كنت ديما نتمناك تتكلّم ... من اللحظة الأولى الي وحلت أنا فيك .. من وقت الي تدعثرت فيك و روّحت نجري لبيتي سكرت على روحي و على فرشي ترميت و قعدت نخمم اش جرالي ..

من وقت الي حلمت نقلّك و من وقت الي قتلك الي انت زعزتني كي الأكسيدون  القوي الي يصيب بنادم  .. و أنا نستنى فيك تتكلّم ...

سنين ربي نستنى .. سنين ربي قاعدة على كل كل كرسي تنجّم تستناك عليه مرا ..

بدّلت ياما ألوان شعري و على خاطرك قتلت طفل صغير و كوّنت مرا .. بمشيتها و تزعبينها و زينها و عينها .. و بكحُل في العين سايل .. و بشفر مايل ..

عملت الي انجّم و عملت أكثر من الي انجّم وانت ؟

سنين ربي و انت ساكت

تعرف ؟

أكبر مشكلة عندي معاك هي سكاتك وقتلي أنا نحبك تتكلم ..

من طول عمري نقول ماصاب جا يحكي فاش يخمم تو .. كان جا يحكي .. راني ما نحاولش نخمم .. و ما نخممش ياسر .. ونوصل ساعات لنتيجة صحيحة و اكثر الساعات لنتيجة غالطة ..تتسبب في الف مشكلة معاك .. و تتسبب من بعد في سكات اكبر

كنت عمري لكل نحلم براجل يكتب .. و كان ما يكتبش يتكلّم ..

لين حبيتك وأنا نحلم .. و لتوا نحلم .. و لو كان مش دقايق حديثك متع الكلمة و قص .. راني متت

كل الي عملتو معاك عملتو بمحبة مرا عاشقة فيك .. و عملتو بش نسمعك تتكلّم

التفاصيل الصغيرة الي ما كنتش تراها .. كل حاجة بسيطة تعملت تمنيتك تعلّق عليها .. حتى بشويا كلام .. و كل ما كنت نتمناك تتكلّم كنت تسكت أكثر

كيفاش نجمت نقعد نحبك و انت ساكت ؟ حتى منطق لا يفسّر هالشي الي صار

ساكت .. بين اوراقك و جرايدك و تلفزتك و مشاكلك و مستقبلك و امورك .. وانا قدامك نخلق في أكثر من تبربيشة بش انّطقك .. عمرك انت لا نطقت

وعمري لا تهنيت معاك

انا المرا الي ما كان عندي كان مذهب واحد .. انك تحكي و تتحرّك و تعبّر و كان لزم تاخو حقك بيديك

وانت الراجل الي عمرك لكل تمّن كان بأمثال من نوع الصوف يتباع بالرزانة .. و اليد الطويلة تستاهل القصان .. و كنت تنجم تقص يد طويلة عيات تعنّق فيك

المهم ما تتعبكش بكلمة "اتكلّم"  ..

المهم تخليك تعبّر بحاجات اخرى

كنت نتمناك تتكلّم و انا نبكي قدامك و كنت نعشق انك تتكلم  كي نجيك  بشفة مقلوبة نقلك : اغزر جرحت يدي

و كي ندور تلاثة اربعة دورات في الهواء بش نوريك روبة جديدة .. و كي نصبغ ظوافري بلون التوت .. كنت نتمناك تتكلم و كنت نبات نخمم فيك ..

حبيتك تنطق .. كي نمرض .. و كي نغبر .. و كي ما فما حتى شي ..

كنت ديما نحلم بيك قاعد تحكي .. انت الي عمرك لا حكيت ..

لفتاتك ليا .. و غزرتك الحنينة .. و يدي الي تبوسها كي نمدهالك بش تشوف الجرح من غير ما تقلي سمالله عليك

حتى صبرك عليا سنين ماكانش يغنيني على سكاتك .. و قعدت عمري لكل نتمناك تتكلم ..

انت الي بعمرك لا كتبت لمرا تحبك .. نقصت الاف الحاجات عندي في جرّة جواياتك الي ما قريتهمش ..

كنت تعوّضني سنين الحرمان كان جيتت تتكلم

اتكلّم

آش فايدة في لكلام إلي ما يبوح والسكات وحدو إلي يرجع الروح وأنا تخاويت معاه وتعاشرنا والصوت بطوال الوقت صار مبحوح من هاك الوقت وأنا نتبع فيك من بعيد لبعيد نتعشق فيك في قالب حلمة نغزرلك وساعة ساعة من غير ما نشعر نرميلك كلمة , على طراطش صوتها ما تتسمعش تفرهد شوية أما تشفعش ما نجمتش نحكيلك وأنا بيدي مانيش ضامن روحي نحكيلها عليك ما نجمتش نحكيلك وأنا نمني في روحي نغزرلك تتكعبر قدامي تبدل في الخطوة بش تجيني وأنا نستنى فيك شي غلبتني الشهوة الساكتة المشحرة بالتنهيدة وإنت تعرف ماهيش حاجة جديدة كل ليلة نتكى ونغزر للسماء والڨمرة بلحافها تغطيني نوصيها تطل عليك وتجي عليك تهنيني نرمي كلامي لكل على ندوة المطرة فماش ما توصلك وتقلك كي تخطفك على غرادة تغسلك وتبلك

أخطانا من كلام اللعب وخلينا في حلاوة لكلام : لكلام يا لِلاَّ أحلى كي يبدى حشام وسكوتي ، كي تفهم شفما في مكنوني وتتشهى تسمع صوتي صوتي إلي ياما غطاك بهواه بالنفس السخون المزروع في قفاه وإنت بين نومين مرندفتني على حرف لبحر في منامة في عز النهار صوتي إلي تسمع فيه يدندن معاك في غنايا تحبها حفظناها ملي كنا غشاشر صغار سيب علينا : كلامي نوارة مسمية حاشمة تمد عروفها والعين شايفة تلم في السر والسر مكنون مخبي وكلمتو خايفة كلامي مش ليا ...كلامي ديما مخليها بيا ...
خليني نتعلم نحكيلي ومبعد نحكيلك خليني نعلمك لحديث بالومية نعلمك كيفاش ما تطيحش في عوض المرة ألف من غمزة تترمى ميات رمية وبيناتنا آش تحبني نقلك وأنا والهدرة ولينا ضراير وكلامي عرفو شاب وصوتي بلا هدرة نبشطرها معاك ولى باير

تبعني نكتبلك كلام بلاش حس نعرفك وحدك وحدك بيه تحس وكيما قال باب الهادي : تبعنيو نبنيو الدنيا زينة ... وما تزهى كان بينا : كلمة منك وتمهميهة مني وإلما تحل التشنشينة : تشنشينة السكات إلي شربت على قلبك وكلات

آش تحب تعمل ما نحبش قدامك نتكشف وما نحبش الجاش إلي رايدك على شفرك يرف : تي يزي فك عف نعرف روحي ماسط لاسط ما تسمع مني كان صباح الخير وليلتك زينة حاسط باسط

وتتنبز وحواجبك تتعقد وتسبني بالمقلوب وإنتي تعرف تقرى شفما في قلبي مكتوب

نكلمك على روحي ولا نخليها مشنڨلة فيك وفي جواجيك ؟

حتى كلمة نحبك نحبها في وذنك تصيح وتتقال معاها موال فماش ما نرتاح ويركح البال : ما عندي ما نخبي عليك : أنا إلي بعمري ما قلتك نحبك ونحب نحبك ونحب لساني يتكلم ولكنيني يقربك

وكان لكلام فضة وديامنت وذهب السكات عمرو لا تعب وطول عمرو يقعد يحب

بيري غارق ماكيفو حتى بير أقراني نتكلم وخليني ساكت خير