فما حاجة ما يعرفها كان شي وسط قلبك ... ساعات ما تحبش تصدقها و تيدا تلوّج في حاجات تثبتلك العكس ... تقعد سنين تعاند في روحك ... تتمنى تطلع غالط ... تتمنى الامور تمشي عكس ماك حاسس ... تتمنى العبد الي قلبك مش مرتاحلو يطلع باهي ... ويطلع قلبك غالط فيه .. تتمنى ... تنسى اما ... ضحكتو ترسخ في قاع مخك ... كل ما تجي بش تشد عليه بروفة ... تعمل عين رات و عين ما راتش ... ما تحبش تبربش في جرّتو خاطر بين و بين روحك تعرف الي انت تنجم تلقى الاف الاثباتات الي تفيد انو كذاب ..

كذاب ... في تبسيمتو ليك ... في غزرتو ... في كلامو ... كان تثبت في تصرفاتو تلقى الف دليل الي هو ما يحبكش ... اما تقريب عامل روحو يحبك ... عامل روحو يحبك ... كي تخمم علاه (و بيناتنا ما يستحقش تخمم) ...تلقى روحك عارف بالضبط هو اش حاجتو بيك ...و عارف علاه بينك و بينو شي كي البلاّر شادد بالسيف اما حد فيكم ما يكساب الجراة بش يستعرف ... حد ما ينجم يستعرف خاطر الضباب جزء منكم ... من حكايتكم ... ما عندكم وين تهربو منو ... مخيّطكم في بعضكم ...حاميكم و سارقكم... متغطين بيه ... مدفيكم و مبرّدكم ... ملبّسكم و معرّيكم في نفس الوقت ... انتوما في حد ذاتكم الضباب

انتوما ضباب .. لا حد فيكم يعرف الاخر بالضبط ...وماكمش ملوجين بش تعرفو التفاصيل ...

واحد منكم يحب... و واحد منكم يكذب ... الي يحي تاعب بمحبتو و الكذاب مخو مرتاح خاطر  الكذب فيه طبيعة ... مفضوح ... مايحبش شكون يحاسبو ... ما يحبش يعاود الاحداث لا يتشّد بتفصيل يفضح كذبو ... ما يحبش شكون ينشدو ... ما يحبش شكون يقسم معاه الدنيا ... ما يحبش يحط روحو في بلاصتك ... يحب حاجة وحدة : يكذب قد ما ينجم و يتماهى مع حاجة يتمنّى يكونها ... مع حد كي الملايكة في محبتو ... مع حد محلاه ! كيفك انت يا مسكين


مسكين ... تحب و تعطي و تكتب و تتفكّر و تتبسّم  و تبات تخمم ... و تعطي قد ما تنجم و اكثر ماللي تنجم ... قد ما تعطي تحس روحك مقصر ... ماذابيك كان تفرش   النجوم يمشي عليها ... كان تخبي قلبو عندك خاطرو ما يعرش يتلهى بيه ..ماذابيك كان تخبيه مالدنيا لا الدنيا توجعو ... و كي يكذب تسخف عليه  في بلاصة ما تكرهو .. كي يكذب تحاول تصدقو .. و تلوج على سبب يخليك تغفرلو ... و تلوّج على ثنية توصلك ليه ... على قد الكذب على قد المحبة و بالك الكذب اكثر شويا ...

اكثر شويا من هكا تموت ... يسخفو عليك العباد المتعدµين في الشارع كي يراوك تبكي ماعادش خايف من اش يقولو عليك ... يسخفو عليك الي قاعدين في الطواول الي حذاك كي يراوك وحدك تعدي سوايع تستني فيه ... يسخف عليك تليفونك الي كل ثانية ونص تضويه ..و تلحلح بيه بش ينوقز ... تسخف عليك روبتك الي عدات الليلة تحت الحديد تتقلّى ... ماكياجك .. سيول كحل من عينين ما شبّو كان فيه ... يسخف عليك قلبك ... قداش من مرة بسكينة حافية قصو قدام عينيك و انت باقي تخمم عليه ..

عليه ... تدعي عليه ... على جد والديه ..عالنهار الي عرفتو فيه ... على كذبو ... على نفاقو ...على لمعة فالصو في ممّو عينيه ... على مصلحتو الي حاجتو بيها معاك ... سنين الي ضاعت من عمرك في جد سماه .. عالعمر الي قبل الوقت وفاه ... تدعي عليه و هو في طمبك كذبو ... تكفر بريحة كلامو ... تكفر باسمو ... تكفر بهاك الشي الي يدزك بش تكلمو و بعد في قلبك تقول عزاه و خلاه ... تكفر بقلب ما يشبهلكش ... الحب دزك في يديه و الحب عمرو ما واتاه ... تكفر بالسخط القدر الي يمنعك بش تضربو بكف تدوّرلو وجهو لقلبك بالك يفطن بلون عشقك ليه كيفاه و قداه ... تتمنى كان نهار تصدق شي ترى فيه قدام عينيك ... الف بروفة توريك قلة حياه ... استخفافو بالشي الي عندك معاه ... استخفافو بالشي الكبير الي قلبك ما قال كان كان ربعو ... بالتلاثة ارباع الاخرين الي عمرو ما حكاه ... تتمنى كان نهار تلم شكاير شجاعتك الي تفرق فيهم عالعباد ... و مرة وحدة تكون واضح معاه ... و تقلو راني بكذبك شالق .. نعرفك شتحب ... نعرفك وين تحب توصل ... نعرف الي الايامات الي كان المفروض نراك فيهم مشيت فيهم لبلايص اخرين من غير ما يوجعك قلبك ... من غير ما يأنبك ضميرك ... عالمسكين الي يستنى فيك ... عالبهلول الي قاعد يضوّي في تليفون ضلام ...

ضلام كي قلبك ... الي مصورلك الي انت ما فماش خوك في الدنيا .. الي انت تنجم تعفس على خلق ربي خاطر قدرك ربي ... الي الكذب حبالو طويلة ... الي الدنيا على قرنك ... تمشي بكيفك ... الي التنوفيق يوّصلك .. و كان تعرف قداش ساعات نسخف عليك ... سنين ربي عديتهم تجري على مصلحة وحدة ... تعرف بالمسبق الي انت ماكش خالطلها و مع هكا ما أيستش و ما بدلتش .. لا الاسلوب متاعك و لا العبد الي تعامل فيه هكا ... برغم هالتجارب الكل الي ديما كانت نتيجتهم صفر ... و نسخف على روحي مرات و مرات ... نعرفك شحب و عاملة مغناني ... نعرف اخرتك وين ... نعرف طول كذبك القصير ... نعرف حجم التعب .. العذاب .. العصب ... نعرف فاش و كيفاش منك نعاني ... و ما وصلت حتى لمرة بش نحزم الامور ... و نطردك تعسفيا ... الف مرة وعدت و خلفت ... الف مرة حلفت ... بش ماعادش نستناك و نقعد رهينة لكيوفك .. و نقعد بين النارين ...بين البينين .. مرة نقدّم و مرة نقول اخطاني مالبلاء

الف مرة في النهار ندعي عليك ..و قلبي يقول ان شاء الله لا

__________________________________________

فما حد حبك و عمى على كذبك مش حابب يصدّق قلبو .. يلعن قلبو الي يحبك