Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
سنة أولى نسيان : ستاحشتك
Fatma Cherif - فاطمة الشريف
صباح اثنين بليد ما يشبّه لشي ... و قهوة حلوّة بالك تنجّم تنسّيني المرّ الي عايشتّو ... و منظر تونس :المدينة العربي ممدودة قدامي , نتفرّج عليها من بلاصة عالية تقول جثة ملوّحة , بعد ليلة فراع بينها و بين الي اغتصبوها ...
صباح الموت ... و الفراغ .. و الحسّ البايت ... الي قال التراب يبرد و القلب يبرد كذاب و سفيه .. ترابي معاك برد .. و النعش يمكن راهو تهرّى ... و بدن هالمحبّة الميتة كلاه الدود ... و انا ما نسيتش ... و ما بردتش ... و بالعكس نارك تمشي و تشعل في قلبي .. و صوتك رجع يدوّي في وسطي تقول عليك مازلت هنا موجود
...
صباح الخير ياللّي ستاحشت كل حاجة فيك ...
شفمّا جديد ؟
بخلاف السياسة و النساء الي يغتصبو فيهم و الإيسونس الي غلا .. و ال20 دينار الي معاد تجيب شي ... و الناس الي تتقتل باسم الحريّة .. بخلاف الحجاب و النقاب و العرا و القرا و الهارلم شايك .. بخلاف الغضب و التعب و سوريا و ايران و كوريا الشمالية ... و أناقة الرئيس الي ما فماش .. و رجوع المكتب و الخدمة المكدّسة ...
شنيا أحوال ضحكتك ؟ مازالت كيما هي ؟ وقهوتك ؟ مازلت تشربها حلوّة ؟ و شعرك قصّيتو و لا سمعت كلامي و مشيت عملت طرح بلاي ستايشن في بلاصة الحجّام ؟
ستاحشتك ... نحلم بيك كل ليلة ... و ساعات نتخيّلك قدامي و نقعد نحكي معاك لين يهزّني النوم ... و ساعات نحسّك قاعد في وسط مخّي و قلبي ... تدبٍّر عليا و تقلّي اش نعمل و تحكم في تفاصيل نهاري من الي نفيق لين نرقد ...
بطّلت البكاء ... و ليت إنغنغ كي الصغيّرات ... دموع ما فمّاش ... اما نبات نغفّص ... كي ال
bébé
الي متقلق من حاجة ...
في حالتي أنا ضيّع امو و بوه و كل شي
ضيّع شكون يهزو في حملتو .. ضيّع شكون يتفقّدو و يشوفو مناش متقلق ... ضيّع حد يلعب معاه ... يدغدغو .. و يضحّكو ...
محلاه النسيان .. كيفاش يتستوى كل شي قدام عينيك ...كي الخدمة كي البطالة ... كي الحبّ كي الكره ... كي الحلو كي المرّ ... كي الحياة كي الموت... ولّيت نقص من قدام الكراهب و هوما يتجاراو ... ياقفو في آخر لحظة قبل ما يفتفتوني .. ويقومو يصيحو عليا
"حل عينيك"
علاش نحل فيهم ؟ مغمضين خير
...
كي نفيق من الصدمة و نسمعك انت في وسطي تكشّ عليا ... نقوم نبكي ... انت ديما تكّش عليا ... عمرك ما عذرتني ... و لا حطيت روحك في بلاصتي و شفتني كيفاش نخمم : بالك كي نموت نراك في الدنيا الأخرى ...
مش قتلك صباح الموت ؟
البارح لقيت كتابك الي تحبّو في المكتبة شريت منو 4 نسخ : وحدة ليا وحدة لروحي وحدة ليك و وحدة ليك كان ضاعت الي بش نهديهالك ...
الراجل الي شريت من عندو يستخايل عندي مكتبة عمومية ...
حاولت نتفادى الحديث معاه ... بش ما نتفرتش قدامو و نحكيلو كل شي ...
خاصة وأنا عندي رغبة بش نحكي لأي حد يعرضني ... أي حد ما نعرفوش ... المهم يكون من النوع الي يفقد الذاكرة كل 5 دقايق ... آخر ما نكمّل نحكيلو ينسى كل شي ... من غير محاضرات و نصايح و مواعظ
...
مانيش صغيرة و ما نحبّ حد ينصحني
نحب نحكي لحد أطرش ... آخر ما نكمّل نحكي نكتشف انو ما سمع شي ...
نحب نحكي لحد يعرف يحلّي يديه آخر ما نكمّل و يعنقني في بلاصة ما يعملّي درس في المحارم و ما يجوز و ما لا يجوز ... و ما هو محرّم و ما هو مكروه ..
ما فما حتى انسان ينجّم يتعامل معايا هكا غيرك انت ...
هالعالم لكل متكوّن من عباد لابدتلك تقول عليك فريسة ... تستنى فيك تطيح .. تغلط ... تعمل حاجة من منظورهم ما تجيش ... بش ينقّزو يجيو قدامك كي بوليس لابد و راء شجرة يستنى فيك تحرق الضو بش يخطّيك ...
ستاحشتك ..
و شاهية حدّ يسمعني كيما كنت انت تعمل .. يا لندرى وينك تو؟ و فاش تعمل ؟
فاطمة الشريف
الجزء السابق : سنة أولى نسيان - أوّل نهار
Website Design Brisbane
Tags: