في اخر الرحلة تفهم شمعناها "مكتوب" خاطر حتى شي بخلاف هالكلمة "الغامضة" ما يفسّر الي صار الكل .. المكتوب هي الكلمة الي نقولوها في اخر المطاف خاطر ما نلقاوش تفسير منطقي لاختياراتنا ... و هذا هو بالضبط الي العبد يستحقلو في اخر كل رحلة بحث على حاجة هو بيدو ما يعرفهاش شنيا !

قدام كسوة العرس المعلّقة قدامي تستنى في الوقت يجي بش نلبسها .. تعرض قدام عيني فيلم كامل .. فيه البطلات الكل .. الي شعفوني و الي شعفتهم .. و الي أثّروا فيا و أثرت فيهم . و الي حبيتهم وا حبونيش و الي حبوني و ما حبيتهمش .. و الي اليوم وصلوني لاخر نومة في فرشي بو بلاصة ..

كل عبد يجي بش يعرّس لازم يجيه شعور قبل بليلة يقلّو أفصع و اش لزّك

و فما زادا هاك السؤال الشهير متع "توا هكا خطرلك ؟ بش تكمّل عمرك مع هاذي ؟ هذا؟ " و يقعد السؤال يدور يدور لين تدوخ و يهزك النوم و تفيق الصباح عاطي رقبتك كي  الضحيّة نهار العيد

هاذي الي وصلتلها ؟ تو عاد غدوة تسمع التمتيم متاع العباد الي عيّطتلهم بيدك  وخسرت عليهم استدعاوات و حلو و فلوس زرقاء بش ينبّرو عليك .. في "هو قد ما قعد "قعد و في الاخر ياخو هاذي ؟

في "كاينها تظهر اكبر منو ".. "مااخيب روبتها" .. "اوووه قصيّرة عليه" .. "تي هاي ما تخدمش معاه ؟" "منين جابها ؟ صاااار مش ساحليّة ".. "اه جابها من تونس ؟ محسوب بنات تونس خير من بناتنا" .. "تي اهايكا خليقة و راس و زيد ضعيّفة و تظهر معلالة لاما  يكمّل عمرو في السبيطارات

"تو هاذي هكا بش تجيب الصغار ؟ لا الله الا الله ! تي خبشة بسكينة في صبعها لاما تطيح تدوخ .. مش ولادة و حسّ


نعرف الكلام الي بش يتقال الكل من قبل ما يتقال .. هاك النهار كي قعدت نخمم لقيت روحي ماعاد هاممني في كلام حد .. و العباد ما تفهم كان الي تحب تفهمو و ما ترى كان الي تحب تراه .. و العيشة عيشتي .. و المرا مرتي و شي ما يهمهم فيا ..

غدوة لازمني نعمل وذن عروس بش ما نغلط مع حد  .. اما كان نسمع واحد فيهم يقول فيها كلمة لاما نجبد عليه بداودي قدام العباد الكل

كلمة كيما شنيا ؟

كيما اني مثلا مش حاكم فيها .. مش مسيطر .. ما تسمعش كلامي .. خارجة على طوعي

اه مالا ! مالا انا علاه خذيتها ؟ بلوتو علاه اخترتها هي في الاخر ؟

خلينا من المرا الي نحبوها .. هاذيكا شي اخر تماما .. المرا الي تتاخذ في الاخر مش هي بيدها الي تتحب

مالا انا باش تونسي ؟

اي شبيه قاري و متثقف و نحب الاوبيرا و نحب المسرح و ما نفلّت حتى فيلم تونسي و لا قاوري يهبط للسينما ..

هاذاكا شي متع ثقافة و هذا شي متع .. متع .. ما نعرش شنيا ..

و لا شبيني انا ؟ قايم نبدّل في منظومة تمشي بيها البلاد منذ الاف السنين .. هيرقل أنا ؟ حنبعل ؟ عقبة بن نافع انا ؟ شمدخلني

الامور هكا جرات .. هكا جرات العادة و السنة .. تي هي بنات ولات تخمم هكا خلي الرجال .. تقلّك نحب الي نحبو و ناخو الي يعيّشني كيما نحب .. انا زادا نحب مرا تعيّشني كيما نحب .. و المرا الي نحب ؟ تقعد للمحبة و غناية من قاع بار منسي في اخر الافونو تفكرني فيها ..


اه ! المرا الي حبيتها .. مرا بالحق .. روبة و صباط و شعر طويل يوصل لخصرها .. و قدّ و عين .. و ضحكة تهدّ بيها شطر الدنيا و تبني بيها شطر اخر .. هذا الكلو مش مهم مشات على روحها .. ما تفاهمناش .. تعاركنا على موضوع "معاودة الكونتور متع المرا" قتلي عاد شبيه ؟

شنوا الي عاد شبيه ؟ شمعناها ساعة عاد  شبيه شمعناها ؟ معناها عبد اخر تعدّى قبلي  ؟ قبلي انا ؟ انا القاري المتثقف ؟ الي ببلاصتي ؟ الي في خدمتي يطرطرو مني ؟

الي في دارنا نحط الساق على الساق و نقلهم جيبو كاس ماء يجيو يتجاراو ناس الكل كل واحد هازز قمصان ؟ الي في رمضان نعدّ] النهار كامل راقد و كي نفيق نحل التلفزة و نقول لاختي  المروّحة من خدمتها بعد الاربعة متع العشيّة "نحب بريكة اصفرها مروّب و و ابيضها طايب .. و جلبانة و طاجين مرقاز و روز جربي و صمصة و  مدموجة في الديسار و يكونو الكل حاضرين في ظرف نص ساعة" !

انا الي أمّي علمتني نفك حاجتي فكّان .. ما نرشفها لحد .. ما نرضى حد يجي قبلي في القسم في الفاك في الخدمة في الباركينغ في الاجتماعات ..

نجي للمرا الي بيها الفايدة ونخلّي حد يجي قبلي ؟

اكاهاو عاد  هي قالتلي عاد شبيه و انا دونت و زراق وجهي و قتلها شمعناها عاد شبيه ؟ قاتلي "انت متخلّف و قرايتك مدفونة تحت زليزيّة في دار عربي في قاع مخّك يا ريتك ما قريت .."

نعمل هكا و نهز يدي و نعطيها كف .. و تفارقنا ..  وكليت البصل و عييت نطلب في السماح و ستنيتها قدام خدمتها لين نبّلت ساقيا .. وانا نعرف الي _ على خاطرها قوية _ مش بش تسامحني .. وشريت ورد لين وفات فلوسي ... وبعثت الف مرسول .. و ما رضاتش و مش غلطتي ... هاذاكا هو مكتوب ! ما نحبش مرا تجاوب انا .. ما نحبش مرا تتكلّم في حضوري .. ما نحبّش مرا تحسدني عليها العباد .. فيفر بيان فيفر كاشي .. ماو لاباس ناخوها قطعة و ترصيلي نقاسي فيها ؟ كل ما نخرجّها معايا ترصيلي نتخابط و نربرب و نكمّل الخرجة في المركز ..

هكا خير ! حويجة لاهي لاهي .. لاهي قارية برشا لاهي  متثقفة برشا .. لا محوّسة برشا .. لا مخالطة برشا .. لابهيمة برشا .. لا مزيانة برشا ..

خير الأمور أوسطها ..

الازم في الازم .. و شكون قال ما نحبهاش كي تبدا هكا ؟ تي ماهو باز تو يجي نهار و نحبها .. ياخي العبد شنوا يحب تي ماهو شويا لهوة

قهيوة الصباح و فطيّر في نص نهار و عشاء باهي و نومة مرتاحة و يا ربي ليك الحمد .. السُتر هو الكل

وخير الامور أوسطها ..

وزيد انا ما حاجتي كان بمرا تعبيلي حكة السكر .. قلبي طاب مالقهوة المرّة  :)

-
الحكاية بدات هوني : حكة السكر الفارغة - جزء 1