فيما يخص القبلة الشهيرة متع عرايس مازالو فرحانين بكتبان الصداق ... خليونا نهرّو مع بعضنا شويا ...

ياخي علاه نقبلو الحاجة تتعمل بخمج في التراكن و ما نقبلوهاش كي تتعمل بفيانة و على الملأ ؟ منين جات الفكرة هاذي ؟

منين ولى الراجل ما لازموش يبوس مرتو قدام الناس اما يشد يفتقها من بعضها قدام الناس عادي عالاخر .. ؟ منين جات حكاية الي ما يقلهاش نحبك قدام الناس اما يقلها بوك و بو الطايفة متع بوك قدام الناس بكل أريحية ؟

كيفاه ولينا نمشيو معرسين في الشارع تقول زوز ولاد بجنب بعضنا ؟ الي يمس لاخر حتى في غلطة و لا شقان كياس يطلب السماح ؟

كيفاه ولى الراجل مقيّد مرتو في تليفونو : الداخلية .. ام الفروخ ... المرا .. الموجيرة ؟

كيفاه خلطنا للمرحلة هاذي ؟

عزيزي ومماتي عندهم تصويرة بجنب بعضهم تفتق تفتق تفتق .. 50 سنة لتالي ماكانوش حاشمين بالعشرة كي توا ...

توا كي تقول لراجل اقرب لمرتك و لا بوسها خليني نصوّركم يقلك لحظة الباب يدق هاو راجع .. و يغبر ما يرجعش بش ما يقربش لمرتو قدام الناس

كيفاه ولينا هكا احنا كيفاه ؟

العباد قريب تكفر خاطر راجل باس مرتو ... ومش خاطر مكروه او حرام مثلا قدام الناس , اما خاطر عيب ..

شكون الي كبّرو هالعيب الي ولّى كي الغول قريب ياكللنا روسنا ؟ شكون الي فرعنو هكا ؟

فرعنتو عبارة "يزي تو الناس يقولو " ...

الناس ... العباد .. المجتمع ... الجيران ... الاخر

و هو هالاخر المعفّن ولد الكلب عادي كي يرمي الزبلة في الشارع .. و كي يكذب .. و كي يتفتق في علوش في العشاء و جارو بايت للشر ... و كي ولادو متربين ياكلو في بعضهم اما المهم قدام الناس يعملو سلفي يضحكو و معنقين بعضهم ... وكي وكي و كي ... المهم قدام الناس سورية محددة و اكتاف مطلوقة و مشية بالقرطبون ...

هالاخر الي تخاف يقول عليك "طحان" خاطر بُست مرتك قدامو .. هو بيدو يبوس .. اما يبوس صاحبتو الي مصوحبها على مرتو جوست خاطر ما ينجمش يبوس مرتو في البواتات ف صوحب عليها بش ينجم يبوس على الملأ ..ويقعد باقي ينظّر على سماك ...

كيفاه ولينا هكا ؟ بالنفاق

اما لوين ماشين بهكا ؟ ما نعرش جوست تفكّروا الي نسب الطلاق في تونس من اعلى النسب في الدول الكربية ...

على حكايات كيما هكا متع "ملا طحان يبوس في مرتو في الشارع"

فوالا وشكرا على المتابعة