في مثل هذا اليوم ،بالدارجة في نهار كيما ليوم ،.في ليلة كيما هاذي بالظبط ،ساهرة ،.نحكيو ،نحكي معاه ،.نهرو نحكو كي العزايز ،.للصباح ،كانت 20 أفريل ،فاتت نصف الليل و ولات 21 .. صحاب كنا،آش ضحكنا و آش سهرنا و آش كتبنا و حكينا بالألغاز و آش تغازلنا ببعضنا تحت عنوان الصداقة ،أما ربي يعلم بآش كنت نحس تجاهو أنا ،تعلقت بيه مالأول ،و بالشوية حسيت بديت نحبو ،لين تأكدت ،.خفت نبوحلو نخسرو ،عادي كيما أي طفلة ،.حاولت نوصلو بأي طريقة ،حتی نقرربلو ،.و ف هاك الليلة ،كي عادتنا نضحكو ،.ضحككتو ،قالي انتي روحك خفيفة برشا و محلاك ،ضحكت و قتلو نعرف ،قالي و تعرف زادا ؟ قتلو هه أي أما ميسالش أبقی فكرني كي ننسی ولا نسهی ،و سكت شوية قعد ما جاوبنيش طول ،مبعد بعثلي ،مالا نقلك حاجة انتي ما تعرفهاش ؟ قتلو قول ،.و قلبي بدات تتجاری دقاتو فيا تقول عاملين سباق غادي وعاملين جو و أنا صاير فيا ما صاير ،.قتلو قول ،قالي و متنساش و متسهاش علاها ؟

قتلو ايه ،. .

و قد ما هو جاوب فيسع اش حسيتو قعد برشا بش يكتب ،.قالي حبيتك ،. قتلو حبيتك .. ، و دغفة أنا ف عوض نفرغ كل ما فيا ،بقيت ساكتة ،و هو يوصف فيا ،يقلي اش حب فيا ،يتغزل بيا ،قتلو فقلبي اه كان انتي هكا ،تي أنا جرد كلمة حتی السلام منك تعمل فيا ما تعمل ،تعمل فيا عمايل .. . قالي حبيت فيك طيبتك و حنيتك و هبالك و هدوئك و سكاتك و برودك و فنك ،بكلك متميزة و ما كيفكش ،.

حبيتو و زدت حبيتو بمرور الأيامات ،.شي مش منجمة نوصف ،ما يتقالش بالكلام اللي يصير فيا منو ،.مش حديث ..فعل بالك ،تعنيقة يمكن ،غزرة ،تكبيشة يد بالك ،.أما مش كلام ،مخيبها كلماتي كي تعملها فيا و تهرب مني كي حاجتي بيها ،.و كبرت الوحشة ليه و لشوفتو و لتلاقي عينينا ،.فترة و محلاها هاك الأيامات ،.برشا حب ،ياسر هبال و جنون و برشا برشا فن ،يمكن أكثر ماللازم ،.كتبني كتبتو ،صورتو صورني ،.تي تحبينا و بعد ما متنا حيينا ،.حاجة فيا و تحركت ،مش خاطر تداويت منو و بيه لا ،مش خاطر هو لي عملي هاك العملية الناجحة عالقلب

لا ،مش خاطر نحلم بيه كل ليلة لا ،خاطرو يتحب ،خاطرو يتحب ،خاطرو يتحب و اش فيه ما يتحبش ! ،خشمو عينيه حواجبو كي يهزهم كي يبدا يتبهنس ،صوتو كي يبدا شاد روحو عالضحك ،عينيه تلمع كي يفرح مالقلب ،يهبل كي ما يلقاش سيقارو ف جيبو ،عادي نبداو قاعدين يقلي هالقعدة ناقصتها حاجة و هو يقصد دخان .هه نرماال ،.

أما الانسان أو الانسانة لمتعودة بالوحدة ،ممكن مهما يعمل ولا تعمل ،تغلبهم هاك الرغبة

باش يرجعوا ينزويو ،جا ف لحظة و قالي سأغادر ،بطبيعتي حتی مش غالطة نرد روحي غالطة ،مفهمتش مني أنا ولا شصار ،موجود 24/24 عاد يجاوب علی مكالماتي لا علی مساجاتي ،.بكيت الأيامات الأولی ،برشا ،توحشتو و خلی بلاصتو في قلبي و فيا أنا بكلي و لتو شي ماعاد يملاها ..علاه بعد هاك القعدة ،بعد ما عطيتني برشا حاجات نتذكرك باها مشيت ؟ هكا ؟ سأغادر و تمشي ؟،. عادي ماكش وحدك تحب العزلة و الانعزال و الوحدة و التوحد ،أما أنا نسيت هذا و انا معاك ،هاك اللحظات لي عديناها ،هاك التفاصيل ،و الحروف و الخطوط و الكلمات و الجمل و رسايل العشق اللي تفاهمنا نكتبوها ديوان شعر أصل ،اللي تفاهمنا نأرخو حكايتنا فيه ،تغادر ،ترحل و تخلي ؟ لاه ؟ تي لاه ؟! ... .

تتفكر هالنهار أكيد ،كيما ليوم حبيتك و حبيتني ،كيما هالساعة كيما هالليلة ،كيما تو ،أما فرق وحيد ،ليلتها أنا طايرة مالفرحة معاك و بيك و ليك ،الليلة أنا حزينة رزينة ،ليلتها

قلبي وجعني بالفرحة لين بكيت ،الليلة نبكي نهبط فيهم حيار وحدي فبيتي ،رجعلي سيناريو قديم ذكرني فيما سبق ،كيما ليوم ،شهر لتالي تفاهمنا نحتفلو بعيدنا ،و أنا وحدي فقلبي احتفلت ،و شعلت شموع و ستنيتك ستنيتك و كي باقي ماجيتش طفيتها ،نستعرف كنت باردة فأغلب الوقت ،لكن هذا ما يعنيش اني ما حبيتكش كيما حبيتني ،لكن شنية فايدة الحب كان ما تظهروش ،صحيح .. .

نحب نقول نحبك ،نحبك ،نحبك

و أحبك و أهتم ،و بكل ما أوتيت من وجع ،و بوجيعتي هاكي اللي حببتك فيا لا زلت أنتظرك ،.

نحبك

هاني نستنا فيك فهاك البلاصة

زعما تجي ؟

هاي ايجا ! هه .. .


سيدة جعفر