ديما و مش ساعات..
نحس روحي مريضة
اي مريضة!
تضحكوش
مريضة و المرض فات فيا
مريضة بالكبت

كبت الكلام كبت الحروف كبت الكلمات
كبت عباد معادش موجودة و ليها سنين ماللي مشات
كبت بقايع نتعداها بالمرات
كبت ذكريات من مخاخهم تنحات
اما في راسي لصقت ما سيبت
مريضة بالكبت و منجمش نخرج كل شي نحب نقولو
منجمش نعارك منجمش نبوح منجمش نتغشش
كبت مشاعر و كبت احاسيس ساعات منجمش نوصفها بجرد كلام
مريضة بالحروف اللي متحبش تخرج مني و عمرها لا كانت مطاوعتني
خاطرني كل ما نقول نحكي على روحي و على مرضي
ندورها نحكي عليك
فما حتى علاقة بينهم
حاجة تخصني، و حاجة انت..
المرض يخصني و انت..
اه ستنى، نسيت اللي انت هو المرض
نسيت اللي انتي مرضي، اما ما تخصنيش
يعني لابسني و راكبني كي الجن
اما ما يهمكش فيا ،اش ينجم يصير اش انجم نوصل نعمل في روحي باش ننسى نتفكرك
تعرفش اش نوصل نكتب و نفسخ، اش نوصل نبكي و نقطع النفس اما يرجع بالسيف عليا
اش نجم نقول لناس منعرفهاش
و نندم قلت
مريضة و ساعات ما نحب شي
غير نمشي لطبيب نفسي نحكيلو الخرم اللي عايشة فيه الكل، نحكيلو العمايل اللي عملوها فيا الكل، و نحكيلو على مرضي بيك، و نخرج، و ليلتها ندخل لدارو الطبيب، و نقتلو و هو راقد باش ما يحكي لحد
باهي ايجا انت نحكيلك
انت الوحيد اللي اذا نحكيلو، نعرف مش باش نحس اللي اني نحب نقتلو، نحب نقعد نحكيلك و نشكيلك منك و نكتب بيك و عليك و نبكي فيك، لين نرقد
و ف منامي نزيد نجيك
اما انت ما تجيني..
قتلي لي انت ما تحبنيش؟ علاه تخلي فيا معلقة و تشويلي في كنيني
علاه تربط فيا بيك
و انت بيدك مريض بغيري
علاه المرضى ما يحبوش بعضهم؟
مش بالك نداويو بعضنا؟
مش بالك نرجع نحس معاك، و بالك كانك مزهار ياسر
تو نحبك و كان ربي يحبني تو تحبني انت زادة؟
باهي مش لازم
ابعثلي جوابات تحكيلي فيهم عليها
و تو نقراهم على اساس ليا و عليا
لين تنساها و ننساه
و نتفكرك و ما تتفكرني
و ننساك انت زادة..
جنبي في الفرش وجعني، بدني مش مطاوعني
ندور يمين ندور يسار
نشوف في وجهك يغزرلي
مانيش نتخيل
نجم نمسك!
موجود بالحق..
اما كان نحكي لطبيبي تو يقول هاذي مهبولة بالرسمي و يبعثوني للرازي ..
هاي نمشيولو الزوز؟
ماو احنا الزوز حبينا اللي ميحبوناش
و عطيناهم كل شي من قلوبنا و ما عطاوناش
راني مريضة و المرض فات بيا
راني نمشط شعري نراك، نرقد نراك، ندوش نراك، نضحك لحد نراك في وجهو!
تنجم تفسرلي اش اسم مرضي؟
عالأقل نعرف اش نقول لطبيبي..
لا؟ باهي مالا ايجا انت داويني
ايجا خليني بيك نزيد نمرض لين نبرى
هاي ايجا..