و فيبالك اللي آني بردت عليك!

تي من غير حتى ما توصل تكون ليا أصل!

و لا آني نكون ليك..

تصاورك قداه كانت تخلي حاجة في قلبي ترعش

ضحكتك قداش كانت تدخلني و تخرجني في الحلة

و صوتك! اللي غير مالتاليفون ما كنتش نعرفو ع حقيقتو فالدنيا

اش كان يذوبني!

اش كنت نحبها! تفاصيلك اللي انت نفسك ما كنتش تشوفها في روحك

كنت مستحق حد كيفي يجي يفيقك عليها، على حلاوة طبيعتك و بنة صوتك و حنية ضحكتك و دفاها و عشق يديك و خطوطها اللي تطيرني في سماها

ما تستغربش مني نوصفك هكا و اني ما عمري لا ريتك في الحقيقة

ما تستغربش من قلب مال ليك رغم بعدك، ما تقولش شبيها هاذي، كيفاه عرفتني اش نحب و اش نكره من مرة برك حكيت معاها

ذاكرتي صورية، و صوتية زادة، كل كلمة تقولهالي في وذنيا تتنقش، كل تصويرة ليك بعثتهالي في مخي تتقيد،. تتحب تتعشق و تولي ادمان عليك زاد بطول المدة، اما جا النهار اللي

فيه قلت، لازم نحط حد ليه، كي الطفل الصغير اللي اذا استانس بماكلة الحلوة تجيه فترة يقصوها عليه والديه باش سنيه اللي مازالت ما سوستش ما توصلش تسوس زادة، كيف اللي يتكيف و مشات رية من رواريه ديجا في سواد الدخان، وقالو طبيبو ريتك الثانية مازالت مخليتك باقي عايش كان باش تزيدها شوية برك دخان تكمل تلحق على أختها و راك باش توصل روحك للهاوية

هكاك قلت ل روحي، تصاورك لازمها تتفسخ من مخي قبل تاليفوني

صوتك لازم يشيح من وذاني، عينيك لازم معادش نشوفهم كل ما نرمش بعيوني، يزيني

لازم نفيق، و نعيش و نستوعب حقيقة انك خيال، انك حتى كان نهار وصلت كنت حقيقة، مستحيل توصل تكون ليا ولا انا ليك

اخطاني، فكني، اخرج مني، اعتقني!

بطبيعتو برودك كافي باش نجبد روحي منك، باش نقرقش قلبي اش لصق في قلبك هالكازي م يفهمش روحو

انا عالأقل لازم نفهم روحي، و عليك نبعد

لازمني ننسى حقيقة انك تنجم تكون مش موجود أصلا، و روحي منك نجبد

تي ابعد! سيب عاد..

لازمني ننساك، أولها تصاورك، آخرها صوتك، عينيك

تي اووه عاد ما ترجعنيش للأول

مش لازم نسمي اش باش نحاول انسي روحي

تو نرجع نتفكر..

تتفكر انت عليا حتى حاجة برك زعمة..؟

لا علينا.. قررت ننسى

و قراري آخر قرار، و لو انو ماشي و يمرار

أما ميسالش،مبعد قلبي تو يجيه نهار و يشكرني..

مش تو مش غدوة، نهار و برا..

تو يجيني نهار زادة، و يبوسني قلبك و يقلي أحسن كي جبدت قلبك مني

تي أحسن ما عملت!

هكا خير.

و توا نخليك

نبقيك بخير ..