Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
رمضان
Saida Jaafer - سيدة جعفررمضان
و يا حسرة على رمضان زمان
الدفى و الأمان
و الشوارع لي ما تشوف أحزان
رمضان، شهر الصيام
شهر القيام
شهر قلة الكلام
قلة الكلام خاطر زايد من كثرتو
قلة الكلام أما حلاوتو
الكلام بالسلام
و بالأخص بالصيام
الصيام لي هو بيدو ما بقى منو كان كلام
الصيام لي نحبكم تعرفو تصوموه
الصيام عالحرام
الصيام عالكذب و النفاق
الصيام عالتقصير في حق ربي
و عالطبايع لي ماعادت تنطاق
صوموه
و اعرفو كيفاه تصوموه
و تقوموه ..
صوموا عالتكركير و التجوبير
و التقلقيل و التنبير
صوموه ب ليلو ب نهارو
صوموه و اعطيوه كارو
صوموا عالفطرة، عالنطرة عالغدرة
عالجروح لي تسببتو فيها و ما تبرى
عالناس لي تبات الليل تبكي منكم
تشكي ربي و تحاسب بيه فيكم
تقول ليكم ربي،. ليكم
صوموا على ضمير العرب المستكين
عالحروب لي نتفرجوا فيها فالأخبار و أحنا نتعشاو
و نقولو هاك الوطن اش يظلمو فيه، مسكين،.
و على ذكر المسكين، اك المسكين، اللي في رمضان لا ليه لا والي لا تالي
نجمو نتفكروه بعشا، بخبزة، ب دعوة للدار
مهما يكون، مادامو من حومتك، ماليلو يبقى كان جار
قولولو راك جيت لهالدنيا و معاك ربي ،تو معاك احنا و ربي
و فهالدنيا ينجم يصير و حد ينساوه دارهم
يموتولو، يخليوه، يتلوح
أما ربي ما ينسى عبادو و لي خلق ما يضيّع
السنا انت ضيفنا و احنا اهلك و من حذانا ماك مروح
بخبزة بزيتونة، بزيت، بصحيفة شربة دافية
تمنعو من موت روحو قبل البدن
و كيما انتي حنّيت عليه
ربي زادة عليك باش يحن
صوموا رمضان و اعرفو تصوموه
و ما تنساوش النية
إنما الأعمال بالنيات
و ربي يتقبل مني و منكم
و يغفر ليا و ليكم
نشالله رمضانكم مبروك
للي يعرفوني و اللي ما يعرفونيش
و للي يعرفوني و ما نعرفهمش
ولا لي نتذكرهم و ما يتذكرونيش
رمضانكم مبروك،
رمضانكم مبروك للناس اللي عندي شهور ما حكيتش معاها
للناس اللي ماكلمتنيش عندها سنين
للناس اللي وجعتني، مسامحة ،
و اللي وجعتها من غير ما نقصد، سامحوني ، اكيد،ما قصدتش نكون جارحة
ربي يطول في اعماركم في الخير
و تصوموه كل عام بالصحة يا رب
و كل عام و انتوما حيين بألف خير
و كل عام خير مالللي قبلو و خير و خير و خير ..
رمضان كريم
سـيّـدة جـعـفـر
Website Design Brisbane
Tags: