Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
برج البقلاوة
Fatma Cherif - فاطمة الشريف
اسمي بلقيس مازلت كي وصلت للتلاثين ... حياتي كانت ماشية كي الزيت فوق الماء ..
أنا طفلة على تلاثة أولاد .. و أنا دلولة أمي و بابا الي عمرهم ماستخسروا فيا حاجة مهما كانت غالية
أنا مهندسة ... الأولة على دفعتي سبعة سنين ... مشروع التخرج متاعي تطبّق في أكثر من بلاد في العالم
أنا ذكية ... أنا حنينة ... أنا مزيانة ... أنا كل حاجة يتمناها راجل في مرا ... أما مكتوبي بطا
في السنين الأولانين بعد الخمسة و عشرين بديت نحس الأسئلة متع عماتي وخلاتي تتبدّل كي نتلمو في دار عزيزي في
مناسبة ... و من "شعاملة في القراية" ... ل "آه فماشي برج بقلاوة
كي قربت للتلاثين ... بدات الطريقة تتبدل ... كل جمعة جايبينلي حد يحب يتعرّف ... بدا القلق .. بداو يتعبو في التلويج .. و يتعبوني معاهم
جابولي القاري و المتثقف أما الي مستواه المادي مش كي مستوايا ... جابولي الي عندو الفلوس أما طبيعتو مش كي طبيعتي ... و في الآخر جابولي السيّد الي كلاو في جرتو برج البقلاوة
..أنا ما نعرفوش ... قالولي شافني من بعيد فنا عليا و قلب الدنيا على دار بابا ... جرا و جرّا و قلب الدنيا بش نقول اي ...
أنا ما عجبنيش ... و كنت بش نقول لا نهارتها ... أما وأنا داخلة للدار بعدما كملت الخدمة ... سمعت أمي تدعي في صلاتها و ووجهها غارق في الدموع ... بش أنا نوافق و تطمان عليا ...
قلت اي ...بش تفرح امي و بش بابا يتهنى عليا ... و قلت ما نعرفش على ربي بالك يكتبلي الهنا في هالماخذة ... و نستعمل أكداس زهازي الي معبّين تراكن هالدار..
من بعد تلبيس الخاتم بشويا بديت نحس بالخطر ... و حبيت نبطّل... هو كي حسّ الي انا بش نفصع مشا لبابا من غير ما يقلي و حدد معاه تاريخ العرس ...
و قعدت ايامات كل ما نحاول نجبد لامي هدرة التبطيل تقلب الموضوع و تقلّي هيا نمشيو نشريو قماش الحاجة الفلانية ... الفرش الفلاني .. السرفيس الفلاني ...
و في غمضة العين تنصب العرس ... عرس تحلم بيه كل صبية .. .سبعة ايام و سبعةليالي ... و سبعة غصرات في حلقي ما حبوش يخرجو ..
نهارت هزاّن الفرش بكيت .. و بكيت في الحمام و بكيت في حنتي .. وفي الوطية... نهارت العرس استسلمت ...
في صباح العرس اكتشفت الي امو عندها نسخة من مفتاح الدار ... تدخل و تخرج كيما تحب تقول عليها الدار جنينة عمومية ...
ومع أول شهريّة تتصبلي ... فهمت الهدرة لكل ...
راجلي طامع فيا ..شاف كرهبتي و دلال والديا فيا ... يستخايلني بنت وزير ... شهريتي صحيح مش خايبة... أما هذيكا تعبي و شقايا ما نعطيها كان للي نحبو ...
و هو من أول نهار فهم الي أنا ما نحبوش ...
لميت فاليجتي و رجعت لدار بابا ...
يا بكا أمي و يا غرادها بنتها رجعت قبل ما تكمل شهر العسل ...
يا غلبة بابا آش يقولو عليه الناس ...
و انا هايمة على وجه الأرض بدن بلا روح ...
بعد جمعة دقّوا درا حماتي باب الدار و دخلو يلحلحو .. لعنت الشيطان و ورجعت...
جميعتين و عرفت الي في كرشي ملايكة ... حصُلت ...
عديت الأشهرة يعلم بيا كان الي خلقني ... و في عوض الدلال و الهناء .. شفت الويل
ناس ماخذة راجل و انا ماخذة أم الراجل و بوه و خواتو ... و هو كي الخيال في وسطهم ... عمارة متع منقالة ...
ولدي اليوم عمرو 3شهر .. و هوما التلاثة شهر الي عديتهم في دار بابا ..
مانيش لايمة على حتى حد ... أنا لايمة على الناس الي كان خلاتني على راحتي يمكن راني عرفت نختار ... أنا لايمة على روحي الي كنت نجم نقاوم و ما نحصلش ...أنا لايمة عالبنات
الي ترمي روحها على اي عرس و السلام و ماللي تكون أميرة في دار بوها.... تمشي بساقيها لذلّ دار راجلها ..
أنا لليوم كي نسمع حسّ كورتاج متع عروسة قلبي يوجعني و نتمنى كان فرحت كيفها..
مش الفايدة في الروبة و السهرية .. الفايدة في الهناء و المحبّة والرجولية ..
و هاذي حكايتي و حكاية برج البقلاوة ... الي طلعلي أغلى من الي تصوّرت ... برج البقلاوة الي تكلّفلي بالباقي من حياتي ...
اما مش مشكل ... الي قعدلي من حياتي هو متاعي انا ... صحيح دفعت سومو غالي اما توّيكا فما بداية أخرى مع قطعة من بدني و ورحي مصبّرتني عالدنيا و محليّتهالي في عينيا ...
الباقي من حياتي ما نلوّنو كان أنا بألواني .. ماعاد نخلي حد يلوّن في بلاصتي ...
بلقيس
بقلم فاطمة الشريف
Website Design Brisbane
Tags: