ماللي مشيت انتي

و شي ما عاد كيما هو

تعرف؟

مخي معاش مطاوعني

نقلو معاش تخمم فيه

و نهار و طولو ما يخمم كان فيك

تي حتى من بدني معاركني..

تسمعني نشكيلك منو و لو ماكش باش تقرالي؟ ..

باهي، مثلا نومي معادش نوم

ندور عالجهة اليسار منجمش نرقد، ندور عاليمين، كتفي اللي تكسرت فيه و آني صغيرة، يتحير عليا يوجعني كي نتكى عليه.. نرقد ع ظهري و نهز راسي للسقف نراك

دموع تهبط ع خدي، تتعدى لوذنيا و تهبط فيها باردة

نغمض عينيا، مالمفروض ظلام ما نشوف شي، لا، نراك..

نراك انتي، و نراك واضح و ضاوي

نقرى قرآن و نستعوذ منك و نحاول نرقد

شي، نمد نتفرج في تصاورك القليلة اللي عندي

و نحل نقرى شوية الكلام اللي حكيناه في هالعويمين

قلبي يقبض عليا، ساعات نقول يمكن صارتلو حاجة و آني المدة هاذي الكل مش سامعة عليه حتى خبر

ساعات نقول ماهو كيفي، يحب كي يختفي بين المدة و المدة

أما طولت راك..

ساعات نشك نقول آني قلقتك بكلمة ولا حيرتلك المواجع مرة كي حكيتلك على حلمة..

على ذكر الحلمة،. ياسر نراك فمنامي، مرة ماشي و أنا نتفرج فيك و نعس ع خطواتك تبعدش عليا، مرة انت تجري تحب تشدني و آني هاربة منك و حتى عينيك مش منجمة نغزرلك فيهم

و مرات، نحلم بروحي بين يديك، ملفوفة بذراعاتك و متغطية بقلبك و راقدة على كتفك و متكية ع صدرك، و نتنفس ..

و انت تتنفس.. و اني نتفرج فينا مالسماء متاع الحلمة، كيفاه نتنفسو..

و نفيق، نلقى سنيا مكزكزة ع بعضها، نازلة بالقوي عليهم، و يديا مكمضة و شادة بعضها، راسي دايخ و عينيا تحرق و دموعي هابطة وحدها..ليلي الكل نحلم بيك، و أكثر من شطر نهاري يا نخمم فيك يا نحاول نتفكر الحلمة

و اش نتجن كي ننسى اش حلمت بيك..

توحشتك و ستاحشتك و مش عارفة نحس ب شي غير الوحش اللي ماكلني في غيابك و اني ما عندي حتى خبر عليك

برشا حاجات في بدني توجع كل ما نتفكرك ،خلاف قلبي اللي حبك و مخي لي ما يعرف كان يفكرني فيك

ستاحشتك و مش عارفة نحس ب شي تو ليك، غير الوحش..