وقبل ما نحبّك كنت نرى في الدنيا مستطيلات ..

خطوط مسطّرة بمسطرة حديد ... ما فماش غلط .. ما فماش خيانة .. القتل غير مبرر .. الحرام حرام ... ربي يحرق .. يشوي ... يعلّق من شوافر العينين .. الي تخون راجلها هاملة ... الي يخون مرتو ساقط ... الي يجيب صغير و يهمّلو هايشة .. الي تخدم ب بدنها **** .. الي ما يقراش على روحو يولّي غبّار ... الي يبيع الغبرة خطر عالمجتمع  .. الي يشرب مفسود .. الي تروّح بعد السبعة لدارهم ماهاش طفلة باهية .. الي تعرف البواتات خامجة ... الي تصوحب على راجلها ماهاش بنت أصل  

الي تصوحب على راجلها ماهاش بنت أصل باهي و الي تحب ؟

___________________

نهار فرشان الفرش .. الفرش الي خترتو انا وراجلي المستقبلي ... تمنيت برشا أمنيات .. من جملتهم انو يقعد راجلي راجلي  لاخر العمر ... يقعد هو المحبة الكبيرة و الراجل الاول و الاخر .. و نكبرو جميع .. و نجيبو صغار و نربيوهم و نفرحو بيهم و هاك الامنيات الي يتمناوهم البنات الكل و هوما يفرشو في فرش العرس ... الورغان الي يسوى نهد الكبد (ويمكن نستثمرو فيه برشا فلوس ماشي في بالنا قد ما بش نكتّو فيه قد ما بش نتهناو )

أول قضية قضيناها من كارفو مع بعضنا نتفكرها لتوا ... قداش كنا فرحانين ... واحنا نختارو في الحاجات الي بش نطيّبو بيهم من بعد .. فرحت كي طلعت تحب الكرام فراش كيفي ... و الأزعر و الشايح ... و كي طلعنا الزوز ما نحبوش المروقات ...

نتفكرها أول قضية و نتفكر أول مرات خرجنا فيهم من بعد و انا مرتك

ماك تعرف ؟ مش كيف ما وانا مرتك كيما و انا خطيبتك كيما و انا صاحبتك

في الاول كي كنت تقلي بالطبيعة من بعد بش نتبدل كنت نسخايلك تفدلك ... و بعد كليت الصدمة مرتين .. مرة خاطرك تبدلت بالحق و مرة خاطر نسخايلك تفدلك ... طلعوا الرجال ما يفدلكوش في الفازات هاذم ...

جمعة في جرة الجمعة شهر في جرة الشهر ... طاحت برشا حاجات من يدينا .. و تكسرت ألف حاجة بيناتنا من غير ما تتصلح و لا حتى تتصلح بروفيزوار .. بالشويا بالشويا  .. كل يوم تغرق في السكات .. كل يوم نضيّع انا الشرهة متع اني نحاول معاك ...

حاولت برشا ... تعبت ... عيتت و تهدّ جهدي و انا نكركر فيك في جرتي كي الجبل الصوان ... تموت عباد تعيش عباد وانت كيما انت ...
وجهك هو وجهك ... كيما و انت فرحان كيما و انت متغشش كيما و انت في قمة الفرحة كيما وانت تاكل كيما و انت تشرب ... كيما و انت تعمل في الحب ...
وجهك هو وجهك .. سمايلك تقول سيمان أبيض .. لا يتحرّك لا يتشقّق لا يتبدّل فيه شي .. الشهر في جرة الشهر الجمعة في جرة الجمعة

تقوم الصباح تشرب قهوتك بزوز طوابع سكر .. تلبس سوريتك البيضاء عالكسوة الكحلة و سوريتك البلو سيال على كسوتك البلو مارين ... تشيّت صباطك السبعة و نص بالثانية .. الثمنية غير درجين في الكرهبة .. تسخّن الموطور درج .. تخرج غير درج ... الثمنية تحل الراديو بش تسمع أخبار الثمنية ... توصّلني لباب الادارة بتبسيمة باردة سكة ... نص نهار تكلمني .. شحوالك ؟ برشا خدمة ؟ تو نجيك من بعد .. زوز سؤالات و معلومة ... الستة بالدقيقة تكلمني تقلي اخرج هاني قدام الادارة ...

ديما هكا مرتبين .. اخرج هاني قدام الادارة ... حتى مرة لا قتلي هاني قدام الادارة اخرج مثلا ... لا .. نفس الترتيب و نفس الكلمات

نخرج .. نطلع .. في الاول كنت تبوسني من خدي .. بعد ماعادش ... نقلك عسلامة  تقلي عسلامة باردة خاطرك تسمع في الاخبار ... توفى الاخبار تنقّص في صوت الراديو تقلي شنحوالك ؟ نقلك لاباس ... تحط كلينيوتون و تخرج .. تروّح عالروت ايكس .. حتى مرة لا بدلت الثنية ...ما تحرقش ستوب .. ما تحرقش ضو .. ما تسبّش .. تسوق منظّم .. تشد الفولون كيما علّمك المونيتور الاولاني بالكل ... تروّح ... تدوّش .. بين حضر العشا .. تتعشى .. تتفرج في التالك شو متع الليل .. ما تقول حتى كلمة .. تقوم تمشي ترقد ... و تفيق من غدوة السابعة بيل ..
نهار السبت .. تفيق مخّر .. الثمنية و نص ... تقوم تشرب قهوتك تقرا جريدتك ... نمشيو لكارفور .. نفس الكاسة و الكاسيارة ... نقضيو .. تروّح تعمل جرد للشهرية ... نفطرو ... تتكّى تقيّل ... تفيق .. تتعشى .. يجي وقت الحب ... ندخلو للبيت .. الضو طافي .. الورغان مجبود علينا ... فيسع فيسع .. تكمّل .. تقوم ... وفى الحب ...

تعدات سنين بنفس النسق ... العام الاول دخلتك لدنيتي عرفتك على صحابي .. صحابي الكل سلع و فيهم حاجة سبسيال .. ما عجبوكش .. ماهمش سريو .. نفدلكو برشا و نضحكو بصوت عالي ... و نجلبو الانتباه .. وليت نخرج معاهم وحدي ..

حاولت معاك بش تلبس السورية البيضا مع الكسوة الزرقاء .. ما حبيتش
قتلك بدّل لون الكرافات لقيتك تنجّم تبدّل لقبك أسهل من تبديل ستيلك في اللبسة .. سكتت على روحي .
حاولت انقّص من سكاتك ... رديتني انا الي نتكلّم ياسر ...
حاولت نعلّمك تقبل عباد ما تشبهلكش ... رديتني انا الي نكلّم الي يجي و معارفي تيتري ...
حاولت نعلّمك كيفاش تفرّح الناس الي دايرين بيك ... رديتني انا الي ياسر لاهية بالديتايات التافهة ...
حاولت نفكرك في اول محبتنا .. ايامات الي نخرجو بالسرقة على عايلاتنا ... هاك الستراس الي قبل ما تحكي عليا لامك .. و التعب بش وافقتلك عليا ... و التعب بش وافقت امي عليك ...
اليوم كي نسرح نقول يمكن ما كارناش شدينا في بعضنا صحيح ...

اليوم ما عاد نعرف كان نسرح ... يا  نتفكّر و لا نتخيّل ... اما معاك في الواقع  ما عاد عندي حتى شي يجمعني بيك ...
حاولت معاك .. السفر ... البحر ... حبيت نشدّك من ايدك و نجري بيك للخضار ... للقمرة ... انت تحب كان بلاصتك .. المربّع الثاني في الكانابي الي مقابل التلفزة ...
حاولت مرات نسمع كلام المنتديات ال**** متع الانترنات .. متع كيف تعتني بزوجك و تثيرينه ... و جرّبي معه الحب و ليس الزواج ... راس مالها شنوا ؟ تعب نهارين بين الاستيتيسيان و البانو

و الصالون دو كوافور و الحمام وحوانت الانجيري ...  اي شبيه ؟ شنوا المشكل ؟ على خاطر راجلي ؟ برا نجرّب .. ميسالش التعب مخلوف ...
تروّح تاعب نشد فيك صحيح ... نفس الضو الطافي و الورغان و تكمّل و يوفى الحب ... والله كان درا شتعمل لا يتبدّل حتى ديتاي ..

عشاء رومانسي على ضوء الشموع المتراقصة و ارتدي له فستان سهرة بصدر مكشوف ... جرّبت

هديّة من أجله منقوش عليها اسمه و تاريخ يعني لكما الكثير ... جرّبت
وصلة من الرقص الشرقي ... جرّبت
جرّبت جرّبت جرّبت ... نفس السمايل .. ما يتحركوش .. ما يتبدلوش .. ما يفرحوش .. ما يغضبوش ... كان درا شتقلو كيف كيف
بعد درا قداش من عام استوى الحال
وماعاودتش جرّبت ..معاك
اما الدنيا خلاتني نجرّب معاك حاجات اخرين ...

كيما الخذلان ... انك تستنى شي ما تلقاهش ... كلمة ما تسمعهاش ... و بوسة ما توصللهاش ... و مسّة ما تفرحش بيها .. راس متكّي عالكتف ... و هدية تحسها جات بعد تعب كبير ...
في الحجامة نسمع النساء تحكي ... على رجالهم ... الي يشد يصبطها بطريحة كل سبت خاطرو يروّح شارب ... و الي يشدها بالسيف خاطر جمعيتو رابحة ... و الي يحبها و فلوسو الكل ماشية في القمار ..

نعضّ مريولي و نقول اللطف

راجلي يحبني وما يقمٍّرش و ما عندوش مرا أخرى و ما يشربش و ماهوش فاسد .. فلوسو الكل ليا .. مدللني بفلوسو .. يحبني بفلوسو .. يكركر و يجيب .. و قد ما يجيب يقول ما جبتش .. ديما يجيبلي حاجات تسوى الفلوس .. كي تحكّرهم تلقاهم يتباعو .. ما عناش سوفونير جميع ؟ اما عنا برشا حاجات كان تتباع تجيب فلوس ... ما يقليش نحبك اما يعطيني فلوس ... يعبٍّر هكاكا

كي وصلت للاستنتاج هاكا .. بردت و استكنتيت .. و رتحت مخي ..
الشهر في جرة الشهر العام في جرة العام ...
راجلي يحبني بالكرهبة .. بالدار .. بالسفر .. بالذهب .. بالضربة على  قبّي  ...
راجلي مش فاسد مش قماّرجي مش بزناس مش سكارجي ..
مش يحسّ مش يفهم مش يعيش مش معايا مانيش معاه ...
دوب ما سلّمت انا في هاك الخويّط الي بيناتنا سلّم هو زادا ...

و تعدات السنين ...
بالشويا بالشويا ... ضاعت ايدي من ايدو ... تلفتت نلقى اذواقنا في المويزكا و الماكلة و الحب بعدوا على بعضهم لين تنافروا لين تباعدو لين تضادّو ...
وليت ضدو في كل شي .. يحب الظلام نحب الضو .. يحب وحدو نحب معايا العباد ... يحب السوري نحب العربي ... يحب الابيض و انا نحب الاكحل ... يحب السكات نحب الحس ... يحب النصر نحب المدينة ... يحب ياكل بالفرشيطة و السكينة نحب ناكل بيديا .. يحب الكياسات نحب الزناقي ... يحب النهار نحب الليل ... يحب الجديد نحب القديم ...
وليت نغزرلو تقول حمل على كرايمي ...

يغزرلي كمالة عدد و تابعة الكومبلي السليم فيت الي يمشي بيها للعشاوات مع صحابو ... يهزني كيما يهز تليفونو ... تليفونو يشوف فيه الوقت ... و انا يشوف فيا روحو قدام صحابو ...
ماعادش نحبّو .. تعلّمت نمثّل اني نحبو ... قدام صحابو ... نبشبش و نوّكلو و نلف عليه قبل ما نخرجو مالرستورون ... ونبوسو قدامهم .. نسمعهم يحكيو في قفاه و يقولو صحة لامو ملا ديامنتة ...

يروّحو هوما يباتو حذا نساهم ... و نروّحو احنا نباتو كل حد في بيت ... ما نتفكرش من وقتاش ولينا كل حد يبات في بيت ...

مالعروسات الي شلقت بيه مشالهم من غير حتى ما يقلي و لا يقلي ايجا معايا ؟

المناسبات الي وليت تمشيلهم بالسرقة عليا ؟

عيد ميلادي الي نسيتو ؟

سلسلة الروبة الي تسكرها و تحلها من غير ما يتبدل حتى تعبير في وجهك ؟ المرات الي جينا بش نشقو كياس نحيتلي ايدي من ايدك ؟

فازات فازات فازات

الكومباريزون الي نعملها مع الغير ؟

قلبي الي طاب من الكلام الدوني الي يتقال عليا قدامك وانت ساكت ؟

السكات ؟

ساكت ساكت ساكت

المحاولات الي فشلت الكل ؟ عيد ميلادك الي حضرتهولك و ما جيتش طفيت الشمعة في ايدي وحرقتها و حرقت قلبي من نهارتها ؟

فازات فازات فازات

وصلنا لهوني من غير سبب واحد اما بميات الاف الاسباب الصغيرة الي همّلتها انت و تعبت فيها انا و من بعد هملناها الاثنين ...

انا وانا نفرش في فرش عرسي عمري لا تخيّلت يجي نهار و نتمنى راجل اخر يكمّل معايا العمر

كانت عندي قناعة انو الي تصوحب على راجلها هاملة ...  

و ما كنتش سألت روحي قبل ..

والي تحب على راجلها ؟ و الي تحب على راجلها ؟

_____________________

أي تشابه في الشخصيات هو من وحي الخيال .. و نشالا الجزء الثاني قريب