توا عامين ولا هوما ثلاثة سنين

ماللي تلاقاو عينيا بهاك العينين

ماللي حبو و تسحرو و ولاو مسحورين بطبيعتي حياتي كبي في كبي كانت،طفلة صغيرة كنت،16 سنة كنت،نمشي مع العايلة للبحر هه ،من شهور عرفنا بعضنا،أما غادي أول مرة تلاقيت معاه بالصدفة،كان يكور مع أولاد عمو ،عايلتي يعومو و أنا عالشط. نتبرنزا و نتفرج فيه،عاملة روحي لابسة مرايات شمس و مانيش معاه جملة،و أنا عينيا من تحت اللونات تتراقص و تلقط فيه ،نراقب من تحت لتحت،عرفني نغزرلو،ولا يغزرلي،و يسرح فيا ساعات الكورة منهم تجي علی وجهو و يحشم و أنا نضحك ،سيب التكوير و بقی يبادل فيا في النظرات،و بعينيه يقلي اه كان جيت انجم نجي حتی نسلم عليك برك،.و أنا كانكم علی مخي مشی لأبعد من هكاكة ...

_____

بقيت نغزر من بعيد

رغبة فيا تحركت وقتها كان نلقی نقوم نجري نترمی فأحضانك

كان نلقی نصيح لأمي و بابا : أهوا اللي كان ربي كتب باش يولي صهركم ههه،أما كان نعملها نعرف روحي يا نولي منعوتة بالصبع يا نتذبح من طرف الوالد و الوالدة هه ..

الحاصل،الشهر رمضان وقتها،أول رمضان نعديه،و أنا قلبي فيه شكون،أول رمضان ندعي في صلاتي لحد غير العايلة،

و نبكي في دعايا بالفرحة..جا سرحت لبعيد،في عينيه،لين جا وقت مرواحنا،مبلدني،نخليهم يسبقوا مالقدام باش نجم في اقل من 10 ثواني ندور نبيبيلك بيدي و نبعثلك بوسة ،و ما نحشمش من جارنا صاحب بابا قاعد عالشط باهت ،يتصيد فيا لشكون نشالي ..

و أنا شادة البيت،تبدا امي تنادي،باش نقليو الملسوقة،نجيها نجري،متاع وحدة كانت لاهية و غاطسة ف دنيا أخری،هه،نجي بجنبها،نرعش،فطيش الزيت عالملسوقة،يجي البرا مالمقلاة،و الوالدة باهتة فيا،مبعد رماتني بغزرة الغزول الاعتيادية متاعها،متاع فايقة بيك مخبية حاجة،ماو يقولوا الأم قلبها دليلها،و أنا نعرفها باش تعرف ،غير ما لقيتش كيفاه نجبدلها،و منين نبدالها،.سألتني فاش كنت تعمل قتلها صاحبتي طاحت كنترول دبرتلها دروس من خلود اللي تقرا باك،بنت زميلتك في الخدمة،و بعثتلها .. هه ! هاذي كذبة فطرتني قبل 7 دقايق من الأذان ،استغفر الله ..

قاتلي كان تطلع. تكذب،حسابك عندي،ليلتها قعدت نحكي معاه مالفوق لفوق،في مخي حكاية أمي،نحبها تعرف الحقيقة،ما لقيتش كيفاه،مشی هو مبعد يصلي التراويح،بين ما هو روح ،خرجت مع أختي نعمل معاها في دورة،هزنا الوقت،و طلعت نسيت البرتابل في الدار،قلبي تقبض،و ما نجمش نوصفلكم اللي صار ... !

حسيت حاجة باش تصير،حاجة مش باهية،روحنا للدار نزربو أنا و اختي،نلقا امي في الكوجينة،وجهها مقلوب 180 درجة،شبيك يامي ! شي برا ارقدوا شوية باش مبعد تقوموا تتصحروا،جريت لبيتي،ندخل ايدي تحت المخدة نضرب عالتاليفون ما لقيتوش !!!

كي نقلكم بدني قام فيبرور يرعش،سخنت،و بردت و ما نعرفش كيفاه عملت،نتفكر ليلتها لا تصحرت لا رقدت ! ندور منا ندور منا،شي،ندور عاليمين دمعة مالعين اليسار تهبط ،ندور عاليسار دمعة من عيني ليمين تهبط،.خذاتني عيني،نقوم علی صوتي فايقة من كابوس نبكي بالصوت و نصيح،.نلقا الوالدة علی راسي،.ما فهمتش شباها وقتها،أما جات اتكات بجنبي،و حملتني تقول عليا مازلت كي تولدت،و أنا مازلت نبكي،و هي ما غير حتی كلمة،دخلت فيا طول : مخبية عليا حاجة ؟ ستر ربي جا ظلام وقتها و ما شافتش عينيا كيفاه تحلو بالصدمة،و بعد جاوبتها ' لا " قاتلي قول الحق،بالك عندك ما تقلي،سكتت،و ظاهرلي وقتها خذاتني عيني من غير ما جاوبتها،.

فقت الصباح،عينيا تقول بالبوتوكس منفخين،.

و تعدات ليام،لين مر أسبوع كامل،و هاتفي جاري البحث عليه،شي،لا لقيتلو ريحة !

أما في داخلي نعرفو عند شكون ...

ولات وين تراني خارجة،تفهمني معاه،ليه،باش نراه،هو كهو،هي وحدها،الله يرحمها.كانت تشوف في الفرق اللي أحدثو سي اياد فيا هه،حتی كان جا اسمو صحيح،هي لي تراني نطيب و نتبسم وحدي،نسهر للصباح،نحكي معاه،هي تقوم الصباح و أنا وقتها نرقد،نقوم و نرقد بالتاليفون في وذني،و الضحكة ما تفارقني،فرحتلي،حسيتها تهنات عليا،فرحت بيه و بيا،بلاش عرس،دعاتلنا في الغيب و سترت عليا و عليه من بابا،.تخليني نراه،صباح قايلة عشية،كان فرحانة تعرفني بسببو،كان سارحة، تفهمني فيه،كان حزينة ولا مغششة الصباح ،تعرفني بسببو،نرقد القايلة نقوملها جوي أحلی جو،قاتلي كان نهار هبلت راهو من بنتي سيدة،هه،محلاه هبالي و هبالها بهبالي،حسيتها رجعت صغيرة،تحامي عليا و عليه،تتمنالي ما تتمنالو،توكلو

 ما ناكل،يطلبها في عيد ميلادها و الأعياد و رمضان،تطلبو،تنبهو،توصيه،و عليا تهنيه،حبتو،و أنا حبيتها كي حبتو،كي خلاتني نحبو ،و ما حرمتوش يحبني ...

أما دنيتي معاه عالشط في البحر،دنيا أخری،.وليت انجم نراه في البحر،من غير ما نتسبب بخويا ولا أختي بش يمشيوا معايا.،نتلاقا معاه،نقعد معاه عالرمل،محلاه الشط كي يبدا ما فيهوش برشا عباد و عينين،نتكاو عالرمل.،تغرب الشمس و نتفرجو فاها،ناسين الناس و الجيران النسناسين الدايرين بينا،ندورلو،نغززلو ف عينيه،عينيه وقت رمضان يفطرو الصايم،.لا عمري شبعت منهم،نهبطوا نعوموا،نتسابقوا للغريق،شكون يتحمل أبعد مسافة و ما يتعبش،و في الغريق،دنيا أخری،.ساقينا في الهوا طايرة،ما فما شي تحتنا،شمس ربي بكلها نشوف فاها مضويتو كان هو من بين جميع الخلق،نغطسوا اللوطة،نحلوا عينينا في الماء،و بفمو المليان بما البحر المالح نراه يقلي نحبك ،نرسملو قلب بيديا.و نطلعو مالما نلهثو مخنوقين،نضحكو شايخين،.و نخرجو،و نتواعدوا باش نتلاقاو نهار آخر و في حديثنا يأذن الأذان،و تجبدني تبوسني من جبيني قدام الناس.،و تقلي كهو ما عاد نخاف من حد،.نحبك قدامهم الكل و كان عجبهم،.
3 سنين تعداو علی هالحالة،.3 رمضانات،..

لين جا رمضان سنا خلاتني فيه الوالدة،تسببتلي انتي بالبعد لي فرقنا و خليتني حتی انتي،.و أول نهار اليوم،من أول الصيف،اليوم برك وين مشيت عمت،وحدي،.لوجت عليك في الجهة الأخری مالشط،بعينيا،حوست عليك،لوجت لوجت ما لقيتكش،.دخلت وحدي للغريق،ما خفتش ،جبدت النفس،و غطست،و بكيت،.تحت الماء،حسيت بالدموع بلت خدودي،رغم أنا بكلي مبلولة بما البحر المالح،.تخلط بدموعي المالحة،.و بكيت لين ماعادش انجم نشد نفس أكثر، غمضت عينيا تحت الماء،و ريتك بين عيوني،فمك معبي ماء،و بشفايفك تقلي نحبك،.حليت عينيا،ما لقيت شي قدامي،.نسيت روحي تحت الماء،.طلعت راسي و أنا نشهق،و باقي مش مأيسة عاودت غزرت للجهة الأخری مالشط،.شي ما لقيتكش،.

روحت،و ما غير ما دوشت بدبشي المبلول،بما البحر المالح،و شديت نحكي و نكتب عليك الليلة،.يا ريتك تقرا ،و تعرف،اللي أنا مش نساية،.اللي من حبك الليلة حكيت حكاية،و غنيت غناية،.

#النهاية