الناس كي تبدا تحكي على معاناتها في العيشة في هالبلاد .. ديما تحكي على حاجات من نوع الظروف : الصحية ... التعليمية ... الاقتصادية ... أمور الترونسوبور .. مانيش مسامح .. الزبلة .. نوع  البرامج متع الوطنية كي يبدا فما مظاهرة في الشارع ...  الكار الي تجي مخّر ... العرف البليد ..  كرش راشد الغنوشي الي دزّت بعد الثورة ..

و في قسم المشاكل الأكثر خصوصية نلقاو حاجات من نوع : الروايح في الصيف... صاحبك الي يحبّ على عضّة من كسكروتك و هو مازال كي كلا ... جبّة مرتك المجفّلة فوق السورفاتمون نهارت الغران ميناج .. الشقيقة الي تركبها نهارت السبت في الليل بش ما تطيّبلكش الكريمة ... شخير راجلك بعد ماضي و قتلي يظهرلك انت بش تدخل في دورة النوم العميق ... 

ومعانيات  اخرين كيما هاذم أكلّي من نوع الي نعيشوهم بعد ما نتولدو و لا نكبرو أصلا ...

حد لا يحكي على معاناة كونك تجي للدنيا مرا و في بلاد اسمها تونس ... بون حد بخلاف رؤوف بن يغلان في مثلا ...

مبدئيا الموضوع شائك ... و شائك أكثر من السلك الي يسكّرو بيه قدام الداخلية نهار 14 طبل 2011 ... و قليل من حكا عليه ... يمكن من كثر ما الرجال أنانيين ما يهمهمش فيك كيفاش عايشة .. ومن كثر ما النساء تتمرمد في حياتها  تنسى أصل  حتى بش تشكي من كونها جات للدنيا مرا و في تونس ...

يا جماعة انا ما نراش حاجة تشفعلي عند ربي وقتلي نجي بش نتحاسب و لا بش ندعي  نحب على حاجة أكثر من كوني مرا في تونس .. هاو جاي رمضان ... العشر الأواخر ... هزّو عينيكم و قلو يا ربي ... أنا مرا .. و في تونس ... و تو بقدرة ربي ما تعيّد كان فرحانة ...( فرحانة في تونس أبارامون بش تحققها يلزمك تتمسخ راجل)

نكبة انك تجي مرا في بلاد كي هاذي ... رئيسها الي هو أعلى سلطة في هرم الشيوخ و كذا يقول عليك مالك الا مرا ماهاش نكبة ساهلة  ...  تلاحظها في كل شي من اللي تفيق لين ترقد مالأهم للأقل أهمية هات نبداو بالأهم ... يقول القايل بلاد مازالت كي عملت ثورة و تغيير و جذري بالجوجوبا و كذا ... نحكيو بوليتيك ... عملنا يجي 15 تحوير ؟ عدّ ايدك رؤساء ؟ الوزارات الي يشدوهم النساء ديما وزارات من نوع المرأة و الطفولة و الشبيبة .. الشبيبة و الرياضة و الشطرنج ... الرياضة و الكاري  و الزرّيقة (نحب نقول الصحة ) .. سياحة و فلاحة .. طبخ و جمال ... تفسير أحلام و فوازير  ..ماركة هاكي مرا وزيرة و سكّري فمك .. اشري طرف انسومبلووات و غطّي شعرك في القسم و يعبيولك البيرو بالورد و زيادة عدد في  الاناثي الي في التشكيلة  ...

سي نون مرا و برا تراوزايام شوا ماكش وزيرة ؟  شدّي روضة ... اجبدي شعرك ... عاودي الماش ... تماق وردي في ساقيك بالريش ... سودلي نمري ... مكتوب بالجابوني من تالي ... رولووات في شعرك .. فريرشيّة على ساقيك ... 150 غرام قلوب تركيا مع ال9 متع الليل .. حلّي مسلسل تركي "نوار اللوز" و لا "قلوب العطرشية" و لا "قطوسة السواد و المداد " ... اندبي عالشبوبية متع الممثلين الي تتفرجي فيهم تلفتي لراجلك الفرطاس بكرشو الدازة و هو لابس خلعة قطن و ينحّي في شعر وذنيه بالملقط  .. تنهّدي بعد زوزي تخمدي ارقدي ...
هاذاكا الي ليك ... مادامك مالك الا مرا ...

اه تحبّي عالجو و المغامرات و الشقلوبي ؟

أعملي حمام ... عيّطي لفوزية تنظفلك حالتك .. شادلية تعملّك حكّة ... حكيكة بالطفل و الماء ورد .. كعيبات بردقان ... قازوزة عارقة ... و تخرجي من الحمام تفوّر على كل خد خوخة ...
ماكش متع حمام ؟ اااااااااه مضخمة ؟ اعملي صونا ... صونا مانيكور بيديكور ... ايبيلاسيون .. اكستونسيون فو سيل ... اكسبورتاسيون .. حوايج تركيا ... شانال .. كوكو نوميرو سانك ... فيولات  ... بن عزيزة فلور  دو  ليس ... نحب نشكر

حاسيلو تحبّيه عالضخامة هاوكا مضخم تحبّيه شعبي عام هاوكا شعبي عام المهم هاذاكا الي ليك .. و هاذم اول و اخر حاجات يلزمهم يتبادرو الي ذهنك كي تجي بش تحكي على كيانك ك مرا ... و باقي تهزي عينيك لربي و تعرّي شعرك و تدعي ... خاطرك تبداش دكتورة في علم الذرة و المفاضلات البيولوجية ... تقعد ديما مرا  

دايور شفتش اش قتلك  قبيلي ؟ تعرّي شعرك ؟ كي تتخذّ في مصيبة في تونس شتعمل ؟ تعرّي شعرك .. مجرّد تعرّي شعرك و يكتشف ربي الي انت مرا ... سي بون دعوتك مستجابة ...
مرا مرا مرا ... يا كيدّهم عظيم في النساء .... كان في عينين  الرجاجيل .. خاطر في الحقيقة من الي تتولد و تزعطك امك على الطاولة و انت تعاني في كونك مرا لين تتلحفي و تتكفني و تقصدي ربي الي حيث لا تدري ..

مرا ... كان قريت و نجحت تولّي شتسخايل روحها ... قرايتها بلا راجل ما تسوى شي ... كان عرّست و قصيت عالقراية تولي جاهلة متخلفة الراجل عمرو لا كان ”مثل شهادة تعتزي بها“ .. كان خدمت و تخلص و معمّلة على روحك تولي تسخايل روحها راجل ... و كان قاعدة في الدار يبعثولك ميساج في كونت صراحة متاعك تحلّيه فرحانة تلقاه : لا شيء ينفع المرأة كراتبها الشهري ... يخليوك اكاكا تتهز و تتحطّ ... حاسيلو ديما مش هكاكا و الي عملتو غالط و العكس صحيح ...

وديما كل ما يجبدو عليك  يقولو عليك حاجات من نوع :  مرا ما تعرش تسوق ... بهيمة .. خوّافة ... جبانة ... متع كبّي .. ما تفهمش ... برجك ماهوش العذراء ... عندهم حق كي كانو يدفنوك  حيّة في الجاهلية ... تافهة .. متع تقشقيش حناك ... ما تصلح لشي ... رايك ستحفظ بيه لروحك ..  تتولدي تعرّسي ... تجيبي الصغار  .. تسيّقي الفيراندا  و تموتي تندهي للحياة الاخرى ... يلكّدوك لراجلك هاذاكا متع الخلعة و الملقاط متع قبيلي  و الا كانك مزهارة يخيّروك تحبيش وحيّد اخر تكملي بيه  العيشة الاخرى ...

