مخها أنظف مالنظيف ،بنية و ترنكوشة ،صغرونة سمرا مسرارة ،.

عمرها 14 سنة ،عايشة بين عايلتها ،أختها ،خوها و أمها و بوها ،تحب الطبيعة ،الحيوانات الموسيقی و نانسي و هيفاء كي كانوا قبل يغنيوا ،قبل لا يعملوا عمليات التجميل تو ..

مش قراية برشا ،مالسنة الأولی خذات جايزة وحدة ،.قصيرة مش طويلة ،بطبيعتها مازالت مراهقة تنجم تطوال ،شي ما تفهم فالحب لي كانوا يهتريوا بيه فالليسي

أول ما دخلت عام الساتيام ،كانت تسمع كلمة تصوحيب ،تسخايل معناها ،انو بنية و طفل يخرجو يحكيو عالقراية قدام الليسي ،فقط ! هه ،دغفة شوية هي ،تنجمو تقولو ،لكن ما قعدتش برشا ،حتی جا هاك النهار لي فاقت فيه علی برشا حاجات ،بدلتها ،فسدتها ،خيبتها ،و البرائة وقع الإعتداء علاها بكل وحشية و عدوانية ..

________________

ما طوالتش الأيام و هاك الدغفة فاقت من برائتها المفرطة .

في نهار ،جارتهم بنتها باش تعرس ،راجل جارتهم يحبها من حين كانت صغيرة يلعبها مع صغارو و تفطر في دارهم و ترقد عندهم كي كانت أمها تخدم حتی لوقت امخر .صادف انو امها نهار عرس بنت هالجارة ،عندها دفينة حد فالعايلة و ما نجمتش تحضر ،من معزة هاك الجيران بعثت بنتها و الطفلة علی قد ما حبت هاك المرا و الراجل و كبرت عندهم تقول بنتهم ،رفضت تمشي لهاك العرس بما أنها تكره الأعراس تبيض وجه أمها. ،شدت فاها صحيح و وعدتها تخرجها كي تروح و تعوضلها ،لبستها و بعثتها لدار الجارة بعد ما فسرتلها علاش مش باش تنجم تحضر ،دخلت الطفلة للدار ،شافت يلبسوا فالعروسة فالدبش ،روبة بيضة مرصعة ،دخلتها جارتهم ،أمها الثانية تقريبا ،هزتها للصالة تتفرج فالتلفزة ،هي هكاك تتفرج في قناتها المفضلة و ساعة ساعة يعديو غناية نانسي ولا هيفا ولا سيرين عبد النور ،و إذا براجل الجارة يدخل ،هاذا اللي رباها و وكلها و شربها و دوشلها و رقدها عندهم و هي بيبي ،دخل ضحكلها ،و قعد عالبنك المقابلها ..

________________

سارحة فالتلفزة ما شلقتش بيه ،حمحم باش هي فاقت انو جا حذاها ،قاتلو عسلامة عمي قالها يسلم بنتي ،قعد يتفرج معاها فالكليبات و هي تغني معاهم ،كي راسو تكسر و ما لقا باها وين ،نطق ،قالها تراه عيشك التليكوموند نبدل القناة ،عطاتو ،و قعد يدور يدور و حط mbc2

فيلم لتو تتفكر اسمو ' The fugitive ' ،بعد حكاية ربع ساعة جات لقطة خليعة ،زوز يبوسوا في بعضهم و طوالت البوسة و هي حشمت و وجهها تبدل وردي و خدودها حمارو و طبست راسها ،قعدو ساكتين دقايق ،بعد تكلم قاللها ليك برشا ما جيتش حذانا ،عملتلو ايه براسها ،سكت مبعد سألها ما توحشتش عمو و تاتا فضيلة ؟ أحنا توحشناك تبسمتلو و قالتلو و أنا زادة ،رجع يتفرج فهاك الفيلم متاعو و زاد شوية ،و دارلها غزرلها علی جنب ،يسخايبها ما شافتوش لكن هي شافتو ،.قالها محلاها لبستك عجبتني ،كانت لابسة تريكو لكن بالبروتال شوية روز بونبون ،و بونتاكور دجين ،جاوبتو قاتلو عيشك و قبل لا تكمل تجاوبو قالها ايجا بوس عمي ،يحبك عمو ،.قامت بالنية متاعها معاها مالبنك و مشات طبست علی خدو باش تبوسو و إذا بالجار يدور وجهو و يحط فمو علی فمها ،تفجعت الطفلة ! بعدت شوية قالها ما تخافش ،جبدها ليه ،قربلها أكثر جبدلها شفايفها و لسانها ،لتو تتفكر ،مصهم مصان ،و هي تأن و حتی الكلام مش منجمة تحكي ،ولا العرق يجبد علاها ،جبدت روحها بطلوع الروح منو ،غزرتلو ،تثبت فيه شكون ، قاتلو ماشية نشرب كاس ماء ،قالها باهي " بنتي " ما تبطاش اشرب فيسع و ايجا اطلع فوقي نلعب بيك كيما قبل ،هاني نستنا !! خرجت بدموعها كي شافت في عينيه غزرة مش اللي هي ،مش نفسها متاع قبل ،متاع حنية الراجل في مقام البو الثاني ،مشات بالحق شربت كاس ما ،تلفتت وراها لقاتو لحق علاها ،لزها ليه و عمل فاها الدوني ! قول كانت في غيبوبة و فاقت ،كانت تمشي ولات تجري ،خرجت مالدار تجري بحرارة الروح و ما لقاتش صوت باش تصيح ،.تلوج علی جارتهم ،مرتو ،في دار جارة أخری ،ضاعت منها الثنية ،و كي لقاتها ،كي لقات مرتو ،صوتها و سكت فمها و تقفل ،كلمات و تحبست ،من بعيد تغزرلها ،جات باش تمشي تكلمها ،تقلها يا تاتا راهو راجلك ، اش بش تقلها ؟؟ باش تصدقها ؟؟ نهار عرس بنتها ،و حد ما عاطيها عين ،حد لا سمعها و هي تصيح كي ما نجمتش تخلص من بين مخالب ذيب الغابة ،.
ساقيها تحجرت فالأرض ،دمعات محبوسة و بدن يرعش ،و هي هاك الدموع حبت تهبط ؟؟!!! .. .

