Zaineb S. - زينب س

الجمعة الثانية في ديسمبر دخلت ، الدنيا بردت ..قمت الصباح لوجت على وليد ملقيتوش دخلت للكوجينة دقيت على بيت البانو شي ما ثماش خرجت لبرا ملقيتوش قلبي طاح ناديت لوجت شي ايست رجعت لدار شدني لبكا تعدات ساعة اعصابي تحرقت و هو حل الباب و دخل في يدو قضية منغير ما نحس بروحي نجري و نعنقو بالقوي و نطرشق بالبكا..

شبيك شهرزاد اش ثمة ..امان هكا تعمل فيا هذي ثاني مرة تعملها و تلعب بروحك ( نحكيو نبكي و باقي معنقتو ) خفت عليك خفت عليك برشا ما تعرفش شنوة حسيت ..طيح السشيات من يدو جاو فالقاع ..بعدني و قعد يغزرلي فقت بروحي جيت بش نبعد عاود جبدني و قالي : يزي مالهروب وين ماشية ..علاش بش نهرب (دورت عليه وجهي )

شدني دورلي وجهي ..اغزرلي علاش تفجعت عليا ..وليد اكيد بش نخاف عليك احنا الزوز في نفس المشكلة ..هذاكا علاش ..مهمهت ..و على خاطر ..( هز حواجبو ) ااي على خاطر شنوة ..وليد سيبني ما نعرفش ..انا نعرف ..انا مازلت نحب نفهم اش يقصد.. جبدني باسني ماللول قعدت جامدة و بعد حطيت يدي على وجهو و بستو ..هزيت راسي ..باسني من جبيني و حملني .احلى احساس فالعالم نسيت احنا وين و علاش و شنوة ينجم يصيرلنا نسيت كل شي ..بعدت شوية ..وليد ..ممم ..شنوة اللي صار ( ما نحبش نغزرلو في عينيه) ..هزلي راسي ..لبلاد الكل عرفت و انتي لا ..شنوة اللي معرفتوش ..اللي انا نحبك ..قداش ستنيتك بش تقولها علاش خبيتها في قلبك هذا الكل ..انا وين و انتي وين قولت فنانة مشهورة على شكون ترضى بش تغزرلي ليا انا ..ههههه ضحكت ( كان تعرف لحقيقة يمكن انت ما تغزرليش ) انت مهبول انا نحبك و نموت عليك و من اول نهار ريتك فيه ..عنقني و بعد هبط على شفايفي باسني باسني و اخيرا قلبي رجع يدق ♡♡....

قاعدين اللوطة و انا متكية عندو و هو يلعب بشعري.. حبيبي ..وي .. شنوة بش نعملو توا ..بففف اخطانا شهرزاد لازم تفكرنا خلينا شايخين ..درتلو ..تعرف حلها خلينا عايشين هوني و نعاودو انقدو لرض و نعيشو في سعادة و هنا ..هههه حبي انتي مالاحسن تغني و كهو راسك المزيان هذا متعبوش برشا ..يا تتمقصص عليا (كشبرت كيف لولاد الصغار) و جيت بش نقوم جبدني رجعني عندو ..اقعد هنا وين عندك تمشي و انا مازلت نخليك تبعد عليا ..قعدت عندو و ما حبيت نخمم في شي ..في الليل نرقد و كالعادة يعطيني يدو نحملها ..تعداو نهارين حب في حب ..دخلت للكوجينة نلقاه يطيب قعدت فوق الطاولة بحذاه نتفرج فيه ..حبي ارتاح اليوم انا بش انطيب ..هههه باهي تو نشوفو على كل حال ما عنديش حل اخر ..دارلي دزني فوق الطاولة و طاح يدغدغ فيا..اي تي سيب سيب امان امان ..اوووه ..سيبني و رجع يطيب ..وليد..وي ..نورمال احنا ..كيفاش ..اللي صاير معانا الكل انت فشخت لسعد الطر*** بطريحة بلاد كاملة تلوج علينا و احنا قاعدين نحبو في بعضنا ..شهرزاد انا منسيتش اما شنوة تحبني نعمل ..تعرف شفت برشا حاجات غريبة في حياتي اما كيف اللي صارلي هذا مستحيل كنت نتوقعو ..هههه بربي شنوة الحاجات الغريبة ما لقيتش روبة باهية لسهرية ولا زدت شوية فالميزان ..ضحكت ضحكة صفرة و بلعت السكينة بدمها و سكت ..

