دارنا ... ما أعزّش منها على قلبي ... كراسيها و كنابيياتها ... تلفزتنا .. و افلامنا ...

دارنا الي عمري لا حطيت ساقي فيها و لا عفستها مرة معاك ... و بش يوفى العمر قبل ما نعفسها ...

دارنا و ما نعرفش منين نسبتها ليا و ليك ! ماللي حلمنا نعملوه فيها ؟ ماللي تمنيناه و كتبناه في قلوبنا ؟ ماللي سرقناه مالدنيا و حلمنا نكملوه غادي ؟

دارنا ... كولوارنا و تعنيقاتو ... كوجينتنا و قهاوينا و فرشنا و صبحياتنا ... موزيكتنا و شطحاتنا ... غلّتنا و هبلاتنا .. حوايجنا و فاليجاتنا ...

دارنا الي ما فيهاش برشا تحف و خرم و زرابي و ريدووات و ثريات ... دارنا الي قيمتها في انها احنا الي مزينينها .. مش هي الي مزينتنا ... أحنا أغلى ما فيها .. نعمبو الكريستال ..

ما يجينا فيها حد و ما نستناو في حد بش يجينا لغادي بش نستقبلوه فيها ... بخلاف الفرحة ... و الحب ..

دارنا و حتى كان ما سكنّاهاش .. و حتى كان سكنوها الاف بعدنا ..

تقعد متسمية علينا .. عتبة فرحتنا ..

حتى كان ما سكّناهاش ..هاذيكا تقعد لاخر العمر دارنا ...

حتى كان ما سكناهاش هي سكنتنا