فما فوق المية نص، نبات نكتبهم للفجاري، و آني نبكي بالشهقة، مبعد نفسخهم و نرقد
فما نصوص نهبطها و نندم
فما كلام، نتفكر قلتهولك في لحظة ضعف، و تمنيت كان الأرض بلعتني و ما نراش ردك البارد عليا
و فما كلام، تقالي، منجمتش نرد عليه، خاطرني ما نحسش بيه
فما بلايص، مشيتلها، و أول كلمة قلتها، يا ليتني جيت مانيش وحدي هنا

و فما ناس عرفتها تمنيت معرفتهاش
فما لحظات في حياتي تمنيت نجمدها
فما نوم في أياماتي، تمنيت نعوضو
و فما تعب في حياتي، أحلى على قلبي مالعسل
فما تواريخ، قد ما نحاول ننسى، منجمش مننساهاش
و فما ايامات، قعدت موشمة في ذاكرتي من وقت صغري..
فيبالكم..؟
كل ما نزيد نكبر نهار في عمري، نتأكد قداه قاعدة نقرب للموت أكثر
نتأكد اللي كل شي داير بيا تو، في ثانية واحدة مالوقت، باش يختفي، و اني نندثر مالوجود هذا و ما عادش نبقى فيه..
عايلتي، كعبتين اصحابي، اللي مشاو
كلهم..
قداشني ماعادش نعرف نستحفظ على الناس اللي نهار حبتني ولا تلهات بيا، نعرف روحي نفحاوية، أما مش مع الناس، نفحاوية مع الكتيبة، مع وين نسكن، نفد من ديكور بيتي، من ماكلتي اللي نحبها، نفد من شعري من لبستي، و نحب ديما نبدل، أما مش مع الناس
عمري لا عرفت حد و عرفت كيفاه نستحفظ عليه
لا عشير، لا صاحبة، لا حتى حد
كيفاه نوصفها؟
نحس اللي مهما حسيت، في نهار، من وجيعة، مستحيل يفهموني
نحس اللي كي نطيح و كلامهم متاع كل ديما و ميساجاتهم، ما عادش تحرك فيا شي
ساعات كنت نستحق تعنيقة، ولا سكات و غزرات، نفهم بيهم روحي و نطلب السماح كان غالطة
اما ما غلطتش اني، كان غلطت نقول
ما نعرفش نعبر ساعات، ساعات نحب نقول سامحني
و نكتبها في ورقة و نخليها في جيبك
ساعات نلعبلك ب شعرك و نفرتو، و نعنقك مالجنب و ندغدغلك اجنابك لين تقهقه بالضحك
ما كنتش هكا، اما كبرت، و زدت ضعفت في حاجات و بردت من ناحية حاجات
مازلت كي الصغيرة نبكي و نتخبى في بيتي كان امي و بابا يتعاركو
مازلت نعارك اختي عالدبش كي تهز ما غير ما تشاور
مازلت نزهق بالفرحة كي نشوف البحر، رغم نسكن محسوب قدامو
على ما قريبلي، ساعات بالريح صوت الموج يوصلني..
مازلت نمسخ دبشي كي ناكل بزربة
و مازلت نكره كي شعري ما يركحش، نولي نشدو كعكة و نخرج بالسيف عليا بعد ما تطيرلي..
اما البرود كلاني،. يمكن خاطر تو سنين نعوم كان فالفجر وقت البحر مثلج، و ندوش بالبارد كان شتا كان صيف
يمكن تضريت و توجعت برشا لين معاش نحس
و في كل مرة نقول اخر مرة نبكي
نلقى مازال فما دموع مالحة في عينيا
هابطة منهم بالسيف عليا
يمكن البحر، تخبى في عويناتي سنين
و كل وجعة يهبط منهم قطرتين باش نتفهرهد
اما نرجع..
نرجع نخلي بروحي و نلز روحي للوجيعة
و صدقوني كل وحدة أقوى من اختها
ما نتفكرش في اما عام اكتشفت روحي نعرف نرسم
نتفكر كنت نحب ننقش ساعات حاجات خفيفة و نتبع على تصاور قدامي
بعد سنين نلقى روحي كل طفل يعجبني، نرسمو
و كان ما نرسموش، نحلم بيه و في خيالي يترسم
بعد عامين طارت نفحة الرسم و وليت نكتب
مش على حاجة اما كنت نحس القلم و الحروف فالكتيبة خير مالقلم في الرسم..
نتفكر كنت ديما نكتب حزين
ما نهبط نص كان وراه حكاية، كان ليا كان لحد نعرفو كان لحد تعدى قدامي و اثر فيا ولا اللي هو
الكتيبة، بالنسبة ليا ما كانتش تعبر عليا برك، اما وصلت مرات، و اغلب وقتها، تزيد على ما بيا، كيفاه نحط روحي في بلاصة حد، نذوق وجيعتو، و نزيدها على وجايعي و نكتب بيهم كتاب كان لزم..
