تفكر المدة اللي فاتت

عديت منها فترة طويلة وحدي

مش وحدي وحدي..

يعني وحدي ك بدن

و معاك انتي ك خيال

يعني نحط راسي عالمخدة نحس النفس متاعك بجنبي

يعني نهز عينيا و نغزر للسقف و نغمضهم، نراك

يعني كي نبكي و تشيح دموعي فيسع، نحسك انتي مسحتهم

يعني في كل كلام كتبتو عليك و مبعد فسختو

و قلت يزي يا مهبولة، راو ماعاش موجود

يعني في كل ترميشة و نومة قصيرة نفيق منها فيسع، مفجوعة و نلوج بجني، منعرفش حتى علاش

نعرف من هذا الكل انك مازلت عايش فيا

و لو اني اضطريت نقتلك في الدنيا

و نقتل حضورك قدام عينيا

حضورك في بالي منجمتش نقتلو

تصويرتك بين ذاكرتي و كارني كتيبتي عليك

منجمش منخليهمش يفكرو فيك

يديا منجمش نقصها باش متخنتبش عليك الكلام اللي منجمتش لا نقولهولك لا في الدنيا لا في المنام

نتفكر كل حلمة حلمتها بيك

بالتفصيل الممل..

هاك الذاكرة الصورية اللي عندي

قداش كنت تحبها فيا

و تكرهها كي تكذب عليا في حاجة تعرفني متفكرتها و منسيتهاش

هذا الكل و اني عمري لا ريتك

هذا الكل و انتي جرد خيال نراه في بيتي، يجي يتكى بجنبي، كي نبكي يمسحلي دموعي، يعنقني لين نرقد و يسكتلي فمي كي نبدى ندعي كل ليلة باش نصبح النهار الجاي ميتة، يشدلي صوابعي يعاوني نكتب، و يبنن بيا لين نغمض عينيا، باش انجم نحلم بيه،.

معرفتش حتى لمتاش باش نبقى ننسى منتخيلش حضورك في بالي

لمتاش باش نبقى نتفكر ننساك و مننساكش

لمتاش تعاوني نتفكرك و نعاني منك كي المرض في راسي

لا مخليني نرقد لا ناكل لا نتنفس كي العباد لا نحكي عادية كي العباد و لا نمشي و مخي فاضي، لازم في الشارع يا راسي مطبس و نتبسم وحدي كل ما تخطر تصويرتك في بالي

ولا نغزر قدامي، و على أجنابي، و ورايا و حتى فوقي، لعل وعسى تتعدى ولا نلمح طيفك لأول مرة في حياتي، قبل لا نموت

نعرفك تكرهها جملة قبل لا نموت

اما انتي علقتني بيك، و لا بردت على قلبي بشوفتي ليك

و لا سيبت ولديا و خرجت من مخي باش نرجع نعيش اللي مزالي كي بقية خلق ربي

يا ربي..! ياخي لهالدرجة بارد و ما علابالكش باللي صاير و لا عامل ما يهمكش ولا شنية بالضبط

قداه منهم عينيا، و قداه منو التحويق تحتهم، باش يشهد عالليالي لي بتت نستنى فيك فيها، و كي أيست من جيتك، شديت الستيلو و كتبت

و عملت فيها نكذب عليهم، و اللي انتي جرد فكرة مخي صنعها و حبها و كهو، قداه منها أوراقي تعبات بيك، و رواريا تنفست كلامي عليك، و فمي ما يعرف ينطق كان وينك نحب عليك نحب نجيك،. تنجيني و تنجيك من هالخنار اللي عايشة فيه، كل شي فيا معبي بيك، بيتي، سقفها، مخدتي، تليفوني، شباكي، خزانتي، و منعرفش كيفاش، أما كل ليلة نشم ريحتك اللي منعرفهاش، و نعبي بيها جواجيا لين يهزني النوم، و كي كل ليلة، ندعي النهار الجاي نصبح ميتة، و ما نموت،. يمكن مازلت نحب نقعد حية، حتى يجي هاك النهار اللي باش نراك فيه، وقتها برك.. يمكن انجم، نموت مهنية، و نرتاح.