حملة كاملة إسمها "قاورية تهنيك ولا تونسية تتشرط عليك " و تصاور ورميان معنى و بلايك و يا ثعلب و درا شنوا ...

كليمتين : شوف عيش خويا تحب تاخو قاورية من أجل أسباب أخرى بخلاف الهناء نفهمك ... ديجا الهناء عندك أبارامون واضح شنوا مفهومو ...

سي نون تونسية تتشرط عليك ... منين جبتها ؟ وليد عمي انت تخلي بنات من ثوبك و لقمة قد فمك و تمشي تتفورس على الاربعة عظمات الي عندك في بدنك و تحب على وحدة بنت

قمّرت ... طامع في رزق ابيّها ... و تحبها ما تشرطش ؟ ...

و زيد هالتشريط هذا فيه برشا تمكميك... تو انت داخل على طمع ... و تحب تغسل ساقيك و تدخل ؟

انت دوزيام شوا و تحب على وحدة فيرست كلاس شتحب يعملولك ؟

وزيد هاو كي يجيك زوالي يخطب فيك في اختك تحط الساق عالساق و تحط سيقارو الكريستال في كشختك و تبدا تسرسط في الشروطات ...

وكي يقول مازلت كي بديت حياتي سايسوني راني نحبها و ناوي عالهناء انت بيدك تعملو تكركيرة ؟

انا ريت برشا رجال هوايش .. المرا الي ما تشرطش عليهم يحسوها رخيّصة و يعمل في عذابها صنعة ...

الشروطات في حد ذاتها يا كبدي مش هي المشكل ... المشكل الي انت تتسبّب و تحب تخلص 800 ألف و تصرف مليون .. و تحب اسمك مولدي وتاخو كنزة...

و تحب انت في مخك هايشة و تاخو للات النساء ...

القاورية ما تهنيكش .. انت الي تعمي عينيك و تسكر فمك على ديفوواتها بش تورّق ... و بش تعيش على ظهرها كي القملة ... و بش تصرف عليك ..

وفازا اخرى ما تحبش تسمعها اما يلزمك تسمعها ...

تاخذها قاورية كانت تعيش هي و صاحبها في دار سنين ربي ... و كي تقلك مانيش فيارج تبلعها و تغص بيها و تسكت ... و كي تجي لبنت بلادك تولّي قرات بعيد على دارهم و سكنت في

foyer هاملة و ما تصلحش ... و ما تاخوش مرا مش فيارج

اخطاك ماللغة متع الشروطات نعرف عشرات البنات الي عرّست و الي مستعدة تعرّس بخاتم فضة مغطس في الذهب و ما تعاودش الحكاية حتى لاقرب الناس ليها ... و تاقف معاك عالحلو و

المر و تصبر و تكونّلك .. المصيبة وليد عمي الي انت كي بش تحلّ معاك باز بش تصوحب عليها مرا أخرى ....

فما بنات ما تشرطش و رجولية اكثر حتى منك انت .. اما البنات هاذم .. مش بش تتعرّف عليهم في البلايص الي تسهر فيهم ... خاطر بنات باب الله ... مش كيفكم ...

شوفو حكاية اخرى تعلقّوا عليها فشلكم ... و انتهازيتكم قالو قاورية تهنيك ...

قاورية تعديها عليك ... وانت تضحك و تلعب

ثم انت الي عامل الحملة شكون الي ريتها ميتة فانية عليك و الله ما نعرف ... عندكم مراية في داركم ؟ شفت فوقيرتك ؟ الطحش ريتو ؟ ما عندكش طحش ؟ مالا راك كوردون متع سنين بالضعف ... /وشعرك من قدام طايح بالجال الساشيات متع 200 فرنك ....

داخل في البنات فرندس ... تي ريحتك كي النسناس ... و ما تعرش تتكلم ... و بطّال .. و تتشرط عالخدم .. و تحب تدخل تخدم طول داما ... تي الي تتشرط عليها تخرج قبلك تخدم الصباح .... و كي تقراو فرد كلاس تجيب موايان خير منك ... و كي تحكي تفك منك الاضواء الكل ...

و القاورية الي ملوح بنت بلادك عليها .. عندها ولاد بلادها هي زادا .. الرجال القوٍّرة و ما ادراك ما الرجال القورّة ... يصلح للتونسية خير منك سي الكعلاف ... فيانة و شبوبية و ضخامة و حطايط ... ما يمرجلهاش قلبها باعطيني مو د باس الفيسبوك و وين كنت و منين جيت و روبتك قصيرة ماعادش تلبسها ...

ما تتشرطش القاورية صحيح ... و انت زادا تتقضّب ياسر كي تعيش معاها : تو كي تاخوها تولي تراها مع زميلها متع الخدمة و تبلّع فمك ....

و تلبس الشورط القصير و تخرج قدام ولاد حومتك و كشختك ما تحلهاش ....

و تعوم بدو بياس و انت تغزرلها و تصلي عالنبي ...

كان خذيت تونسية يا قامط راك حاكم عليها تعوم بدو بياس فوقهم زوز تبادل متع جيمناستيك و فوقهم جبة .... بش مخك المريض يعيش مرتاح ...

تو كي تاخو القاورية تتعلّم ما تلوحش الزبلة في الشارع و ما تسوقش شارب و ما تكحّلش على مرا أخرى و هي معاك بش تظهر جنتلمان ...

و مع هذا الكل الكعلاف الي فيك بش يقعد ديما ظاهر و عمرها لاهي بش تعتبرك عبد ...

و الأهم الي انت بش تروّح في الصيف لابس مريول برشلونة النيلون و معلّق ساكوش على جنب و مطلّع لاستيك بوكسارك بش يظهر ... تقعد باقي تخمم في التونسية الاولى الي حبيتها و حليت فيها عينيك و الي قصتها معاك خاطر ماكش عبد ...

و كي تحب تبزنس ما تحلالك كان بنت بلادك يا هايشة ...

كي هي ثعلب ما عادش تتحكك عليها في الميترووات ...

وماعادش تتيّتم و تتشلحط تحبها تعطيك نومروها يا نسناس