و كنت عارفة روحي

باش ندور ندور ندور

و نرجع نتخبى

و نكنّ راسي بين السطور

بين شطوط كلماتي و البحور

البحور اللي هالأيامات، غرقتني أكثر ماللي نجاتني

هالمخ اللي في راسي

شاط،. تحرق،.فاحت ريحتو مالتخمام

عبات بيتي و سودت حيوطها الدايرة بيا

و الطايرة فوقي كي سراب حمام

و.. و خنقتني .

خنقتني حتى قتلتني.

برشا غش على برشة حيرة على شوية بكى

بطبيعتها الدموع مقعدش منها برشا

قريب تشيح

و دقات هالقلب مقعدلهاش برشا زادة

شوية و تتطفى

غير عشت هالدنيا بروح و ضحكة مالجواجي

و ما استحقيتش منها كل هالوجايع

لي كل ليلة فيا تلاجي

كل ليلة، نقول مش باش نبكي و خليني قوية

تي كون راجل مش جرد بنية

خليك حية..

و أصلا كان فنيت باش تلقى شكون يتوحشك؟

يا ذنوبي و يا ذنوبك يا البنية..

الدنيا لفعة حية

تلسعك و تخليك ف سمها تتفرفط

و منا ولا منا باش تاكلك نَيّة

باش تبعثلك بررشا نااس

منهم الباهي منهم الخايب و منهم اللي بين بينين بهناس

منهم اللي باش يمشي و منهم اللي باش يبقى شوية

و مبعد أكيد باش يمشي

بطبيعتو لازم يفضى الكاس

شنوة؟ كنت تستخايل فما شكون باش يقعد ع خاطرك..؟

هههه، يا طفلة قداكشي نِيّة

ارجع لبيتك، و ارمي روحك فوق فرشك كي كدس العزى كي عادتك

و انحب سعدك و قول نحب نموت ميسالش، أما متعلق روحك ب حد

تخيل جا شكون معاك، تفكر كي كنت عندك اصحاب و احباب، تفكر اش عملو فيك و اش عملت فيهم. .

عاد خليك كي عوايدك وحيدة،

و لا تتشكى من خيانة و لا ناس تطفي فيك كي عرف وقيدة

اخطاك، ليك قلمك ولا ستيلوك، و اك الكارني المهري بشوية الأوراق اللي فيه..اكتب فوقو لي كتب من ربي، لين يفنى هو بيدو و يخليك

فاللخر باش تقعدلك كان روحك

و ظوافرك اللي كليتهم ليلة ورا ليلة بالغش

يجي نهار و يطوالو، و ما يندبولك كان هوما عزيّزة

يا عزّااز.. قداكش تبكّي الحجر

نتمنى جيت انجم انعنقك و نقلك اللطف عليك، اسم الله على قلبك و روحك لي معاد تشبه ل شي.. خسارة ضوك لي كان شاعل. .فيسع فيسع، طفى..

خسارة عيونك،..خسارة صوتك اللي قبل وقتو سكت و هفت.. و غفى

خسارة دميعات شاحت من شوية برد بعد ما كانت تبكي خاطرها تحب ع شوية دفى..

خسااارة ي عزّاز.. خسارة.

هاي غمض عويناتك، ايجا عندي نهزك الفوق، يزي ما وطاوك اقل من قيمتك و انتي قيمتك عالية ل سابع سمى

هاي ايجا لهنى ،.

يزي برك بلا بكى. .