قداش وصلني كلام كيما، شنية تسخايل روحك، فاش تكتب
لواه الفضايح، شقام عليك تحكيلنا في حياتك، شدخلنا في مشاكلك
ما ينجم حد يتصور قدر الوجيعة البنينة اللي يتسبب فيها حد كي يقول هكا بكل برود و استهزاء، و اني كومام نكمل نكتب
اما في عوض نكون نكتب بحب و برغبة، نولي نكتب ببرود
و نكتب كان عالبرود، و عالوجايع اللي تركبني
دورتها نكتب عالناس اللي مخيبها
و طفيت الناس اللي محلاها
اما الزح، الناس اللي محلاها، جرد تصاور و ميساجات في موقع افتراضي، ما انجمش نمسهم، ما انجمش نبوسهم كي نحب حضن يعنقني و كتف نبكي عليه
كي نكتب حاجة توجع، ما نتمنى شي، غير كتف نميل عليه و نبكي ولا نقعد ساكتة لين يهرني النوم
الميساجات والكلام اغلب الوقت ما يعملو شي
والله ساعات يزيدو يحسسوني قداه وحدي. .و قداه ما نسوى شي في العلاقات و الصحبة و العشرة
ما نتفكرش ناس قعدت تسأل عليا بهدف يعرفوني شبيني
كلهم يحبو يعرفوك وين وصلت، قداه كبرت فالعمر، شكون حبيت، اش تعمل في دنيتك تو، لا اكثر لا اقل
في فترة من حياتي، مع الكتيبة
وصلت حبيت حد من غير لا ريتو.. لا سمعت صوتو لا مسيت يديه لا شديتو
وصلت حبيتو في كتيبتي، وصلت خليتو في حكايات كتيبتي
و اني كاك كان حبيتك، يا نكتب عليك، يا نهرب منك
اما نقلك نحبك، مضمض..
الحالة وصلت بيا اني نحب نختفي مالوجود، ماعادش نحب نعيش،
كان حد مش يشوف فيا، و مش ملاحظ وجودي اصلا
ربطت وجودي بحد؟ هه، مهبولة و ضعيفة. اي
قولو اللي تحبو، لكن كي تعرف شكون في ظروف صعيبة تتعلق بيه اكثر ماللازم و تولي عاطفية اكثر ماللازم و اقل ظرف تعمل عليه
يروح من بالك قداه من عام و قداه من ليلة عديتهم وحدك و لا من سأل عليك في داركم، شبيك بايتة تبكي ولا شبي ما عندكش اصحاب تخرج معاهم ولا شبيك ماعادش تاكل كي قبل
كان فالدنيا ماك هامة حد، و فالافتراضي لقيت الاهتمام، يولي الخيال خير مالحقيقة..
منعرفش فاش نحكي، اما تو؟
مخي محروق، حرفيا
عندي اسابيع ما نرقدش، برشا كوشمارات
برشا سرحة، شوية دموع و اكثر منهم الكل تخمام
فاش؟
في مستقبلي اول حاجة، في شنية نحب نكمل نقرا ولا نخدم
في وين نحب نعمل الحاجة هاذي، في الحرب اللي باش تقوم كان بابا يسمع بيا نحب نقرا ولا نخدم البرا
عندو الحماية المفرطة و الاهتمام الزائد بينا، يخاف نبعدو عليه
اما كيف توصل تولي خنقة، كيف توصل بلادك تحرمك من احلامك، تخمم تبعد، و لو فترة
تتوحشها و ترجع ميسالش ..
في كتابي اللي نحبو يتنشر السنا قبل عمجاي
في الناس اللي قعدت ما زلت ما خسرتهاش، كيفاه نستحفظ عليهم اكثر و نوريهم نحبهم اكثر
في بدني، تعب من جرتي اكثر واحد السنا، تعبتو اكثر من طاقتو معايا، لازم نتلهى بيه و نستحفظ عاللي قعد صحيح مني..
مخي، قلبي، عقلي، نومي، ماكلتي، تخمامي، قدراتي، كلهم لازم يتنظمو
نحب نرجع نرسم، و نبطل الكتيبة اللي مخليتني عاطفية اكثر ماللازم
نحب نتعلم نحب بالفعل مش بالكلام، و ما نحشمش نقول نحبك كي نحسها بالحق، مش جرد تعلق في لحظات ضعف
نحب نجرب نتحب، نحب ندور الدنيا و نتعلم بااارشا حاجات
الفيسبوك ولا كيف الحبس الصغير اللي فيه بير غارق، كل ما تعوم فيه كل ما تغرق، و نحكي هكا من ناحية منشوراتي و كتيبتي هنا
نكمل نكتب الكتاب اي، اما خواطر و سلام و غيرهم، ما عادش
كان هذا باش يخليني نظهر للناس ضعيفة، ما حاجتيش
صحيح ما يهمنيش كلامهم، اما ما دام وصلت نحس فيه الضعف، فيا مالداخل، اكيد معناها الكتيبة قربت تولي عدو ليا مش متنفس ..
باش نسكرو الكونت، و لو نعرف باش نرجع نعاود نحلو في نهار مالنهارات، خاطر باش نستاحش فيه برشا ناس محلاها هنا، اما لارمني نخرج منو
لازمني نعيش دنيتي، لازمني نتبدل، لازمني نفيق..
نحبكم، لكل اللي نهار تابعو كلماتي من اولها ولا مزالو كي عرفوها
نحبكم، لكل حد نهار قتلو ولا قتلها نحبك، خاطر الكلمة هاكي وحدها اللي كانت تعبر وقتها، مادامنا منجموش نتلاقاو فالدنيا،
يجي نهار، و ندور عليكم واحد واحد و نشوفكم، و نراكم..
نحب نحقق كل شي نحب عليه، و وحدي، من غير لا نستحق لا كتف حد ولا تعاطف حد
وحدي نحب نوصل، و وحدي نحب نعمل و ندير و نحقق
و باش هذا الكل يصير،
لازمني نقعد اكثر
مع روحي،
وحدي.