Zaineb S. - زينب س

شاف التليفون بالصدفة يلقى نومرو ميعرفوش تنطر من بلاصتو جا قاعد عينيه تحلت يثبت و يعاود ..زعمة هي ..هي الي يستنا فيها ليه ثلاثة ليالي .. منجمش يصبر كلمها ..جاه صوت رقيق صوت حفضو ملي سمعو ..الوو ..الو سامحني لقيت النومرو هذا مكلمني..

سي انيس معايا..اي اي..انا مريم تفكرتني الي عاونتني عالكرهبة المرة الي فاتت..اااه اي اي تفكرتك ..حبيت نقلك مرسي و كان ميقلقكش نستدعاك على café..كان يخمم كيفاش يلقالها دخلة باش يعاود يراها فاجأتو هي و وفرت عليه برشا وقت..

الو تسمع في..اي اي وقتاش يساعدك..اليوم chui disponible..اوك تفاهمنا تو نكلمك... علق التليفون و قعد يخزر لنومرو تخيلها و هي تكلم فيه تبسم من غير ما يشعر..فاق بروحو تصدم ..رما التليفون فوق الطاولة و ضحك على روحو ..يعجبكشي شبيك انيس لباس تي شكون هي باش تفرح كيف تكلمك تي مالها الى وحدة ملالف و هاي راميا روحها مالاول ...يضهرلي مش باش تشد في يدي برشا... مريم علقت بالوقت كلمت حمى و حكاتلها كل شي ..اسمع مريم رد بالك منو رد بالك يقلك امشي معايا للدار تمشي شوق و لا تذوق ..ههههه حمى منين تجيب فيه الكلام تهنى تهنى ...

مريم تستنى قدام وتيل كبير لابسة روبة قصيرة فالازرق في لون عينيها و صندال جلد فالكرمال .. كانت بسيطة من غير برشا مكياج و طصنع ..قربت منها كرهبة عرفتها كرهبتو حست قلبها تقبض داخلة في لعبة مش عارفة علاش دخلتها ماللول ..ساعات تقول تتراجع و تسمع كلام عفاف ..لكن تضعف قدام اصرار حمى مش منجمة تجبد بيها ...هبط مالكرهبة لابس كلو فالاكحل هو الي تنجم تقول عليه الاسود يليق بك..قرب منها باش ياكلها بعينيه مش مصدق الي عاود شافها ..سلم علاها و نسى يدو في يدها و هو يحكي معاها .. يدها سخونة طرية مذبيه يخليها في يدو و مينحيهاش ..فاق بروحو جبد يدو و قلها..مريومة وين تحب نمشيو..انتي قلي انا منعرفش لبلاد bien ..علاش وين عايشة ..هيا تو نحكيلك في الثنية ..

طلعو في الكرهبة .. كل واحد فيهم يخمم كيفاش يجبد الهدرة معا لاخر تكلمو فرد وقت ..هاي مقتليش .. خزرو لبعضهم و ضحكو ..انيس : قتلي مالا من وين انتي ..انا عايشة في فرنسا و جيت vacance ..وين قاعدة مالا..سكتت شوية ..نسكن فالوتيل الي قابلتني قدامو..اممم معناتها نعتبرك توريست..هههه تنجم تقول ..ههه توا انتي متعرفش لبلاد يعني نجم نخطفك بسهولة ..مريم بلعت ريقها بصعوبة هيا اصلا جاية و خايفة منو على قد ما نبهتها حمى ..حسها خافت طرشق بالضحك ..هههه يا بنتي شبيك كبست روحك نفدلك عليه ..ضحكتلو ضحكة صفرة ..لا لا نعرف اما تقلقت مالسخانة مش نورمال اليوم ..خرجت راسها مالشباك تحب تبرد وجها الي حمار بكلو مالخوف و تهربو من عينيه الي باش ياكلوها ..كان يسوق و مش مركز في الثنية...

النسمة مطيرتلها شعرها الي كيف الحرير هبطو عينيه على صدرها الي باين منو شوية ابيض و مدور ..بدن مستوي مفماش الزايد ..كانت بالنسبة ليه مغرية ..مغرية في كل حركة ..في كل تلفيطة ..و خاصة في كل تبسيمة و تذبيلة عين ..عداو الثنية يحكو في العموميات حكالها على خدمتو ..على نفوذو كان مغرور بامتياز ..قعدت مقابلتو تترشف في كاس جي بارد حاطة يدها على خدها و تسمع فيه ..مسمعتش كلامو الكل خاطر كانت سارحة فيه ... تتذكر في كلام حمى عليه ... الي قالو الكل تعرفو بالنسبة ليها كان كتاب مفتوح ..انيس ميعرفش الي المرة هذي الاعيبو الكل مكشوفة ..المرة هذي خاسر الطرح قبل ما يبداه ... مريومة الوقت معاك تعدى فيسع ..قسلها على افكارها..هزت راسها و تبسمت ..اي اما وقيت مش هكا ..اوك ان شاء الله نعاودوها مرة اخرى ايا نوصلك..اوك مرسي ..سبقها للكرهبة و حل الباب ..طلعت بجنبو ..محكاوش برشا في الثنية .. كينو كل واحد كان يحاول يقرى الثاني و يكتشفو ..انيس كل مرة يسرق منها خزرة على جنب ..كان فرحان و مش عارف علاش مذابيه يزيد يقعد معاها و يملى عينيه منها قد ما يخزرلها ميملش ... عيناها ما بنهم بحر يغرق كيف تضحك تسكرهم و تهز كتافها كيف الصغار .. تخليك تتبسم من غير ما تشعر ..حست بخزرتو ليها شافت الاعجاب في عينيه ..

لكن الراجل هذا مش ساهل ..راجل يقرى لمرا من عينيها ..كيفاش حمى تحبها تخليه يحبها و يتعلق بيها ..تحب تنتقم منو بنفس السلاح الي جرحها بيه .. الحب.. وصلو قدام لوتيل وقف الكرهبة و دارلها يتبسم ..مريومة فرحان الي عرفتك..انا زادة..مالا متغيبش علينا ..هههه منعرفش كان مزلت في تونس...حل عينيه تصدم ..شنوة متقوليش مروحة تي الصيف توا بدا .. خزرتلو في عينيه و هزت حاجبها..هاك ترا وحدي ما عندي حد في تونس كان نلقى حاجة تشجعني يمكن نزيد نقعد..كانت تخزرلو بعيناها الي هبلوه ..حس روحو داخل بعضو مش عارف فهمها بالصحيح و لا يتخيل..هذا دورو مش دورها ..كلامو مش كلامها ..يثبت فيها يحب يفهمها ..من غير ما يشعر سرح في عينيها ..و كيف نكون انا الحاجة الي تشجعك تقعد و لا..هههه نخمم و نقلك ..مدت يدها باش تسلم عليه جبدها ليه و باسها بوستين عالخد..بعدت عليه حلت الباب ة هبطت من غير ما تخزرلو دخلت للوتيل ..ستانت الكرهبة تمشي خرجت تجري ركبت في كرهبتها ..