رجعتلي تصويرتك بين غلافات الكرارس الجدد ...لونك الي تحبو مكدس في الاجندوات .. و ريحتك فايحة من اوراق الكتب ... صوتك جايبو الريح الجاي من بعيد .. جايب حكايات صارولنا هاك العام في هالوقيّت ..

رجعت خطاويك في خطاوي الغشاشر الصغار تزرب عالمكتب .. و رجعلي هلواسك و توسويسك مع صوت الاساتذة الي تنبه " الخدمة على دور العام" ... رجعتلي غزرتك الحنينة من تحت المرايات تقول عليك حاجة اقرب من امي وبابا ... ورجعت نخمم فيك وكايني الي عملتو صيف كامل بش ننساك رجع بمفعول عكسي ... دخان اوراقك الي حرقتهم خنقني اليوم ... رجعت الكرافات حاصرتني في التركينة وانا الي ستخايلت روحي لوحتها .. رجع كل شي يخدم وقتين .. ورجعت تخدم انت وقت كامل في عروق مخي... رجع الخريف رجع كل شي و ما رجعتش انت