Zaineb S. - زينب س

طلع الصباح مله ليلة تعدات على حمة فاقت مالنوم راسها يوجع مالبكا متع البارح هبلت و خرجت من سينتها حتى صابرة أختها قعدت باهتة فيها ، حاسه روحها كئيبة و قلبها يوجع مش فاهمة علاش في بالها قلبها برا و قوا و ماعادش يحرك شي توا أربعة أشهرة مللي وفات حكايتها مع أنيس لا عاود كلمها ولا دار بيها ولا حتى خمم يطلب السماح عدات أيامات بغصتها أما شي ميدوم و كيما مشات الضحكة تمشي لهموم و الوقت يداوي ،

كل يوم يتعدا عليها كل دمعة تهبط من عينيها كانت اتقويها أكثر و تقتل حبو فيها . قامت لبست حوايجها وخرجت ما تلقى روحها كان قدام دار فاروق ...دقت الباب خرجلها فاروق عريان مالفوق و لابس شورت ،قعدت اتثبت فيه محلاه أول مرة تراه هكا حاسة روحها عندها رغبة بش تحملو و تتخبا عندو بنسبة ليها كان هو الامان و الصدر اللي يحميها ،فيقها من افكارها ... شبيك باش سمعت عالصباح ... هكا اتصبحو في بلادكم ..صبحنا .. دخلو للفيراندا تلقاه يفطر قهيوة و عضم مروبة و زيت زيتونة جبدت كرسي و بدات ترحي فالعضم ... فاروق: هاي هاي خليلي فطوري قوم برا أعمل لروحك وحدك ، هزت عينيها و العضم في فمها... برا اصمط انت براس منجية أنا جيعانة ..

هوما هكاكا و مريم خرجت اتحك في عينيها لابسة روبة فالازرق بروتيل و فوق الركبة و شلاكة بالصبع في ساقيها شافت فاروق جات تجري طبست عليه باستو من خدو ..بونجور بوقوسي .. فاروق : هذا أحلى صباح ..دارت لحمة: بونجور حمة ..حمة ضحكتلها ضحكة صفرة : صباح الخير ..قعدت بحذاهم ، فاروق : هيا بسم الله على ماخلطت و غزر لحمة.. مريم غزرت مفجوعة للعضم: نو نو مرسي ناخو كان قهوة الصباح ..فاروق اطرشق بالضحك ..هههههه مش كيف جماعة عندها نص ساعة ترحي ... حمة حست القدمة وقفتلها في قراجمها غاضتها برشا نطرت الصحن و خرجت تجري عينيها بالدموع ...فاروق تصدم ما فيبالوش بش تنغر خاطر مستانسين يفدلكو مع بعضهم بأكثر من هكا مفهمش حمة شبيها ولات حاسة لهدرجة !!! خلط عليها يجري ... يا حمة ياحمة إجا شبيك ، حلت الباب و خرجت لشارع عينيها معبية بالدموع خلط شدها من ايديها بالقوي ..

الشارع فارغ مزال صباح ما فيه حد. لصقها للحيط دورت وجها تخبي في دموعها .... فاروق : حمة تبكي تي شبيك براس أمك وليت تنغر كيف الصغار حمة: ابعد ابعدني شادني اتصطكلي قدان لعباد .. هههه يابنتي يهديك انا عباد ، مريم مريم بنت عمك هكاكا اتكلمني قدامها ..هههه تي شبيك مريم متاعنا.. متاعك وحدك مش متاعي..شدلها راسها بين يديه.. يا مهبولة شنوة هذا الكل غيرة.. سيبني ما عندي علاش غايرة .. فاروق سيبها بعد شوية ..أنا نقصد غيرة مرا من مرا .. اتربثت دخلت بعضها و قتلو.. إي إي فاهمتك و انا ما عندي علاش بش انغار منها ، خلاتو و مشات قعد يشيع فيها بعينيه ضحكة مرسومة على شفايفو شاف في عيناها غيرة كبيرة اتمنى يخلط عليها يجبدها يحملها و يشبع فيها بوس هالمهبولة آش عملت فيه . فاروق رجع يلقى مريم و عفاف يترشفو في قهوتهم .. مريم: شبيك فاروق تنبز فالطفلة ما حقكش .. عفاف: شكون حمة هههه يا بنتي مستانسين هذوكم ديما هكاكا كيف الفار و القطوس .. مريم: أيا خليني انقوم أنا بش نخرج.. فاروق : وين ماشية .. نلقى أوتيل قريب عالانترنيت باهي بش نعمل فيه رزيرفاسيون.. فاروق: هبلت في راسك دار عمك محلولة و انتي ماشية لوتيل ... عفاف : شبيك مريومة اساعه انا فرحت ونسني شوية .. مريم : منحبش انكثر عليكم .. فاروق : أيا يزي انتي زادة لانعطيك بايك كيف هكا ماله هذي انكثر عليكم ..مريم : أوكي ماله شنوة بروقرامنا اليوم وين بش اتهزوني .. عفاف: أنا منعرفش لبلايص بلقدا لازم فاروق معانا .. فاروق: باهي يا سيدي خليني انركح جوي فالخدمة و تو انشوفو ..