Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
و تو، شبينا؟
Saida Jaafer - سيدة جعفريا ليت كل ما جيت نحب عليك انجم نجيك
و يا ليت كان جيت كل ما نجيك، نتكى على كتفك و على كتفي نتكيك
يا ليت كل كلمة نحبك و ايجا اقعد شوية اخرى، و خليك
جات تتسمع عندك، باش تدغدغلك وذنيك
اما انتي شبيك؟
برودك مبعدك و عاميك
سمايا كحالت و نجومي طفات خلاتني ندهدص فالظلمة بلا بيك
شبيك؟
شبي ماللي مشيت
و كل شي دار عليا و شبي شبيا معاش عارفة شبيا
شبي ماللي مشيت و اني ما نقول كان تي علاه الزح كان و كان، و يا ليت
يا ليت كل نص نقراه
تكون انتي قدامي
يا ليت كل كلمة تخرج من فمي ليك
تكون انتي مقابلني، تشوف فيها تطلع من بين شفايفي، و تقربلك قريب تبوس عينيك
يا ليت جيت انتي اول واحد يحضرلي فالناس اللي تغزرلي و منعرفهاش
تي سنين نكتب
من وقتاه وقفت قدام وجوه و عينين تبحلق فيا و اني نقرى عليك
من وقتاه نخرج صوتي و اناجيك
و كل ما م تجينيش، اني نجيك
تي شبيك؟
عميت عاللي كان محلاه فينا و تو خيه مخيبو ولا؟
نسيت كل كلمة توحشتنا، كيفاه تجي بعدها ازين طلة؟
ولا نسيت الليالي اللي نبات فيها نقرالك
ولا اني وقتها كنت نقرى فيك؟
تي شيهمني المهم كنت شايفة الدنيا بعينيك
و انتي ما كنت شايفني
و كاينك نهار لا عرفتني ولا كنت نهار تعرفني
تو وليت عايفني؟
عايف التعنيقة اللي قبل تبدى تسرق فيها مني بالسيف؟
و البوسة اللي تاخذها مني بعد طلوع الروح، حتى كان مش بالكيف؟
تو وليت تعيف؟ تو وليت اني بيا و عليا و انتي سي الشريف؟
خسارة كلمات و حروف
حقهم كانو ضرب و كفوف
خسارة وقت عديتو شادة الصفوف
في النقل، بر ولا بحر
غير تتلاقى عينينا
غير ارواحنا تتعانق، اكثر من يدينا
غير تسكّت هاك الطفلة الصغيرة اللي فيا، مسكينة..
غير ف كل مرة نشوفك قداه تبرد اكثر من قبل، و اني اللي باقي معاك حنينة
غير و غير و غير
اما بجاه ربي، فسرلي
و تو، شبينا؟
سيدة جعفر
Website Design Brisbane
Tags: