ما فهمتكش تعمدت تكلمني نهارتها بالذات ،ولا صدفة ،.علی كل حال أنا عن نفسي كنت نحسب فيهم الأيامات ،اليوم نغلقو عام و نصف قد قد ،ماللي تفارقنا ،أكثر من عام ماللي كل واحد فينا قطع كل اتصال ممكن بالآخر ،أكثر مالعام ما تلاقيناش بالصدفة فالشارع ،حتی كان شفتك نعمل ما شفتكش ،و كان شفتني تعمل فاها السعادة غامرتك و انتي مع غيري ،.ادهشني منك تاليفونك ف هاك النهار بالذات ،.طلعلي ف écran

التاليفون ،نومرو ،مش مقيد عندي ،مش متعودة نهز علی نوامر ما نعرفهاش ،.وقتها هزيت ،و مالصوت تهزيت و تحطيت ... نومرو مش مقيد فالتاليفون ،أما الصوت مسجل فالذاكرة ،مقيد فالوذنين و موشوم فالقلب ،من غير حتی سلام ،طول "نتلاقاو ؟ مش نسأل ،.نطلب منك ،لازم نشوفك و نفهمو بعضنا برشا حاجات قعدت معلقة بخيط بيننا !...."

ف غضون ربع ساعة نلقا كان سقييا طالعين ف هاك الصعدة ،ماشين لبلاصتنا (قبل) ،حذا هاك المنارة ،علی هاك البنك المقابل البحر كان تتفكر ،قداه قعدنا عليه ،حفرنا أسامينا عليه ،ب مفتاح داركم تكتب ف اسمك و اسمي مدورين في قلب ،قداه شكيتلي و بكيتلك غادي ،قداه من مرة تلاقينا ،ليل صباح بكري ،عشية ،قوايل ،فجاري !! ،.الحاصل ،لقيتك قاعد عليه ،الساق عالساق .. مزلت ما وصلتلكش ،علی جنب شفتك ،هاك الخدود لتو منفخة باين فيك تاكل مليح ،.هاك الشعر نفس الكوب ،نفس تكعبيرة الراس و صحتو هه ،.... نفس الدبش ،نفس الغزرة لقدام و العيون تشعل فالشمس شعلان ،.وصلت ،أما قعدت من بعيد نعشق في نفس الملامح لي نعرفها ،و هبطت دمعة حسرة علی خدي .. .

ب سهوة مني سرحت فيك ،ف ملامحك ،ف أيام فاتت ،و ماتت ،قتلها الكذب ،مبعد دفنها السكات و مشی ف زنازتها ،.مش لازم نقولها و نحكي علاها و نحير المواجع أكثر من هكا ،اللي فالقلب فالقلب ....درت انتي تلقاني نغزرلك ،قفزت من بلاصتك حرفيا ،وساعت عينيك كي شفتني ،و دمعت عينيا من حسرتي ،.قربتلي ،قربتلي ،قربتلي ،حتی ما بقا يفرقنا كان صنتيمتر ،حطيت ايدك علی خدي ،و للحظة غمضت عينيا و غرقت ف دفاهم ،سرحت و سهيت ،غمضت عينيا خاطرني وقتهج نسيت ،نسيت اللي نفس هاك اليد اللي علی خدي تو ،ياما كليت منها كفوف كي نبدا نفك منك ف دبوزة الشراب ،هاك اليد ياما ضربتني كي كنت نطفيك بعد ما نراك مع غيري ،و نغض البصر و نتناسی ،أما ما ننساش ،.حليت عينيا عليك ،نلقاك خرقت هاك الصنتيمتر و قربت باش تبوسني ،هبطتلك يدك و دزيتك عليا ،دفعتك بعيد حتی تدفعت أنا بقوة الدفعة ،بديت تهبطلي فالدموع تماسيح ،.نوعدك نتبدل ،أرجعلي راني بلاك ضعت ،سحروني سحروني قولتلي !

كان فما شكون سحروها راهي أنا ،.كان فما شكون كلات علی راسها و سكتت ،تتخان قدام عينيها و تسكر فمها راهي أنا ،سكاتي خلاك تقدم لقدام و تزيد ف ...ف انك تأكدلي اني كنت مجرد لعبة ،مجرد دبوزة شراب من دبابزك ،شربتلها عمرها و طيشتها علی طول ايدك ...كنت باهية معاك ،و الأهم كنت مرا معاك ،كنت معاك مرا .،مش باش تتعاود ف حياتك مرتين ،كيما غلطتي فيك ،مش بش نعاودها ف حياتي مرتين ،.تألمت و تعلمت ،.و مش باش نقلك سامحني طلعت غالطة فيك ،خاطرك طول حياتك هاكي كانت طبيعتك و ماكش بش تتغير ،.ماكش باش تتبدل علی خاطر روحك ،خلي علی خاطر مرا تحبها ؟ قصدي حبتك .. ربي يطيح بيك لي كيفك ..و يعطيني علی قد قلبي ،....

__________

#النهاية