Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
نزار
Fatma Cherif - فاطمة الشريف
كبر في ساقينا ... حومة كاملة تعرفو ... يحب الناس لكل و الناس لكل تحبو .. أنا وحدة من الناس عييت نشريلو الحلوى من عند عم مختار عطار الحومة ... و قعد يعيطّلي تاتا لين ولّى راجل و خذا الباك .. في باكو فزعت حومة كاملة ... كيما في طهورو بالضبط
..
نزار ناس لكل تحبو على خاطر ما تسمع من فمو كلمة عيب ... هو الي يهز القفة للنساء الكبار .. و يقضيلهم من الخضار .. و هو الي يعاون كل من يستحقو في قضية .. تي حتى كي شرا البسكلات عملها كي التاكسي الجماعي ... نهار كامل مركّب معاه الصغيّرات الي فاتهم وقت المكتب
كبر بين ساقينا ... و فرحنالو في كل فرحة تقول عليه واحد من العايلة ... هو الي يجيب دعاء الخير لامو و بوه .. و كل ما يتجبد في قعدة من قعدات رجال الحومة يرحمو عالجوف الي تخبّط فيها ...
نتفكّر كي خذا الباك و جا ينشد فيا :
"قلي تاتا شنوا نختار .. عاوني راني حترت و دليلي حتار"
قعدنا لوجوه الصباح ساهرين فوق العتبة انا و ولاد كلاسو الي خذاو معاه الباك .. ناس تحسب في السكور و ناس تخمم في البعد و القرب و فلوس البورس "
نزار سكت سكت و من بعد غزر و عينيه تلمع
قال بش نعمل أكاديمي نحمي تونس و نرد بالي عليها .. و زيد مستقبلها مضمون
قتلو اي اما تتعب
قالي نتعب تو و نرتاح من بعد و لكلو على خاطر تونس يهون
و كان العمل هكاكا .. حومة كاملة لمينا معاه دبشو و صبرنا امو الي جاها صعيب الفراق ..
انا وحدة من الناس عييت نعنق فيها ونقوللها تو يتعدى الوقت فيسع و هانا لكنا اولادك ..
تبكي شويا و تعمل عقلها شويا و تسكت
تعدات ليام
روّح نزار من الاكاديمي عروس ... فرحان بالزي .. متبدّل شويا .. تعلّم يقلل الكلام و رزُن و كسب طبيعة الرجال ...
اما باقي نزار الي نحبوه يعاون الناس لكل ..
كرهبتو كي شراها في رمضان عيا يوصّل بيها في حلو العيد متع الجيران للكوشة ..
و كي العادة ما تسمع كان الله يبارك ..
ايامات تعدات كي الحلم و جاني نهار ينشد فيا عالخطبة و العرس .. زغللت عينيا بالدموع . ولدي ولّى راجل و فرحتو قريبة ..
الحومة لكل فزعت في ملاكو ..
شبيك راهي فرحة نزار العزيز علينا ..
____________
منين جا بليس و عيّطت أمو هاك العيطة وقت شقان الفطر ؟
حتى حد ما يعرف .. فزعنا الجيران لكل .. عاري و لابس .. لكلنا نلوّجو في العيطة منين جات ..
قدام باب دار الملازم .. برك بوه في القاع يخبّط على صدرو و يصيح
"قتلو الملازم و فرحو مش لازم "
جرينا لامو نلقاوها مرمية في القاع .. نزار ماعادش هوني بش يعنقها .. و انا كلامي ماعادش يفيّقها ..
مش بش تصدّق الي هي مدة و تتعدى
شنيا مازلت نجم نقوللها .. و العزيز عليها قنصتو يد ما تعرفشي الرحمة .. يد ما تنجمش تكون يد انسان
ولا كي هوما قتلوه لواش قصان الراس لواش ينحيولو دبشو و يخليوه عريان .. لواش الغصّة في قلب امو و هي تحرك في حوسة عرسو ... بين الحنة و العشاء و الكسوة و القفطان ...
العزيز الغالي مش هوني ..
شكون بش يضحك لولاد الحومة و يوصّل الصغيّرات للمكتب ؟
شكون بش يصبّح عالكبير و الصغير التارزي و العطّار و المدّب ؟
شكون بش يوصّل الحلو متع الجيران ؟
نزار ماعادش هوني بش يعمل هاذم الكل ... و بلاصتو فارغة في التصديرة .. نزار حرق قلوبنا عليه بعد ما قلنا قربت فرحتو الكبيرة ..
نحضّرو في رواحنا للصداق .. و حد ما قرا حساب الفراق ..
يجري عالاكاديمي بش يرتاح ... ياخي لا شاف راحة و لا شاف افراح
عطاه ربي على قد قلبو موتة في رمضان و شهادة على صدرو و صدر الوالدين الي كبروه ...
و كان علينا احنا ربي يصبرنا .. و انتوما رد بالكم تنساو السبب الي مات عليه نزار ..
رد بالكم ترخّصو تونس نهار ...
رد بالكم تطيّحولها من قدرها قدام البلدان ..
تونس تعيش ديما الفوق .. عالية .. و أبيّة
الشهيد ماعطاش دمو بلا هدف ... الشهيد خلّى وصيّة
فاطمة الشريف
هذا النص ماذابيكم تسرقوه انا كتبتو بش يتسرق ... أول مرة نحس روحي نكرة قدام الرجال ... و نحس اسمي ما عندو حتى قيمة
Website Design Brisbane
Tags: