والليلة نكتبلك بش نفرّغ حمل من على كتافي ... و بعمري لا تخيّلت يجي نهار نكتبلك بش نقلّك نتفارقو ..

في الاخر بالكل يظهرلي ما عنديش زهر معاك انت بالذات

و العيب مش فيك .. و العيب مش فيا

اما الكوبل متاعنا تولد ميّت .. بيناتنا عقم .. بيناتنا حلقة فارغة .. لا تنجّم انت تعبيها .. لا نجّم انا نسكت عليها و هي فارغة ..

تعرف ؟ ما أصعبش مالفراق

ناس لكل تعرف تبدا حكايات .. وحد فينا لا يعرف يوفاها ..  في كل انسان تركينة ظلام .. نقطة ضعف .. خوف ..

حمل كبير يتبّع سنين و  سنين

في الأوّل تطلعلو كعبورة صغيرة .. والكعبورة تكبر و تولّي حدبة و الحدبة تكبر لين يجي نهار و تقتلو

و هذا لكل بش ما يتوجعش شويا مالأوّل و يقص الوجيعة الاولى قبل ما تكبر ..

مشكلة العباد انها تهز المشكلة بعروقها معاها في السنين الي يعيشوها لكل .. و لوكان جاو يعرفو راهم يقصّو مشاكلهم بعروقها من قبل ما تزيد العروق ترمي عروق

انا نكتبلك اليوم بش نقلّك يزي خلينا نخنتبو نهاية لهالحكاية الي ما حبتش توفى ..

نعرفك بش تستغرب خاطر ما صار شي يبرر اني نكتبلك حاجة في اتجاه الوداع بعد الشي الي صار بيناتنا اليوم .. اما ميسالش انا هكا تعلّمت نسيّب الحاجات من يدي في طمبكها .. في طمبك زينها و عينها .. في طمبك حاجتها ليا و في طمبك حاجتي ليها ..

كي تجي تشوف كارو الشي هذا صار مالاول بالكل .. من نهارت الي حكينا ولقينا بيناتنا الف باب مسكّر

نعمبوهم البدايات محلاهم .. قداش يجنّحو ب بنادم .. العبد يولي كي سبايدر مان .. ينجّم يطفي الضو على كل شي .. ينجّم يوفّر كل شي .. ينجّم يعمل كل شي .. وقتها ينجّم يلقّي صدرو و ياخو كرطوشة في بلاصتك .. و من بعد يندم عالنهار الي عرفك فيه

نعرفك ما تحبنيش نحكي عالندم اما ميسالش تحمّلني ... ما فماش حاجة ندمت عليها في حياتي قد معرفتي فيك .. ما كنتش مطلوبة جملة بش يصير فيا الي صار .. كنت نجّم نكون مرا عادية ناكل و نشرب و نصبغ شعري و نلبس من حوانت تكلاسي اللبسة بالالوان

كنت نجّم نكون مرا ترضى بالتمرميد .. و ما يقلقهاش كي تسربيلها صحن محبّة بارد بعد ما هي بفمها تقلّك جعت

ونورمال في سبرها تجيك تركع عند ساقيك و تقلّك حبّني

و ترضى لروحها تشدّ اخر الصف بعد حاجات اخرين كان جا عندك شويا مخ عمرك لا تحطهم قبلها

مش أنا المرا الي تنجّم تلعب دور مخدة تستنى فيك تروّح .. رهينة في تركينة

و ما نحبّش الظل .. و ما نحبش الظلام .. وما نحب كان الشمس .. وما نحب كان الضو مع انو يحرقني

و خياراتي ما نخبيهمش برغم ما يوالمونيش ..

كي نحب نتحدى و  على هاذاكا ماناش كيف كيف

و ينعمبو حكاية الي الاختلاف مطلوب في المحبة

شكون البهيم الي طلع بيها هاذي ؟

أغزر اش جرى فينا من تالا انك تشرب اكسبراس و انا نشرب ديراكت

أغزر اخرة تعب السنين .. الي ما تعرف عليه شي ..

اش تفهم انت في التعب .. في المستنية .. في القلب المتحيّر عقابات الليالي ؟ اش فهمك في مرا تبات فايقة تخمم عليك ؟

منين بش تحسّ ؟

وانت كيفك كي هالخلق الي يدور لكل .. في مخك صندوق مطلّع عند نجار الشعب ..

اش معرّفك في الهبلة متع مرا تحب تجيك نص الليل تاكل بحذاك الفراز ؟ في المشي عالثلج ؟ في المشي حافي عالحجر ؟ في الورد الملفوف في جريدة ؟ في كلمة رؤوف بن عمر كي يقول ضو بعيد جاي مالايام السعيدة ؟ منين بش تعرف اش تحكي سعاد ماسي في غناها ؟ اش يقصد زياد كي يقول عايشة وحدا بلاك و مش فارق معها حلاك ؟

ماكش بش تفهم و على خاطرك قليل فهم ماعادش مفسرتلك .. أصلا نعرفك ماعادش حتى تحب تسمع كلام كان سمعتو مرة وحدة بقلبك راني ما تلزيتش نعاودو

نكتبلك الليلة بش نقلّك ماعادش عنا شي يشدّنا لبعضنا .. نوفاو هنا بالك نعلّمو غيرنا كيفاش يوفاو و هوما في طمبك اللمعة وبعد أزين تعنيقة ينجّم يعنقها راجل لمرا .. بين فضا و هوى

في الاخر ما نحبش نقول كلام يقولوه ناس لكل للناس الكل في الحالات الي كيما هكا

نحب نقلّك الي انت تكسب أزين غزرة كسبها راجل برغم عينيك مش مزيانين

والي انا حبيتك .. فنيت عليك الجهد و العمر سنين سنين ..

حبيتك و رعشت عليك .. و صدّق و لا لا جعلتك بش تصدّق

حتى كان ما صدقتش ماعاد شي بش يتبدّل

انا تمنيتك حلمة هابطة من عالم اخر و انت انسان ساقيك عمرهم لا سيّبو القاع ..

خلّيه قلبك ليك .. وخليلي القلب الي قتلت

بقلم فاطمة الشريف