شقتلي ؟ اه ؟ تحب تحقق شخصيتك ؟ اااااااااااااااه لا علاه ؟ شناقصك بنيّتي ؟؟ شبيك علاه ؟ خليناك بلاش غطا ؟ بايتة جيعانة ؟ لبسناك المقطّع ؟ اه مالاشنوا الي شخصيتك عيش بنتي ؟  علاه شخصيتك شتعمل بيها ؟ ما تعرفيش الي تحب على شخصيتها شيجرالها هوني ؟

شخصيتك ماو تخدم و تصرف على روحك و حالة دار و كذا و ترقية و تقدّ في حياتك و ... ما و هاذاكا ماهو ؟ بهيمة ما تعرش شيستنى فيك ... تعرف الي تخدم في تونس شنوما العصي الي يتحطّو في عجلتها و لا  ؟ نعطيك مثال تافه ياسر و لكنو عميق ..

كي تمشي للخدمة ممكيجة في العالم الكل تتسمى موتيفي ... نافحة .. تحب خدمتك ... زايطة كذا ... كي تمشي لخدمتك في تونس و انت تونسية ممكيجة شنوا معناها ؟

معناها تطيّحي في العرف ... ها تيت ها بنت الحرام تطيّحي في العرف بش يخليك تفصع العشيات و لا بش يرقيك .. و لا تحب على بريم .. تحبّو يخليك تسخن فطورك في البيرو عالريزيستونس و هو ممنوع ... هاذاكا علاه مقطّعة روحك (شو كالمصطلحات عاد مقطعة روحك) و لابستيلو روبة .. تورّي في ساقيك ...  ؟ شتقصد ؟ تحب تترقى أسرع مالعباد اه ؟ برا حسيبك ربي برا يراك متروكة لا حنة لا دربوكة يا مصفارة يا لايثة يا عقرب الحيوط ... ياللي تجي أول عباد تروّح اخر عباد ربي .. تطيّحي في العرف ... ياللي ما تبيتيش الخدمة على بيروك مش كاملة تطيّحي في العرف ... ياللي بيروك منظّم تطيّحي في العرف ... ياللي تكحّلي وقت الفطور تطيّحي في العرف ... ياللي تتنفسي تطيّحي في العرف ...

اخطاك من شخصيتك حكاية فارغة ... تقوم على خاطرها ال6 متع الصباح تجري تتشرّد صيف و شتاء ... يضعاف نظرك ما توصل لشي ... و تزيد تسمع الكلامات و تلصق فيك صفة سعاد فوال ... نسبة الى كولوناتك ... كي قدّر عليك ربي و شادة صحيح بش تسمعي الكلام الدوني خلّيه للمناسبات الاخرى ... انت برجك ماهوش العذراء ماهوش العذراء عاد خلي تسمعي الكلامات في عرس بنت عمتك أرتح ... لخّرة تقول قالوه عباد جهال مش متع خدم و احتراف ...

خاطر كي  بش تمشي لعرس مريقلة و بروبة مزيانة ؟ بش تسمع زادا ... اه مالا ؟ شمعناها ؟ ماشية كوكات ؟ معناها كبرت و ما خذاتش ربي يقوي سعدها المغبونة نشالا السعد خير من السلعة بالله العظيم تقول يحكيو على قاجّو قازوز ...

بش تسمعي الكلام كان تبدي مكرفتة بكلك كي الخيمة متع الكشافة .... مهما تعملي ... اه مالا

عريانة ؟ معرّية للغير ... سافرة بنت حرام تخرج تسهر  ماهاش نظيفة مش متع ماخذة هاملة متع عقابات الليالي ....

متحجّبة ؟ لابسة الشوليقة   تحب تعرّس   ماهوش لربي الايمان في القلب  لغة مضروبة  ...

مهمّلة روحك ؟ عزري ما تفهمش في السافوار فيفر  بقرة ماهاش  إين

لاهية بروحك ؟ فاشن فيكتيم و  باز  مؤخرتها ماهاش مؤخرتها و عينيها لونتي و  حواجبها تاتو و صدرها سيليكون ...

