بالوجايع تخرج تبكي مني .. و ما تسكت كان ما نشدها ف حضني نبوس نبوس ،مرة نبكي مرة نضحك ،مرة نسكتها ،مرة نلعبلها بخصلتين شعر مازالو كي طلعولها ،شوف ! شوف بنتنا ! ثمرة حبنا و صبر سنين هاكي !... أمي ؟ ..يا ريتك تری بنتي ... يا ريتك هنا ،تكونلها الجدة و الأم و الصدر الحنين ف غيابي ،.حمد الله علی كل حال

هيا نروحو باها ! هيا،لا الطبيب قال لازم نزيدوك نهيرين هنا باش نتأكدو من حالتك و حالتها لاباس ،أنا نمشي نجيب حوايجي مالدار و نرجع نبات مع بنوتتي و مريتي ! هانا هنا نستناو فيك ،جات هي ؟

محلاها و مبهاها سبحان ربي شخلق و صور ،ماشاالله ملايكة راقدة و تضحك ف حلمتها ،هاك الجبين دافي سخون ،خدود ،حناكات رطب ،فم وردي روز ،صوابع ،صوابعها يا ربي مصغرهم ما يجيوش ف شطر صوابعي أنا ،يا ربي محلا هالرموش و هالعوينات الناعسة ،و اللغب بلا سنين هه ،اع هاك الخشم كليتو بوس ،حمدالله يا ربي عشت هالنهار و شديت قطعتي من لحمي و دمي ،ف حضني ،بين يديا ،ألف الحمد الله ! ،.رضعتها و رقدنا مبعضنا ،فقت مفجوعة من صوت التاليفون بجنبي

آلو ؟ انتي مرت فلان ؟ اي أنا شفما ،راجلك صار معاه أكسيدون و توفی طول ،البركة فيكم ،.

ههه
شيحكي هذا ؟ قيمت بنتي شنسألها شفما هه ،تي مشی يجيب ف حوايجو و غطا لبنتو مالدار و راجعلها شيحكي هذا ؟؟ ههه ،أمي !! أمي يااامممي !! لااااااا !!

سمعتني الفرملية مالبرا نعيط و نصيح جات تجري ،آخر حاجة نتفكر ريتها ،خذاولي بنتي "أمل " من بين يديا ،حطوها بعيد في بيت أخری و زرقولي زريقة باش رقدت ،ضربتها سوايع ،. دهشت ...

أمل ،.هكا كنا باش نسميوها أنا و راجلي ،هذا الاسم لي اخترناهولها ،.و احنا وقتها نتعاركو أنا وياه شكون باش يسمي أول صغير لينا ،و عاملين ليست كاملة ،...!

أمل ،كبرت ...

و بكل وجايعي و كل ما تحطم فيا ،نقول لي هي كبرت يتيمة بلا بو ،. ،.كي أمها

لا لا أمها ماتتلها أمها

أمولتي أمها مازالت هنا ،ما تتسماش يتيمة و أنا هنا نتلها باها ،هه أول مرة عملتها ،و بدلتلها كوشها ،و هي تضحكلي بالدموع و صوابعها ف فمها ،هاك الفم و الخدود ناكلهم بالبوس أنااا ،أمل و أول عام احتفلنا بعيد ميلادها ،أمل و هي تمص فالقاتو بلا سننين هه ،أمل و أول سنة طلعتلها شيحتلي ريقي بيتتني فايقة تبكي و صار فاها زادا برشا مرات بالغاز
و ما نلقاش شكون يخرج يشريلي دوا ،أمل و أول خطوة ،و أول طيحة شديتها ،هاك النهار لي قالت فيه هاك الكلمة " ماما " ،نسيت روحي و نلقاها كان بين يديا و أنا

نضحك و نبكي لدرجة انها خافت مني و دارت تبكي معايا

امل ،أول نهار فالروضة ،أول مرضة و باتت فالسبيطار و أنا ما لقيت حد معايا

أمل و أول عام فالمدرسة ،أول أدوات و هاك المصروف ،و هاك الطبلية اش طلعت محلاها فاها ،أمل و أول 20 جابتها فالامتحان ،و زادا أول طريحة كلاتها من معلم خاطرها نسات تمرين ما خدمتوش ،و هاك الدموع نهارتها نهار كامل تبكي هه ،أمل ..بنتي

لي ستنيت سنين عمري باش نربيها مع راجل يصونني و يحمينا أنا و اياها و نعيشو باللي عطا ربي ميسالش

الله غالب ،ربي كيما كتبلي أنا عشت يتيمة ،كتبلها هي

باش تعيش بلا بو ،..

ما تعرفش قداه احتجناه هاك البو ،كي جات تطفي في شموعها ، 4 ، 5 ، 6 ، 7 ، 8 ، 9 ، 10 ، 11 ،12 ،13، 14 ، 15 ،16 ، و السنا تغلق 18 أمولتي هه كان تشوفها ،كبرت ،ماعادش تحبني نهديلها كتب و دبادب ،مخها كبر و ولات ياسر تعاند في أصحابها

تحب منقالة ،تليفون ،تحب حاجات ساعات ،أنا ما نجمش نوفرهملها ،و تقعد مغششة عليا

لتو نتفكر روحي كي كنت صغيرة ،نستنی وقتاه تكون عندي طفلة ،بنتي من لحمي و دمي و عروقي و صبري و جهدي و تعبي و فرحي و شكايا و بكايا و كل ما فيا

كنت نقول أعطيني نولي أم برك ،الا ما ندلل بنتي ،الا ما نعيشها أحسن عيشة ،نربيها أحسن تربية ،أنا و راجلي نوفرولها كل شي

تكبر و نعلمها

تطيح و نلقفها

تبكي و نضحكها

نفهمها اللي هالدنيا فانية ،ما تسوی شي ف غياب ناس نحبوهم ،و نحتاجوهم ،اللي الحب حاجة تتهدی ،كيما

الاهتمام و الكلمة الباهية و النية الطيبة مع مهمن كان

صحيح نيتها تعبتها برشا ،.أما ما تخافش علمتها اللي ربي يعلم بما فالقلوب ،و كان حد ظلم ربي ياخو الحقوق ،.أمل

بنتي ،حبت برشا

،و ما حبوهاش ،و حبوها و ما حبتش ،تي نبدا نسكت فاها و هي بايتة تبكي من جرة طفل ،تي نعمبوه الحب كان يذل و يوجع ،الحب لي يزهيك و يفرهدك و يفرحك و يقربك من ربي و يتمناك فالحلال ،غير هكا ما نفهم شي يا بنتي ،...

أمل ،بنتي ،.آخر أمل قعد ليا فهالدنيا ،بعد ما خسرت كل ما عندي ،أمل لي كنت نتمناها تكون بنتي ،هاي اليوم واقفة قدامي عروسة مبهاها و محلاها ،ربي يهنيك و ما تتمنی ربي يعطيك

يا كل ما ليا ...