Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
كليشهات الدراما التونسية
Fatma Cherif - فاطمة الشريف
صحة شريبتكم ... نحكيو اليوم على حاجة ندّعي انها في دوماني (السينما و التلفزة) الي كل عام في هالوقيّت نحلف بش نتبرّى منو ... و لكن فيسع ما يحرقني عليه الحليب و نرجع الكليشهات في السينما و التفلزة موجودين في العالم الكل اما عند التوانسة الشي قوي شويا على ما قدرة استيعاب العقل البشري و مش فاهمة هوما بهالل ولا يتبهللو علينا
ما نطوّلش عليكم .. في كل مسلسل تونسي .. أي طفل يولّي يصلّي راهو بعد حلقتين ماكسيموم بش يولّي سلفي .. و يُقصد بالسلفي ذلك الشخص الذي لا ينظر الا و هو يتشوحر و لا يضحك أبدا و يقضي وقتو في مراقبة العروض الفنية و الصفحات الفيسبوكية و اللهوة بخلق ربي
أي طفلة تفوت الثمانية متع الليل البرا من دارهم راهي بش تُغتصب بعد حلقتين و نص أو في أسوأ الحالات بعد تلاثة حلقات .. و الطفلة الي تسهر البرّا هي طفلة تلبس جوب ميني و تنجم كان تلحلح بيها شويا تعمل كعبات معاك ... القوة وين الي هي بعد الاغتصاب ديراكت تتوب و تولي تمشي الحيط الحيط .. و عادة تتعرف على ولد الحلال طاف طاف يعرّسو الخميس الجاي ...
كل مرا تكساب كرهبة راهي بالضروة تستعملها في حاجتين : يا اما بش تخرج تسهر بيها يا اما بش تستعملها في التنقل للذهاب الي صاحبها (و هوني نحب نفكركم الي كل وحدة مصوحبة راهي تندرج ضمن نوعين : يا اما مصوحبة على راجلها .. يا اما صاحبها بش يغتصبها بعد حلقتين )
كل راجل يكساب كرهبة راهو عاملها بش يتبع بيها مرتو الي مصوحبة عليه و لابش يمشي يقابل بيها صاحبتو الي مصوحبها على مرتو
تسليم السلاح يتم في الخلا بعد ما تغمز الكراهب لبعضها بالاضواء
مراكز الشرطة لكل مسيّقين منظفين مبيّضين جدد تقول بش يركزو فيهم وطيّة عروسة
كل زوز نساء يتعاركو على راجل يتعاركو في الشارع على مرأى و مسمع من الجميع
كل واحد يحب على مرا و تطفيه يولّي يبيع في السلاح
و الي يقلق زادا يبيع السلاح
محامي العيلة هو بيدو صاحب الزوجة هو بيدو منقذ المغتصبة هو بيدو العروس
الطفلة ينجم يعرضها بوها يطلب اما المغتصبة تمشي بجنب الي اغتصبها و ماتراهش
لذا و وقاية لأنفسكم العزيزة من هالمشاكل هاذي لكل نحب ننصحكم شويا نصايح
كل راجل عندو محامي و مرتو صغيرة ماذابيه ما يعرفهاش عليه
كل طفلة تخرج تسهر ماذابيها تسجّل روحها من وقت الي تخرج لين ترجع هكاكا كان اغتصبها حد تتعرف عليه بسهولة فيما بعد
كل واحد يولّي يصلّي نحاولو نرجعوه للطريق المستقيم(يسكر) خاطر الصلاة في جرتها كان السلفية
يمكن التخلص من القلق بالاغتصاب في اوقات الفراغ ... هكاكا نتفاداو بيع السلاح
و يمكن تفادي شبكة المخابرات الي عاملينها الازواج لبعضهم بالتخلّي عن الكراهب و السير على الاقدام هكاكا كل راجل يتبع
مرتو بش يشوف شكون صاحبها يتعب في شطر الثنيّة و يروّح لدارو
فاطمة الشريف : متخرجة من كلية الآداب و الفنون و الانسانيات بمنوبة : شعبة سينما و تقنيات تلفزية الي ما كارنيش قريتها بش ما نتجلطش كل رمضان
Website Design Brisbane
Tags: