و ايجا نحكيلك على عيشتي

كان تهزني بلاصة فيها دروج تو نولي العرق يقطر عليا خاطر نخاف مالمرتفعات و ممكن ياسر ندوخلك

قداه نكره ألوان و نحب ألوان

قداه معنديش أصحاب و ديما و آني وحدي

قداه بكيت منهم و رجعت ضحكت روحي بروحي

و بكل وقاحة يرجعولك يقولولك هاك رجعت ضحاكة،. أما ياسر كثرتلها ياخي تعرف كان تضحك و تكشخ

تنجم تشوفني قداش حساسة كي نحكيلك

كي نقرالك اش كتبت عليك

كي نغنيلك غنايات حفظتهم ليك

تنجم تصدقني؟

كي نشدلك يدك و اني يديا بيدها ترعش

و نحل فمي باش ننطق و نقلك راني حبيت روحك و عشقت سماها

راني ستنيت هالنهار سنين باش نقولهالك هالكلمة

اش وحلت في قلبي كي كتلة العسل، غصة أما حلوة

توجع برشا أما تشفي مالدوة

تنجم في خرجة معايا برك تحبني

و تقلي وينك من قبل

مش باش نقلك كنت نلوج عليك زادة كيما يقولوها هوما

باش نقلك كنت شايفتك من قبل، و سامعة صوتك من قبل

و واصلتني روحك من قبل

غير كنت نستنى فهالوقت، فهاللحظة، فهاللفرصة

باش انجم نخرج معاك

و نجيبك هنا و نحكيلك و نهرّ معاك و نقلك اش كنت نحب نقول

مقواني اش كنت نعرف نداري و نخبي

اما تو عينيا قدامك فاضحتني

قلي لي انت زادة كنت باش تقلي هكا

غير كنت تستنى في خرجة معايا

خرجة وحدة برك

مش هكا؟..