وليد صلح الشمينية حلها محلاها دفات الدار نهار قارس و شمس فيسع ما تغيب الدنيا مسحبة عالاخر و باردة دخلت للكوجينة نلوج على حاجة ناكلها ، رجعت نلقاه راقد ..فديت مالدار خرجت لبرا حبيت نشم نسمة و نتفرج فالطبيعة لبلاصة ياسر فكرتني بصغري و بدارنا ، مشيت بعدت شوية على الدار ما نعرفش كيفاش نسيت الوقت ما نفيق كان بالدنيا غيمت و لمطر بدات تصب و بعد قواة بديت نجري نحب نوصل لدار ..نلقى وليد فالباب مبلول بكلو جبدني و دخلني نجريو ..دخل سكر الباب و صاح عليا ..نورمال شهرزاد انتي اش مخرجك !!..شبيك تصيح اش صار ..ما تنجمش تقول قبل ما تخرج شوف حالتك ..انا مبلولة بكلي شعري تبل هابط عليا السورية متع وليد لابستها (فالازرق البارد) لصقت عليا بالمطر و حتى مالسوتيان ولى ضاهر نحى مريولو مبلول زادة رماه عالكرسي دخل لداخل قعد شوية و بعد رجع في يدو منشفة جبدني قعدني فوق الفرش و بدا يشيحلي في شعري و بعد غزرلي لسورية (حسيت روحي كايني عريانة كل شي باين ) عينيه هبطت لسدري ..قربلي حلي 2 قفافل و بدا يبوس فيا بعد هبط لرقبتي و كملي نحالي السورية ترخفت اتكيت فوق الفرش مال عليا جا فوقي نلقى روحي ب 2 بياس ما نعرفش كيفاش بوس و تحميل بديت نضعف و عرفت وين بش نوصلو تذكرت سيف اول ليلة معاه الندم اللي حسيتو بعدها الضمان اللي دفعتو غالي على ليلة وحدة لا لا فيق يا شهرزاد ..وليد وليد ..امممم(باقي مش هوني ) ..وليد لازم تسمعني ، قام بعد شوية غزرلي باهت : شبيك شهرزاد اش ثمة ..لازم تسمعني ثمة برشا حاجات خبيتهم عليك ..توا وقتو حبي و باسني من خشمي ..وليد لا ما لازمنيش نعاود الغلطة مرتين ..ستغرب و قعد بجنبي و غزرلي ..شنوة الغلطة اللي تحكي عليها ..بقيت نغزرلو نخمم كيفاش نبدا ...

انا جيت بش نتكلم و الباب دق تربثت ..وليد شنوة الحكاية شكون ..وليد قام دارلي ..البس حوايجك فيسع ..قمت ندعثر لبست حوايجي و وليد لبس مريولو حل الباب نلقاوه مهدي ..اووووف صارة هو انت ادخل ..مهدي : اي شبيك يا معلم فهمنا ما عينكش بيا اما مش لها الدرجة ..مشيتلو انا سلمت عليه ..اهلا مهدي لا ما يقصدش اما تفجعنا ..وليد : مش عندك مفتاح انت من وقتاش ادق..مهدي: اي وين نعرف انا يا خويا سبحان الله ..وليد : شبيك علاش جيت قوتلك راو ريسك اللي تعمل فيه .. انا : مهدي برسمي لسعد ما يصعب عليه شي ..مهدي دار لوليد : امك بعثتني متوحشتك تحب تكلمك.. و مدلو تالفون..خو اهوكا فيها pus جديدة كلمها خلي تتهنى شوية ..وليد خطف التلفون و خرج لبرا يكلم في امو حسيتو فرحان برشا كيف سمع صوتها ..بقيت انا و مهدي وحدنا ..قمت جبدت كارت متع بنك و مديتها لمهدي ..شنوة هذي ..مهدي هذيكا كارت متع بنك متاعي و معاها الكود اجبد منها فلوس ..اي اش نعمل بيهم ..اسمع امان نعرف اللي مهدي هو اللي يصرف على الدار و توا هاك ترا الله اعلم شنوة بش يصير و تسلك ولا لا ..لا لا شهرزاد عيش اختي لباس امورنا واضحة والله كان يسمع وليد ما يقتلني امان مهدي خبيها فيسع احنا بيدنا مستحقين فلوس هوني و انا منجمش نجبد توا..اووف باهي هات ..حط الكارت في جيبو فوق من قلبو ..غزرتلو: مهدي عيشك ..على شنوة ؟!..على وقفتك معانا سكت شوية و بعد قالي : شهرزاد انا قبل كيف نعمل عركة وليد يخلط عليا و يضرب معايا من غير ما يعرف علاش و كيف نروحو لدار يسألني اش ثمة اذاكا على شنوة تربينا خوك ضارب ولا مضروب ديما معاه ..قعدت نغزرلو و قولت في قلبي صحة ليهم عمري ماريت زوز خوات يحبو بعضهم هكا....