قراية ؟ لبيبة ... تسخايل بش تولي وزيرة  ... ما عندها فين توصل  تو تطيح فوق كتباتها تفصع كرايم رقبتها  

ما أكثرش ماللي كي  يغتصبوك ؟  كي يغتصبوك تولي انت خرجت من دارك مزيانة ... اه شتحبّو يعملّك خارجة محمّرة و تدبّك بالتالون ... عفستلو على قلبو  كاهاو .. و هو سبع البرمبة ... عندو جمعة معدّل عالهوتبورد .. و ما لقاش كيفاش ... خارجة في الغابة يتقزدر ... عرضتو فريسة ... كاهاو طارد المطاردة ... و خذا حقو ... لا شبيك خير من النساء الي اغتصبت عبر السنين انت ؟ و برا اول بلاد الغات الرقّ ... الشطربطق لشكون يقعد ؟ و للا خارجتلو بالتالون ممكيجتلو لابستلو القصير .. مروّحتلو مخرّ

تقوللهم ستناو الساعة ياخي علاه لابستلو ليه الساعة شمدخّل سماه هو ؟ يقلّك اه كاهاو هاذاكا لحّام الحومة ... الكبير ... وساعات فما اجابة اخرى لا تقل اهمية الي هي مالا باش راجل ؟ كان تتعدى  قدامو اكاكا  وما يعمللها شي ؟ ياخي برنامج  أرض الصراع ؟
شوف عاد كان هو راجل بالاغتصاب  احنا باش نساء  ...

احنا  النساء متع تونس  الي ديننا منحي  من الولاد الي ياقفو في راس النهج  في حومتنا ... الي عروفاتنا ... الى الي يركبو معانا   في الميترو و الكار  و  الترينو و كل منهي دابة و تسير عالارض  ... الى زملائنا ... الى عباد ما نعرفوهمش يتعداو بجنبنا في الافونو و لا حتى في نصب الفريب  يقولولنا كلام  شطرو مبغبش ما يتفهمش ... ناكلو على مشومتنا لين نعيفو النهار الي خرجنا فيه ... ماللي لابسة الاصفر الي تولي تاكسي لللي لابسة الاكحل الي تولي ماشية تعزي ... للي متدينة ايجا  ندعيو جميع  في الميضا ... للي عريانة ايجا ندعيو جميع في البواتة ... للسمينة للضعيفة للعفشة ..للمزيانة  للي ما تشبّه لشي ... نطالب الرجال  بش  يراونا فاش نقاسيو كي نخرجو للشارع بروبة ... بجوب ....  بسروال  بشعر ملموم بشعر محلول ... بماكياج بلا ماكياج ...

ايجاو عيشو نهار في بلاصتنا  .... بعد شوفو  كان مازلتو تلومو عالنساء الي ولات  عزرّة مسيّبة في الكياس  .... جرّبو عيشتنا حتى نهار  و شوفو  كان تنجمو  تعيشوها .... احنا  الي مازلنا نساء برغم  هالقرف الكل  ... نورمالمون  رانا نتوّسمو كل يوم  عالمعاناة القزحة الي نعانيوها من نهارت  الي نهبطو نساء في بلاد اسمها تونس  لين يربي يهز متاعو ...

وباقي ما لينا كان نهار واحد في العام  يطيح في السخانة و  العروقات  و شوف نخلطو ناخذوه فيشتا شوف يطيح سبت و لا أحد  ترصيلنا ضاربين سهرية  متع أمينة صرارفي  عاطيتنا بالقفا و باقي نتخمدو نرقدو بكري خاطر  من غدوة بش نقومو نكبوّ طرف الحوايج فوق  بدناتنا و نخرجو نتوّكلو على ربي  بش الرجال  تلقى ما تغتصب ...

جرّبو عيشوها حياة المرا و امشيو بالتالون 4 سوايع و اجبدو شعركم و جرّبو الشوية متع ال.... و الحسّ و الرضاعة و الولادة و اليأس و الأمل و التطيب كل يوم  وحكان الكوجينة وغسلان الشبابك و زربية الجارة الشمطة  مرميّة عالبركون في الطاق الي تحتك و نفضان الثريات و الفرجة عالمسلسلات و نشران الصابون و الألف حاجة مع بعضها فرد يد و معاهم خممّو كل  يوم في الاجابة على سؤال اش بش نلبس غدوة ... بعد ايجاو نحكيو  على شكون فينا الي مالو الا .... مثلا