Zaineb S. - زينب س

تفجعت درنا نلقاو مهدي جايب في يدو ساك متع حويج و سشيات دخل حال فمو و قال صبح الخير يا جماعة ، بقى ساكت شوية و كملها عااااا هههه انا تربثت حشمت عالاخر وجهي حمار اي واحد بش يرانا هكاكا بش يفهم بالغالط وليد عريان و احنا فالوضعية هذيكا ..بعد عليا دار لمهدي : مهدي كيفاش جيت ؟؟ ..هذي اهلا بخويا متاعك ..

تي تكلم ..نورمال شبيك ضيعتهم ركبت في الف نقل و بعد خذيت لواج و جيت لهنا .. بعد عليا وليد و شالو ..امي شنوة حوالها .. حسب رايك ..باهي شنوة صار ..جاو جماعة لدار فركسوها و ثمة زويز يعسو من بعيد عالدار اما عرفت نتلفهم اه شقولك في خوك ..ان شاء الله يطلع كلامك صحيح ..امااااان خويا كان ما عينكش بيا انجم نمشي ( يرمي فالكلام و يضحك) ..طفاه وليد و انطر الساك من يدو ..

شنوة هذا ..حوايج قولت خويا اكيد قاعد منو لربي و غمزو  خلي نجيبلو قطعتين باردة عليه ..انا بصراحة شدني الضحك نضحك على وليد كيفاش عامل روحو مش فاهمو و هو زادة مهدي بليد برشا اما روحو خفيفة ..اه شهرزاد اش قولك في خويا بطل مش هكا ..هههه مابلدك مهدي احنا فاش و انت فاش ..اي سامحني باين مفجوعين و خايفين عالاخر ، جبدو وليد من يدو و خرجو ..خلط بشوية تخبيت ورا الباب نسمع فيهم :مهدي شبيك هبلت ..يا معلم انا اللي هبلت ..اي اكهو يزي حشمتها لمرا ..وليد ..ممم خويا نحكو بالرسمي توا ..اووف شنوة ..في بالك اللي عملتو نورمال انتي الواحد يضرب عطار الحومة صاحبو خوه اما يا معلم تشد تفشخ لسعد الطر*** ..هذاكا اللي صار ..بيناتنا وليد ماكش نادم كيف ضربتو ..انا كان نلقى نرجع نقتلو ..شنوة خويا اغزرلي ..شبيك ..(جبد سيقارو شعلو )ام طايح في حبك درباني ..وليد تبسم جبد نفس مالسيقارو و غمز خوه ..( اوه عليا تصدمت و ما فهمت شي اش يقصد زعمة ما فهمتش نفرح ولا نبكي ولا شنوة نعمل ) ....

نسمع في مهدي سلم على وليد و مشى ، دخل جبد ساك خرج منو مريول فالازرق لبسو و انا عملت روحي مش نرا فيه مانعرفش كيفاش بش نتعامل معاه بعد اللي سمعتو ..دارلي ..شهرزاد ..وي ..اجا ..مشيتلو غزرلي مالفوق للوطة (انا خرجت مربوثة بحوايج الدار tenu gris خلعة و سروال قطن فوقهم robe de chambre ) جبد مريول فالاحمر و سروال ..خو البس هذوما ..انا ؟! اي انتي الله غالب ما عناش بنات في عمرك فالدار ..خذيتهم من عندو و دخلت للبيت نحيت دبشي فيسع ايييه حتى انا عرقت فيهم لبست المريول جاني واسع شوية و طويل و السروال كيف كيف رصاتلي هازتو عالاخر و و نكبس ..خرجت تخبيت ورا الحيط و طليت براسي ..وليد ..وي ..امان اوعدني ما تضحكش ..ههه باهي ما نضحكش ..لا ريت روحك تضحك من توا ..شهرزاد هيا عاد اخرج ..خرجت قعد يغزرلي شد شد روحو و بعد داخ عليا ضحك ..ياااا قوتلي مش بش نضحك نرجع نلبس حوايجي خير جيت دايرة خلط عليا جبدني ..يزي شبيك تنغر كيف الصغار ..اي اي اكهو بش انحاهم ..غزرلي يتبسم شنوة ما تحبش تلبس دبشي ..لا لا مش هكاكا ..ماله ..(استوالي كتاف المريول هابطة ) دخلت بعضيى..باهي باهي مش منحيتهم ......

تعدا النهار و جا الليل ، الليل قداش يخوفني و يوترني ، شديت فرشي و وليد اللوطة بجنبي متكي على ضهرو عالجراية الدنيا ظلام الزوز ما نجمناش نرقدو عينينا فالسقف و ساكتين ، قربت من حافة الفرش طليت عليه ..وليد غزرلي ..وي ..خايفة  امان اعطيني يديك ..شنوة ؟! ..هات يديك امان ..مدلي يديه شديتها بين يديا الزوز و هو مش فاهم شي قوتلو: كيف كنت صغيرة و نخاف فالليل نمشي لامي نرقد بحذاها و نقولها اعطيني يديك و هكاكا نحس بالامان و نطمن و دمعتي هبطت ..حسيت اللي ريت عينيه تلمع و زغلو ما نعرفش صحيح ولا اما جبد يدي و باسها و قالي : شهرزاد انا عمري ما سألتك اما علاش وحدك وينهم عايلتك ..بقيت ساكتة شوية و بعد تنهدت : حكاية طويلة يجي نهار و تعرف كل شي ..سكت ما عاودش سألني بقيت محملة يدو ليلة كاملة مسكين راو مسكل هههه.....

من غدوة قمت نلقاه راقد حسب التقريب بالقاعدة و انا مكبشة شادة في يديه ليلة كاملة سخفني جبدت روحي بشوية مشيت للكوجينة بش انحضر لفطور توا نهارين ما كلينا شي دخلت للكوجينة و بديت انحضر درت انحط على الطاولة نلقى وليد متكي على باب الكوجينة يغزرلي ..وليد ؟! وقتاش قمت ..دخل جبد كعبة بسكويت و بدا ياكل فيها ..صباح الخير ..صباح النور اقعد افطر ..حطيت لقهاوي و قعدت بحذاه باقي يغزرلي ..اوووه شبيك..ذكرتني بامي كي تبدا ادور فالكوجينة هذي و تحضرلنا فالفطور ..انت عشت هوني ؟؟ لا اما بابا كان يجيبنا فالعطلة ..وليد انا عمري ما سألتك على بوك ؟ توفى عندو برشا ماللي انا صغير هذي دار جدي عاش فيها هو و امي اول ما عرسو و بعد هبطو لتونس ..الله يرحمو ..كمل افطر فيسع بش نوريك حاجة ..سايي كملت هيا وريني توا ..ههه ما عندكش صبر ..هيا هيا ...شدني من يدي خرجنا ، ريت الارض هذي الكل ..اي ..متاعنا ..لا لا..كيفما نحكيلك ..خسارة علاش هملتوها هكا ! هزني ورا الدار و وراني لرض متاعهم وين تاقف ، ارض كبيرة برشا ..بابا ورثها على بوه هي و الدار اما بابا ما كانش مغروم بالفلاحة هز امي و هبط لتونس و خلاها و قعد يجيبنا كان فالعطلة كيما قوتلك ..درنا فالارض بالقدا وبعد روحنا ، تعداو نهارين نفس الروتين نهار قمت فادة لحكاية متع لسعد بش تحرقلي مخي ..وليد قوم ..شنوة علاش ..نحب انظفو الدار ..اخطاني شهرزاد موسع بالك ..تي قوم ...شديت انكركر فيه من يدو ماللول ما عينوش و بعد بدا يعاون فيا ريقلنا نظفنا مسحنا لين طاح الليل ترمينا على حافة الفرش ..اوووه مش نورمال وليد عيشك ..هههه عيشك انتي كان تشوفها امي هكا ما تصدقش ..زعمة شنوة حوالها اكيد متحيرة عليه (تي اااه ملقيت منقول)..

تنهد ..قربت منو و تكيت فوق سدرو بقى يغزرلي شوية و بعد دور يدو عليا و دورني ليه و قعدنا ساكتين همنا كان اكبر مالكلام ، جمعة تعدات و انا كل يوم نقرب من وليد اكثر نزيد نعرفو و نحبو اي اي نحبو و انا نجم ما نحبوش بعد اللي عملو على خاطري اما لازم انطقو و نعرف هو زادة يحبني ولا لا ......