روتين يقتل ...

الناس لكل تنشد شنيا قيمة الوقت ؟ و علاش لازمني نعيش هالايمات لكل, كان نهار بركا منهم قاعد يتعاود لين روح العبد تطلع من كثر ما التفاصيل تتعاود كيما هي كل يوم .. كل صبحيّة ..و كل عشوية و كل ساعة

علاش ما نحطوش النهار اون فاكتو كيما في الماتيماتيك و نتعداو ..؟

علاش التعب و العذاب و العباد الي توجعك بكلمة في وجهك و العباد الي تتشمت فيك و العباد الي جات للدنيا بش تسيّب وطايتها عليك

علاش هالمسرح الي نمثلو فيه على بعضنا ؟ و الترهدين و المجاملات الاجتماعية ؟

علاش آلاف العباد الي تعرفهم و الي ما تعرفهمش يقحموا رواحهم في حياتك و يوّجهو اختياراتك معاك ؟

علاش المحبّة الصحيحة الي تجي في وقت غالط ؟ و علاش نلقاو  العبد المناسب في الوقت غير المناسب؟

علاش ما ننساوش ؟

علاش وعلاش وعلاش ؟

على خاطر برشا اسباب :

خاطر قيمة الوقت انو ينسيّك في هاااذم لكل :)

ساعات توصل حتى تنسى روحك كيفاش كنت .. لشكون كنت تشبّه و كيفاش كنت تخمم و تتصرّف ؟

ساعات تتمنى تلقى حد يعرفك من قديم الزمان و يقدر يحكيلك على روحك

قيمة الوقت في انو يعرّفك برشا حقايق , كان صُغرك مغمّضلك عينيك عليهم

نسّاتك صحّتك في المرضى

و نسّاتك قوتك في الضعف و نسّاوك فلوسك في الفقر

و نسّاك شبابك في الكبر

فما اعوام لازمهم يتعداو من عمرك بش تفيق ... مهما كنت ذكي و فايق و تفهملها ..

لازمك تعدّي شويا مراحل ...

و تتفرج في تصاورك بعد ما يتزاد لعمرك عمر

تضحك من بعدهم عاللي بكّاك في نهار من النهارات

و توضحلك كل تصويرة كانت تظهرلك من قبل مش واضحة

و تشد ثنيتك و تُرزن خطاويك و تصّح مشيتك و تعرف اش تحب و كيفاش توصلو

ما تنجمش قبل هاك الوقت_ الي يظهرلك ياسر رزين _ بش تفهم الشي الي داير بيك

شي اكبر من مخك

قوة الوقت في انو يكبّرك و يفهمك الي الدنيا ما تاقف على حد : لا على مرا حلات في عينيك و ظهرتلك هي مثال للمرا .. و لا راجل حبّك و عجبتك لهوتو بيك و ظهرلك الي هو احسن راجل في الدنيا ...

هاذم الزوز يمشيو ذات يوم من هاك الايامات الياسر و يتنساو ذات يوم من هاك الايامات الياسر و ما تقعد تتفكر كان ريحة البرفان و منظر السماء في هاك النهار الحزين الي هوما قررّوا يبعدو عليك فيه

بعد أشهرة تعرف الي صاحبك الي كي خوك .. ينجم يغبر فجأة ... يسافر مثلا ويتفكرك من الاول بجواب يتيم ... و من بعد ينساك و يمكن ياسر يعرضك في الشارع ما يتفكركش و لا يعمل روحو ما تفكركش

و عام من بعد تعرف الي داركم الي تعبّوك في نهار من نهارات هوما اقرب الناس ليك ... هو ما الي تلقاهم و قت الغصرة هوما الي يربطك بيهم دم .. أقرب من اي حد اخر كان في نهار من النهارات قريبلك ... هوما الي تعبّوك من خوفهم عليك ... هوما الي تعبوك خاطر خايفين عليك لا تتعب : هوما وقتها بمخّك انت تو : و يراو ابعد منك انت بعشرات السنين

قيمة الوقت انو  يشيّلك الهم الكبير ... و يخفف عليك حمل السنين الاولى من عمرك ... قيمتو في انو ينسّيك ساعات و يفكرك ساعات .. يطيّحك  برشا مرات و يوّقفك على ساقيك آلاف المرات