قداش حاجتي فيها العسل

و قداش كل ما تحلى في عيني حاجة

يجي شكون و يلحسهالي الكل..

الحكاية بدات أول مرة، كي شريت تروس أدوات، مزيان كان محلاه و معزو، نتفكر وقت جابتهولي خالتي مخصوص من عند صاحبتها تبيع فيهم قداه كانت نافحة بيا و انا نافحة بيه، عبيتو بالأدوات و الستيلوات الملونة لين اك التروس قريب يقول باع، و دخلت بيا خالتي للمدرسة على اكتافها أول نهار مدرسة، سنة أولى، و لتو نتفكر فرحتي و فرحتها هاك النهار،.اما هاك النهار من بعدو منتفكرش برشا حاجات، نهارتها طفلة قالتلي محلاه تروسك اول ما شافتني مديتو عالطاولة قدامنا، قلتلها عيشك كان تحب نقول لخالتي تجيبلك منو عندها صاحبتها عندها منو برشا، و بالوقت العشية جبتلها واحد على ما كنت نافحة نفرحها بيه و نعمل أصحاب جدد أول عام.

خرجنا بعد المدرسة و نشوف فيها تجري للفستيار تبكي، ما لحقتش عليها الحق خاطر أمي كانت تقلي باش منبطاش في المرواح، رغم اللي دارنا بجنب المدرسة.. ربع ساعة و ينوقز باب دارنا. .الطفلة اللي جبتلها مالتروس كيما اللي عندي، واقفة قدامنا انا و امي و بجنبها مرا، الطفلة تبكي و تنوح و المرا تصيح و تقول لأمي بنتك هزت تروس بنتي، بنتي مزالت ك شراتو و فرحانة بيه علاه هكا، و امي مش مصدقة و انا مبهمة لساني تبلع و عينيا مدمعة قدام عينين المرا و غزرات بنتها، و مش مصدقة شي ماللي صار ربع ساعة بعد ما روحت، اخر الحكاية يطلع فما شكون شاف التروس اللي جبتهولها، هزو من ساكها، و هي كي ما لقاتوش، دارت عليا بحكم نفس التروس، و ف درجين جابت أمها و كانت قدام الدار..

الحكاية هاذي مهما كبرت مننساهاش، منعرفش علاش اما مهما نحاول ننساها منجمش،. و من وقتها امي ديما تقلي حاجتك فيها العسل..

تزيد السنين و ندخل الكولاج، جو جديد و بروفات و ناس قرّاية و كلاس صعيب، ما قرب العام يوفى كان جيت مرتبتي الثالثة، و انا هابلة على هاك الحفلة متاع اخر العام و باش ناخذ الجايزة الثالثة، بحكم سنين المدرسة الكل مجربتش احساس جايزة و كذا.

التريمستر اللخرى، تجيني طفلة كانت تكرهني، و تقعد ديما ورايا، فهمتش اش عندي ماعندهاش، و بالرغم من هكا باش تموت مالغيرة مني رغم هي كانت ازين و كذا، و كانت ڨوشيار..يعني تكتب باليسار، تطبس عليا مرة و احنا مازلنا ك دخلنا للكلاس و البروفة مزالت مجاتش، و تقلي، ريت علاه انا احسن منك، خاطرني نكتب باليسار،. هي مشات و انا طرشقت بالضحك انا و صاحبتي بجنبي، منزيدش عليكم برشا، جمعة و نتكسر في ايدي اليمين، غبت جمعات، و ك رجعت نقرا، نكتب باليسار بالسيف، و عديت شوية دفوارات ماللي لحقت عليهم خاطر فما اللي فاتوني، و يوفى العام و تطير هاك الجايزة من بين يديا..

نوصلو لليسي، ها الطفل اللي قاري معايا من اول الدهر، و مضروبة فيه من صغرتي، كان نحسبهم تو نضيع الحساب، يظهرلي باش نعمل فيسبوك، مزلت نتعلم كيفاه نبعث دومند، و نكتب ميساجات..حاصيلو هاك الطفلة طاحت تقرا معايا. .و منعرفش كيفاه اما وصلها لي انا مضروبة فيه، تمشي تبعثلو دومند و تبقى تحكي معاه اشهرة، و مبعد تختمها معاه بسؤال بربي اكا سيدة تحبها كي اختك ولا اكثر؟ انا بالطبيعة هذا الكل قريتو، خاطر الطفلة مشالله عليها، اصحابها الولاد اكثر مالبنات، تدبر شكون و يبيراتيلي الكونت متاعي و تدورها تحكي معاه من عندي و اني مكتفة يديا و نشوف في الزوز يحكيو قدامي و هي تحكي بلساني فاللخر قاتلو راني نحبك مالصغرة ،تقصد فيا اني اكيد. و قبل لا يشوف الميساج بلوكاتو.. منو غدوة الطفل يراني يقلب وجهو و يعطي بالدورة، و اك السنين متاع الليسي منعرش كيفاه كملتهم غادي.. من وقتها عرفت اكثر اللي حاجتي فيها العسل.

نفس الحكاية تقريبا تصير في الفاك..طفل عجبني وحدة كانت تعرفو يعجبني مشات صوحبتو، و تو اخرتها..طفل عرفتو بالفيسبوك و ولينا اصحاب، وحدة تغيض فيا بميساجاتها انتيم معاه، و تقلي يحبني اني..

لهنا امنيتي نعرف، فما نوع مالسحر اللي كل ما نحط عيني ع حاجة في بوتيك، نقول في قلبي غدوة نرجعلها. تتشرى..يعجبني شكون يتاخذ،. نمشي بلاصة منعزلة نقول هاذي تولي بلاصتي و نجيها وحدي، نرجعلها نلقاها

تعبات كوبلوات ،جماعة آمي معايا تو سنين، كي قلت ننشر كتاب، ناس كل ولات تعرف تكتب في اشهرة و باش تهبط كتب، امنيتي نفهم خاطر اني طبيعتي، اذا حبيت حاجة، و حد اخر حط عليها عينو برك، سي بون تطيرلي منها و معاش نجري وراها ولا نشوفها اصلا.

نحب نفهم علاه كان حاجتي انا فيها العسل.. و علاه كل ما تحلى في عيني حاجة، يجي شكون و يلحسهالي الكل.