السماء لي جمعتنا اليوم فرقتنا

و البحر لي نهار عشقناه، غرقني و خلاك حي ترفرف

بموجو خبطني بحسو ربطني

خلاني ماشية جاية على نفس البلاصة

اللي نقنع في روحي لي هي بلاصتنا وقت انت عمرك ما كنت معايا

صنعتك ف خيالي، و عشت بيك و خلقت منك حكاية

كل ما نشوف البحر نرميهالو

حمل و نزيحو

يقوم البحر يرد عليا و يقلي فكني منك و شد حكاياتك عليا

يزي ما سمعت شكاك و بكاك و خليتك ترتع براحتك في سماك

تي مش ليك سنين تو

وقتاه جيتني مش وحدك!

تي نهار كامل و انتي كي الشبح عالشطوط تدور وحيدة، طافية كي عرف وقيدة

لا من يراك سيقارو و يقول هات جبيدة

تي يزي و فيق

و ايجاني مرة مش وحدك

ايجا مرة ،من غير ما تغطس صوابع ساقيك في رملي

و تخلي طش مايا يبل خصلاتك

و كان جاو على وجهك نتفجع و نسخايلهم دمعاتك

تي ايجا مرة موش وحدك

قول اليوم لقيت كتف كي تحنيت عليه، استويت

قول لقيت صدر و وذنين و حضن، و فاللخر اختمها بالقلب اللي قبلك كيما انتي و ساعك بكلك بهمك و دمارك و هبالك و جنونك و بكاك و دموع فرحتك لي كان هبطت ما تكف

قول راني لقيت اللي خلى وجايعي تخف

اللي كي لقيتو ما تفجعش مني و ضرب تلف

لا، جرالي و عنقني و قالي ماليوم ماعاد مسيبك

تي اوصل مرة ايجاني مش وحدك الزح

ما قلقتش وحدك؟

يا سيدة؟ ..