Zaineb S. - زينب س

وررررررري... حمة : يا خالتي السيدة يزي مالتزغريط راك راسي فرزطتهولي ... يا بنيتي دار عرس و فرحانين و العروسة خارجة ماشية لحمامها تحبها تخرج بالساكتة ...

صابرة : حمة وين سفساريك ..

حمة : ههههه لاباس في راسك أنا وافقت بش نمشي معاك بسيف و اتحب اتزيد تلبسني سفساري ..

صابرة : يامي كلمها يا ربي علاش هكا تحب تفسدلي المنظر شو البنات الكل لابسين تحب تفسدلي التصاور ...

مريم : حمة البس شو سمباتيك علخر هههه..

حمة : يا ربي لا طعتينا ما يغلبنا هات يا للا هات .. مريم شايخة و طايرة بالفرحة أول مرة تحضر لعرس تونسي حمة شدت فيها صحيح و ستدعاتها جات مع عفاف ..

جات السيدة لفت حمة بالسفساري .. اشه اشه يا بنيتي قداش واتاك .. لبنات شايخين عليها بالضحك تلمو بالعروسة و الدربوكة تضرب غناء و تزغريط فالشارع .. شافت فاروق متكي على حيط يتكيف دخلت بعضها زادت غطات وجها بالسفساري .. يا ربي يا ربي انشالله ميرانيش ..دخلت بين لبنات تخبات بيهم ..ادعثرت فالسفساري شوية لدعثرت ريه ..

مريم بيبات لفاروق : فاروق واااا شو شو حمة محلاها ...

فاروق رمى السيقارو و قعد يتبسم من بعيد ..

حمة : يا مريم يزي يزي لازم تفضحني ربي يسامحك ..

مريم : عادي عادي ..

جاها ميساج حلتو تلقاه من عند فاروق قلبها ضرب .. محلاك فالسفساري لعاقبة لحمام عرسنا حبي ..

تبسمت منغير ما تشعر ... فالليل بداو الحنة مريم تشطح كالمهبولة عالدربوكة ماقعدتش و حتى كان جات تعرف تشطح ..

صابرة ممدودة تحني في ساقيها ...

السيدة : حمة ايجا نحنيلك...

حمة : أوووه خالتي السيدة شبيك حاطتني في مخك خليني رايضة ..

صابرة : تي ايجا حمة شبيك ديمة عاكستها ...

حمة : براس أمك فوتني انتي هزيتوني للحمام في جويلية مشيت لبستوني سفساري و شمس ضاربة فيا عديتها أما يا معلم تحبني مربوطة ساعتين مادة ساقية نحني مازلت مهبلتش ..

مريم : طاطا السيدة حنيلي أنا أمان نحب ...

عفاف : هههههه حنيلها بربي خلي تنقص مالشطيح و اتشد بلاصة و نرتاحو خبلتلي عينيا ....