Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
قلبي و "أنا"
Fatma Cherif - فاطمة الشريف
كايني ما عملت شي ... متشعبطة في بقيةذكريات ... هوما يطيّحوني و أنا نرجعلهم ... مكبّشة فيهم بيديا و سينيا و عروقي... ما نحبش نفارقهم برغم الي نبزوني أكثر مني مرة و مرمدوني ... اما انا ما نشعفش...
لميتهم هاك النهارفي شمينيّة و حرقتهم ... تبننت النار الي تاكللهم في قلوبهم ... ضحكت و بكيت ... هستيريا... و وجيعة ... مازوشية و سادية ... جوّ ... منظر النار فرهدني ... شخت عليهم ...دفاتني النار ... و قلت رتحت ... و حسيت الراحة ... حليت القجر من غدوة الصباح لقيت الي حرقتو لكل رجع لبلاصتو كايني ما عملت شي
بلوكيتك ...سينياليتك ... سبيتك في قلبي آلاف المرات ... قلت كلب و واطي و ما جا شي ... و قلتما يسواش ... و دعيت عليك ... حتحتك بالدعاء ... عزوزة و شدت سارق ... نطرلها قلبها و هي تتطلفح في الكياس
...
حليت الأورديناتور من غدوة ... تفقدت بروفيلك أول واحد ... و شديت روحي متلبسة بالفرجة في تصاورك و سمعان موزيكتك ...
شديت ساقي على كل قهوة دخلتلها معاك ... على كل شارع عفستو يدي في يدك ... كان حتى في المنام ماعادش ندور بهاك البلايص ... كرهت ماكلتك الي تحبها و الألوان الي تحبهم ... و كرهت أفلامك و مسلسلاتك ... و كرهت حديثك و طريقة كلامك .... كرهت شعرك و عينيك ... كرهت البلايص الي تحبهم ...كرهت يديك ... كرهت منظرك
...
اما قعدت فيا صنعة الرجوع ليك كي الغشّير كل ما نحس روحي حزينة ... نمشي لتراكنك نتفرهد ...
حبيتك أي ... اما كلما ننشد روحي نقول لا نزوة ... حكاية فارغة و علاقة عابرة ... الحقيقة ما تعرفها كان الطفلة الي قاعدة في وسطي و انت و ربي ... أما "أنا" ما تحبّش تستعرف و ما تحبّش تقرّ ... ديما هكا ال"أنا" محشمتني و ناكرة في أصلها و في الشي الي تحس فيه ... حتى قلبي ياكل من عندها في السطاكة و ساكت ...
قلبي كانو راجل لازمو يعمل ثورة عالظلم ...
نستاحشك ... بين الدقيقة و الدقيقة ... نموت بالوحش ... اما كي تطلبني ما نهزّش عليك ... مش قلبي الي ما يهزّش ... أما ال"أنا" ما تخليهش يهز ... بش كي انت تنقّص الطلبان و تلقى آبال اون ابسونس ... تشيخ و تولّي تمشي عليه بأكتافها و تقلّو شفتني مقواني ... مانخلّي شي يخليني نقاسي و نعاني ... ما يحكم فيا حد ... و أنا أقوى من كل شي
...
ترقد "أنا" بعد ما توسّم لروحها وسام القوّة الكلية ... و يرقد قلبي يغفّص في دموعو ...
"أنا"
كل يوم تاقف لقلبي تستخسخو و تمسح بيه القاع ... مسيكن تمرمد مع "أنا" ... يجي بش يتكلّم تلفّو بكف ... ظالمة و قوية مايكبر في عينها حتى حد ... قلبي يسخّف ما يجاوبهاش ... كي الشعب الي ستانس بالحاكم يكوّر بيه ... و عمرو ما عطاه قدرو ...
قلبي كل ليلة يحط الشي الي قعدلو من ريحتك و يرقد يبكي ... يحبك برشا و ماذابيه كان "أنا"تخليلو الفضا بش يحكي ...
أما "أنا"كل يوم تفيّقو على قوة عجيبة ... و تنسيه في الي بكاه البارح ...
و يبدالي نهار جديد و كاينّي ما عملت شي
فاطمة الشريف
Website Design Brisbane
Tags: