جربتوه احساس تكونو الخيار الثاني عند الناس ؟ كرسي الإحتياط ؟ بابيي مشوار للدموع ؟ كتف يتكاو عليه حتی يهدوك و كي تجي تتكی راسك يطيح وما تلقا باها كتف ؟ جربوه محلاه ،بنينة وجيعتو ..

تهبل ،حتی تجننك ..تلفك بالكفوف حتی تفيقك ،تطيحك حتی تمرمدك تكسرك و تدقدقك حتی تقتلك ،.جربوه ،.

جرب تاقف معاهم بلا استثناء ،24/24 و علی حساب وقتك و جهدك و تعبك و صبرك و حسابك انتي

تي ميسالش ! يهون ! و شوف انتي مبعد كيفاه عليهم باش تهون ..

جرب ضحي ،بيك بما فيك ،ب صحتك ب عضمك ب شحمك ب لحمك ب كل ما فيك

نحي منك و اعطيهم ! ميسالش ،يهون ! زيد ضحي

زيد نحي

زيد ضحي

زيد نحي ..!

جرب تحبهم !!! اي حبهم ! امرجهم بالاهتمام متاعك ،بلهوتك ب اهتمامك اهتمامك اهتمامك ! جرب فددهم بالحديث معاهم نهار ليل

تي حتی فالمنام تزورهم و تزهيهم

و علی هم الدنيا تلهيهم

جرب ،اطلبهم ،أسأل عليهم ،كلمهم ،استفسر مابيهم ،و اذا بيهم ،يتناساووك ،يصدوك ،لصقة و نية و دغفة و ترا بالعشرة أكثر ماللازم يردوك !

أما عشرة ؟ أما صحبة ؟ اما ناس ؟ شكون انتم ؟ شكونكم ؟ شبيكم ؟؟؟

هكا تعيشو ؟ هكا تحبو نهار و تطيشو ؟ هكا تعلقو قلوب ناس بيكم و تريشو ؟

شكون انتم ؟ ما نعرفكمش

عرفتكم و ندمت

و تبرأت

و ندمت !

ارقدو ،عيشوا موتی ،اكذبوا ،حبو ب مخاخكم ،ب مؤخراتكم ،تصرفوا انحطوا و حطوا باش تحققوا مصالحكم

اوجعوا من دايرين بيكم ،حطموهم ،تي اقتلوهم !

ولا يهمكم ،موتهم منو درس ،ليه حياة ،أما موتكم فاني ،موت علی قيد الحياة ،عايشين موتی ..

ميسالش ! يهون ! كان لي يرا بالعشرة و يصون ،يولي يتشاف قزمون ،ميسالش

نقول كان يهون !

يهون السهر ،و البكا علی من ما يستحقش ..يهون المرض من كلام تقال و مررضك ،تهون أحزانك لي تعانقك كل ليلة و تخنقك ب مخدتك حتی تقضي عليك ،تهون حيرتك عليهم و حبك

الأعمی ليهم

سامحو لهواتي و سهواتي و ضحكاتي معاكم حابسة دمعاتي

سامحو اللي فات و الآتي

و أنساو انكم عرفتو حد بطيباتي و حسن نياتي

أنساوني و أنساو أياماتي

خاطرني كرهتكم

و نقمت عليكم

كلكم بلا استثناء

خاطر كل ليلة نباتها نبكي منكم

أكثر حاجة ندعي باها ربي يخفف عذابكم و يسامحكم علی ما قلتو ،ما عملتو ،ما تظاهرتو ،ما كذبتو

و الكذب آش يوجع و ماخيب ليعاتو فالقلب..

اذا أنا اعتزلتكم ،اعتزلت عالمكم

اعتزلت شخصياتكم المفبركة و وجوهكم المزيفة و طبايعكم المصطنعة

يستحيل نعتزل الكتيبة لي مخليتني لتو نتنفس بالباي ..

اي،يهون،. قلت كل شي يهون ،ماعدا كتيبتي ....

حد ما عاد يجبدني

حد ما عاد يكلمني

حد ماعاد يتصنع الاهتمام لأمري واللهوة بيا

أنا بلا بيكم أفضل حالا .