Zaineb S. - زينب س

حمة براس أمك هيا معانا والله امقينه من غيرك.. عفاف أخطاني ناقصني بحورات أنا توا و زيد مع شكون مع مريم بنت عمك... ههههه تي شبيها مريومة اساعه جو عليها ... ما نعرفش ما نحملهاش و أكهو ... انتي غايرة على فاروق خاطر نهار الكل مع بعضهم هاو انقولك انا ... لا لا ما عندي علاش غايرة عليه سي خوك أما غايضتني منو خاطر عامل روحو عشيري و هو ماللي وصلت مريم متاعكم داير من بلاصة لبلاصة يحوسو و أنا نساني جملة ... باهي يا ليلا أنسى هاو بعثني و قالي ماتجي كان بيها بربي هيا نعملو جو مع بعضنا أمان أمان ... أوووف قداش اتكبش اسخطه هذي باهي باهي برا تو نخلط عليك ...

جبدت حوايج البحر مايو قديم و فوقو الكاش حطتهم في ساك و هي فادة و ماشية فوق من قلبها ..وصلت لدار فاروق تلقاه لبرا يعمل في سيقارو لابس بيل فالروج و شورت ..فاروق :  أهلا بحمة تواضعت و بش تمشي معانا .. حمة : ماشية مع عفاف مش معاكم .. فاروق : هههه المهم حصلت و جيت برا أهوكا لبنات يستنو فيك و قولهم فيسع أخرجو ..دخلت حمة ديراكت لبيت عفاف تلقا مريم لابسة فالفلوري و التاتو اللي في كتفها باين و شعرها امبوكل .. حمة : أهلا هيا ما عادش بكري .. مريم : حمة شنوة هذا اللي لابستو .. حمة : شبيه .. مريم مشات اتفرت في دبشها و جبدت 2 بياس فالروج .. شو إلبس هاذوما .. حمة عينيها وساعت .. شنوة هبلت أنا نلبس هكا .. عفاف .. تي أي يا حمة متقينهاش عاد .. لبستهم فوق من قلبها و لبست فوقهم روبة اللي جات بيها مالدار .. خرجو فاروق يسوق مريم بجنبو و عفاف و حمة من تالي حاطين غناء عالاخر و مريم طايرة اتغني و اتصفق هي و عفاف ، حمة عدات ثنية كاملة تغلي ما نجمتش تدخل معاهم فالجو حاسة اللي هي بجنب مريم ما تجي شي و ما تنجم تنافسها في شي ... حستها فكتلها بلاصتها فكتلها عشير عمرها و صحبتها و كل حاجة تحبها بنيا في زينها و جوها شكون اينجم أصلا ينافسها ..

وصلو للبحر حمة ما حبتش اتنحي الروبة مريم ماللي وصلت رمات الكاش و نقزت فالماء بش اتعقدها هالطفلة تعوم كيف الحوتة ، فاروق مش شايفهم جملة خلط عليها و قعدت هيا مع عفاف عالرمل .. عفاف : حمة بورجولية حاشتي بيك في قضية ... حمة : شنوة زادة .. عفاف : صاحبي متعدي من هنا بش نمشي جرية انشوفو و نرجع أمان غطي عليا بش فاروق ما يفيقش .. حمة : اتهنى فاروق مش فايق أهوكا عندو شكون يلهيه .. عفاف باستها من خدها.. باهي عيش أختي هيا نمشي فيسع و انجي .. مشات عفاف و قعدت وحدها عالرمل كان ترا فيهم شايخين و هي اتغزل و مش عارفة علاش .. بعد نص ساعة خرجو مالماء يضحكو ... مريم : حمة شبيك مخلطش .. فاروق : أذيكا تسخن كيف الحمام .. حمة : ها ها ها لا أما بقيت انعس عالدبش .. فاروق : علش ويني عفاف .. حمة : قابلت صاحبتها بصدفة هنا و مشات تعمل معاها في دورة .. دارت لفاروق : فاروق هيا تدخل معايا.. لا لا حمة بش نمشي ناخذ دخان أنا شوف مريم .. مش لازم .. مشى فاروق يشري فالدخان .. حمة قعدت اتغزل اللي يتعدا بجنبهم يبقا باهت في مريم و زينها و هي ما عبرها حد بكلمة مريم مش هنا جملة لاهية تدهن في روحها بكرام البرونزاج .. رمات عينها شافت فاروق يخلص و ياخذ في دخان مالغزول نحات الروبة و دخلت للبحر ..

فاروق كمل شرا دخان و جا .. مريم ويني حمة .. دخلت تعوم .. هبط قعد بحذاها اتكا على ضهرو و عينيه فالسماء زرقا صافية .. مريم عملت كيفو و اتكات بجنبو .. مريم : فاروق .. فاروق: وي .. مرسي محلاها الفاكونس تعدات .. مريومة عندكم برشا مهبطوش علاش .. مريم اتنهدت : ماللي ماتت ماما دخلت فينا غولة بابا سكر على روحو ديما يصلي و حطوه الامام متاع جامع بحذانا و ما حبش يهبط لتونس ... فاروق ربي يرحمها نتذكرها كاترين انتي طلعت تشبهلها برشا ..مرسي فاروق .. باهي و انتي شبيك انسيتنا علاش ما طليتش .. مريم : انا عكس بابا حياتي تقلبت و عشت صراع كبير و مازلت انعيشو بابا تعبني يحبني انعيش تونسية و انا ما نجمتش انكون كيفما ما حب .. فاروق : كيفاش .. مريم : هو يحبني انعيش كايني في تونس أما انا طبيعتي و تفكيري كان كيف لفرانسيس ما فهمتش روحي عربية ولا قاورية ، لفرانسيس يقولولي انتي عربية و العرب حاسبيني فرانساوية و ضعت بيناتهم قرر بابا بش يبعثني لتونس حبني نرجع لأصلي كيف ما قال هو ..قامت بنصها اتركزت على مرفقها و غزرتلو .. بعثني بش انطيحك .. فاروق : هههههه شنوة فاش تحكي .. مريم : والله كيفما نحكيلك بابا يحبني ناخوك انت ... هههه و انتي شنوة تحب ... انا عايشة حياتي طول و عرض و نعرف اللي هنا تحب على بنية مش مجربة قبل و انا ..انتي شنوة ؟ ... بصراحة فاروق منخبيش عليك كنت عايشة مع فريديريك مون كوبان .. فاروق يسمع مش مصدق و مش عارف أصلا شنوة لازم يقول قدام لعترافات هذي الكل اللي قاعدة اتقول فيهم مريم .. وينو توا .. بابا كيف سمع بحكايتنا هبل خاصة اللي هو مش مسلم و ما يمنش بالعرس أكهو قرر يبعثني لتونس اتنجم اتقول قاعد يعاقب فيا ... و انتي مريم اتنجم تاخذ راجل مش مسلم تخرج مالمله راك .. فاروق أنا مخترتش لا نكون لا عربية لا فرنساوية لا مسلمة لا مسيحية جيت ضايعة بين لثنين ياخي حبيت نهرب أنا زادة و جيت لهوني ..سكتت شوية  و بعد خزرتلو .. تاخوني فاروق ؟؟