الراجل الي يحبّك .. ما يستحقش بش يقول ... ظاهر ...وكل حاجة فيه تثبتلك الاف المرات في اليوم من غير لا يقلق

كي يسمع الغنا الي تحبّو حتى كانو مقربع و جديد عليه ... يسمعو معاك بقلبك ... و يحكي معاك عليه ... و تحسّو يحبو على خاطرك ... يحبو خاطر يحبك ...

الراجل الي يحبّك ينجم يسمعك تحكي في نفس الحكاية للمرة عشرين و هو باقي يورّي في نفس الانتباه الي سمعك ببه اول مرة

الراجل الي يحبك ... ما يستحقش بش تحكيلو على روحك ... على خاطرو يعرفك خير ماللي تعرف روحك ... يعرف الكتب الي تحب تقراهم و البلايص الي تحب تمشيلهم و كي تمشي شنوا تهز معاك ... قهوتك كيفاش تشربها ... و كي تفيق في انصاف الليل اش يكون شاغل بالك في وقتها ...

الراجل الي يحبّك يقعد على حافة الفرش ساعتين يتفرج فيك تمكيج و يعشق في شوافر عينيك بالشفرة ... و ينشدك على الماكياج بالقطعة ... و ما يقلقش .. و ما يتشكاش ... و ما يستبطاكش .. بالعكس ... تحس السهرية الي بالحق هي انو يتفرج فيك تحضّر في روحك للخروج معاه ... ومش الخرجة في حد ذاتها

الراجل الي يحبّك ما ينجمش يهز عينيه في مرا اخرى خاطرو مليان بيك و ما عندوش وقت .. مخو و قلبو و عينيه بكلهم لاهين بيك وقت الي تبداو جميع ...

الراجل الي يحبّك تعرفو يحبك كي يتفجع عليك ... و بعمرو لا يعمل روحو ما في بالوش و لا يخليك لين تاقف لروحك بروحك ...

الراجل الي يحبّك يصبر عليك ... يصبر على خلاقك الفاسدة ... يمسح دموعك قبل ما يلقى تبريرات لوجودهم على عينيك ...

يحلم يراك أهم من الي انت فيه توا ... يحبّك كي يراك تقدّم في حياتك بالشي الي انت تحبو مش بالشي الي يحبو هو ...

يعبرّلك على محبتو بلوغتك مش بلوغتو هو ...

________________

معظم الي يشكيو من الحب .. مازالو ما عاشوهش ... يا اما اختارو الراجل الغالط ... يا اما حبّو نساء بو ذروح ...

الحب حب ... يتحس و يتشاف و عندو مطعم و ريحة و لون ... و ما أشبّش منو في الدنيا جوست يلزمو "مرا مرا" و "راجل راجل"

و الستّ كلامها صحيح كي تقول :

ياللى ظلمتوا الحب وقلتوا وعدتوا عليه قلتوا عليه مش عارف إيه

العيب فيكم يا فى حبايبكم أما الحب ياروحى عليه

فى الدنيا ما فيش أبدا أبدا أحلى من الحب

عاد أختارو مليح قبل ما تتكربسو مع عبد غالط و تقعدو اعوام عايشين جميع اما كل ما حد فيهم يكلّم لاخر يجاوبو بالنطرة و لا فوق من قلبو

الله غني عالعلاقات الي تقتل العبد بالعرق