________________

..تحجرت في بلاصتها ،كيما دمعاتها تحجرت فعويناتها ،.و بدا مخها يهلوس كان شافوها شباش تجاوب ،جرات ،شدت تركينة بجنب دار مهجورة ورا الحومة ،و غمت علی راسها بين سقيها و غطاتو ،فيبالها باش تبكي ما نجمتش ، من غير ما تقصد ولات تتفكر فاللي صار كيفاه جبدها ليه و بعينين ثعلب مستئذب حصرها بين يديه و كبش فيها و برك فوقها بساقيه و رجليه و عينيه و شفايفو و ريقو و ريحتو بريحة مرتو ،بدات تتوجع من رزنو فوقها ،جات باش تصيح سكرلها فمها ،ربطها ،عراها ،بكات صاحت صاحت صاحت أما صوتها ما طلعش ،بالك صاحت دخلاني ،بالك صاحت و بحس النسا لاهين بالعرس و يزغرطو فالحومة حد ما سمعها ،حملها ،باسها باسها بكلها و عمل فاها اللي ما يتعملش ف بنية عمرها 14 ،عافت روحها ،عافت بدنها ،راجل رباها كي بوها الثاني تو فوقها يغتصب فاها ،اغتصاب ،هالكلمة اللي ما فهمت معناها كان مبعد .. بقات تاكية راسها في حجرها و من غير وعي منها تصاور تسترسل في مخها ،حبستها في دوامة بكلها دم و صياح و وجايع و وجايع و وجايع ،..!

_________________

و بحس مش عارفة منين فاقت من سرحتها المشومة في تصاور اللي صارلها ،.تقول تصاور بالحق قدامها و هي تتفرج و تندب ف خداها ،.قامت بصعوبة باش تروح للدار ،و إذا بأمها جاية من بعيد مروحة مالدفينة ، كانت تمشي ولات تعجل ،تجري و دمها سايل لساقيها ،و دمعات حشمة و عار هبطو منها تخلطو بدم قلبها .. سبقت أمها للدار و دخلت شدت بيتها عملت فاها راقدة ،دخلت أمها للدار و طلت علی بنتها في البيت تلقاها راقدة ،لكن هي ما كانتش راقدة ،كانت فايقة و فايقة بالباهي زادة ،مصدومة ،مشومة محرومة مفصومة مغصوبة أكثر منها راقدة ! .. كان الوقت عشية و الدنيا تقريبا ظلامت ،نعست و قامت بعد سوايع فالليل امخر تصيح و تفرفت من كابوس ،تبكي و تعلي بالصوت ،تشكي و مشات بحرارة الروح لأمها تبكي في بكا ،عمرها لا كانت تعرف اللي العينين كانت تستوعب هاك الكمية الكبيرة مالدموع ،.و ترمات في حضن أمها ،تفجعت منها و علاها قاتلها شبي بنتي ،شفما حلمت حلمة خايبة ؟! ..جاوبتها الطفلة و لأول مرة تحس ان كلامها أكبر من عمرها ،كلام نابع من وجيعة ،من وجايع و سكينة و تطعنت باها ،قالتلها يا ريتني يامي جيت نحلم ! يا ريتو جا كابوس و تعدا ،أكا عمي جمال يامي ،راجل تاتا فضيلة ،بابا الثاني يامي ،. :'"((

شصار يا بنتي احكي فجعتني راك ! باسني كيما فالأفلام يامي ،بالقوي برشا لين عيفني فروحي ،و ما شبعش يامي ،عرا روحو و عراني و لزني ليه بالقوة و وجعني يامي ،طلعلي دم يامي بكيت صحت و حد ما جا منعني منو ،خايفة يامي !! :'"(( "

الأم بقات تتفرج في بنتها مش مستوعبة سرسوط الكلام اللي رماتهولها جغمة وحدة ،.أول ما استوعبت تنطرت مالسرير ،شدت شعرها ،خبطت وجهها خبطت خبطت ،بالساكتة فالأول ،مبعد ولا نواح و صياح ،بكا و شكا و كلام يوجع تحكا ،يا فضيحتي يا عاري ،سودتلي وجهي خربتلي داري ،.لاه شعمتلك لاه ماني أمك !! و دخلت فاها بطريحة ،و شدت تضرب تضرب في بدنها الكل خبطتها مرمدتها ،و علی وجايع وجايعها زادتها .. .

____________________

كلاتها طريحة ،و ضرب من أمها ،بكات بكات بكات ،لين دهشت ،داخت و فاقت كان فالسبيطار ،حلت عيناها تلقا بوها قاعد علی كرسي قريب منها ،تبسمتلو كي لقاتو جا،غزرلها بعينين مدمعة بحسرة و وجيعة ،و طبس راسو ،بلعتها في صميم قلبها و سكتت ،بعد شوية سألتو أمي فين ،تقول كان يستنالها فاها ،قام صاح عيط ،مبعد بكا ! قالت في روحها بابا أنا يبكي ؟ ..قالها أمك جاتها سكتة قلبية و تو فالانعاش في بيت قريبة من بيتك ،يخبطو فاها بالكورون بش تفيق !! ادعيلها و ما عادش تزيد معايا حتی كلمة ،صوتو خفت ،أما سمعتو ،قال جملة بالك كان يكلم في روحو وقتها لكن هي سمعتها ،قال كلو منك ،.بلعت ريقها ،دمها تجمد في بدنها ،قلبها تحجر و نسات روحها اش سمعتو قال و بقات تدعي لأمها ،.دخل عليهم الطبيب متاع أمها ،فرحت لكن الطبيب جا باش يعطيهم خبر أمها ،انها ماتت و فات الفوت بش ينقذو قلبها .. قامت من بلاصتها ،نسات روحها موجوعة و تنطرت تمس و تجس فالطبيب لا لا ،تي تو كانت معايا تخبط فيا بطريحة هه ،تو تقوم هاكي تفذلك و برا خاطر مغششة عليا أنا ،الطبيب تأثر و قالها البركة فيكم بنتي ،و خرج شادد دمعاتو ،بوها قعد حالل فمو ،مبهم مش فاهم ،غزرلها كي قامت تبكي ،هز روحو و بقا يصيح و ينوح قدام البيت ،.

أيامات تعدات و سنين ،و هاك البنية صارت يتيمة ،مرضت عايروها ،ولات مدمنة ،مش دخان ولا مخدرات ،ولات مدمنة عالفرجة علی فيديوات اباحية ،بورن و بوس و حاجات حرام ،مرة صوحبت ،و فيسبوكها عدم ،جا صاحبها يصلحلها فيه ،دخل يلقاها تزور فالمواقع الاباحية وقت تعمل فالدوني في روحها و في بدنها ،.قصها معاها ،فضحها و صارت عار فالحومة ،بعد ماكانت هاك الطفلة السمرا المسرارة اللي يموتوا علاها صغار و كبار ،هاك البريئة الحنينة ،هاك النية و هاك الطيبة ،هاك الطفلة ليوم بالصبع منعوتة بالنعوت الكل ،يتيمة ،عاهرة فاسدة ، اليوم وقفت علی كرسي و شريطة في عنقها و دزتو ،فرفتت شوية و ماتت فيسع ،بطبيعتها ميتة حية و وجايعها وصلت قتلتها علی قيد الحياة .. كلام الناس دفنها فالجبانة حذا أمها ،و ليوم روح أخری أزهقت ،بسبب العقليات الخامجة ،التفكير الحجري متاع المجتمعات ،لا مجتمع يرحم لا عينين تسخف لا قلوب تروف ،لا عايلة تعذر ،.صاحبتي كانت ،عرفتها بعد ما قصتها مع صاحبها ،حكاتلي هالحكاية و هي فالسبيطار في أول محاولة انتحار ليها،قاتلي نحبك نهار تحكي حكايتي للناس ،يتعلمو بالك.. جارة و صاحبة كانت ،تمنيتها لو عاشت باش شافت هاك عم جمال كيفاه مات عرق عرق ،صابو مرض بعد مرض ،فقر دم ،كونسار قضی عليه ،حد لا خذالها حقها منو ،أما ربي ما نساهاش ،بعضهم يغلطو بإرادتهم لكن هذي وقع اغتصابها و هي ف عمر 14 سنة ،اغتصاب يا ناس ،الكلمة اسمها علی جسمها ،يعني مش بإرادتها و فوق طاقتها ،افهموا ،ترقاو ف تفكيركم ،نتشرف باش نقول اسمها ،سارة ،سارة كانت وحدة من بين آلاف البنات الصغار اللي وقع الاعتداء عليهم ،و ما رحمهم حد ،و تنساو و ما خذاوش حقهم ،لكن ربي ما ينساش عبدو .. .!